1 Yosɛf ezhyiadɔ yɛaka abha kɛlɛ ebieyo atɔɖɔ yɛabha kɛlɛ akpɛ ahɔɛ nɛ yɛ oliɛ. 2 Kɛlɛ Yosɛf akpɛ yɛ baawabhɛtɛ eleteɛ sɛ tɛ banyã yɛaka Israɛl abalɛ nɛ bɔwɔa mɛ. Kliso baawɔabhɛtɛ eleteɛ banyã yɛ abalɛ nɛ bɔwɔa mɛ, 3 kɛlɛ balɔkɔ ewui afɛtaalɛ nyɔ̃ɔ, omɔsɛ kibe ɛlɛ kɛlɛ̀ balɔkɔ pɛ banyã ekpu abalɛ̀ nɛ bɔwɔa mɛ. Kɛlɛ Egiteanɛ bazã ɔwɔnyɔ̃nɔmɛ akɔ yɛ ewui afɛtegegene.

4 Gɛ ɔwɔnyɔ̃nɔ ewuiɛ aba afalaa, Yosɛf etseɖe Faɖawo bɔpã sɛ, "Onu pɛ ɛmɔ bɔwɔ̃kuku nɛ wɔnɔ anhũɔ mɛ, notseɖe Faɖawo kɔmɛ. Notseɖe yɛɔsɛ, 5 'Mɛaka akɔ mɛ tanà bɔdɔ̃ kɛlɛ aɖɔsɛ, "Mɛ kitsibee na; vɔbɔ mɛ nɛ ozĩɛ gɛ ibukɔ mɛishu nɛ Kana kesiakpa nabha mɛ." Otsiɛ nɔ kɔ mɛ vɛ tɛ ɛdɛ vɔbɔ mɛaka; kɛɛlɛ ebatsyina ba.' "

6 Faɖawo aɖɔ asɛ, "Vɛ tɛ ɔdɛ vɔbɔ wɔakaa, asɛ kana gɛ ɔtana bɔdɔ̃ sɛ ɔbɔbhɛtɛ."

7 Kliso Yosɛf avɛ yɛaka vɔbɔ kɔ. Faɖawo yɛaxɔɛdɛ ɔzãkɔanɔ nyɔ̃ɔ atɔnɔ yɛ avɛ-baanɔ gbagbla nɛ yɛ bɔpã mɛ nɛ̀ Egipte baanɔ gbagbla nyɔ̃ɔ- 8 ɔlɔkɔ aplɛnɔ Yosɛf yɛ bɔpãmɛanɛ petee nɛ̀ yɛadzalɛ nɛ̀ baagɛ benu yɛaka bɔpãmɛanɛ. Balɛ eyialɛ nɛ̀ banɛntsyɔɛ yete balɛ awɔ Goshin. 9 Ɛɖapakaihuɔ nɛ̀ baagɛ bazã ɛsɔ nabha tsyɛ avɛ aplɛnɔ yɛ. Kɛza gbagbla kidzi.

10 Kibeɛ gɛ beku Atad amɔohukɔ, nɛ Yɔɖan kelĩɛ shuɔ, ishukpakpamɛ nɛ ozĩkpɛkpɛ mɛ nyagãa; ɛkɛlɛɛ Yosɛf alɔkɔ ewui tegegene biyoyo akɔ yɛaka. 11 Gɛ Kananɛ gɛ bazã ɛkɛlɛ amɔ ɔwɔnyɔnɔ nɛ Atad amɔohukɔɔ, baɖɔ asɛ, "Egipteanɛ baagbã tɛwɔ̃nɔ." Kliso pɛ bekulu ɛkɛlɛ nɛ Yɔɖan ɔbha asɛ Abɛl Mizraim.

12 Kliso Yakɔb yeyiayɛalɛ abhɛtɛ asɛ kana gɛ akpɛ ɔsha kɔalɛ: 13 Betukù yɛ ɔvɛnɔ Kana kesiakpa nabha kɛlɛ bavɔbɔɛ nɛ kɛklagbu ozĩɛ gɛalɛ Makipɛla ayakpa mɛ, nɛ Mamrɛ, gɛ Abraham edzi akɔ ɔvɔbɔkɔ odenɔ Xitieyi Ɛfron ɔkɔ, gɛɔplɛnɔ ayakpaa. 14 Gɛ avɔbɔ yɛaka ebekeɛ, Yosɛf etsyina vɛ Egipte, ɔplɛnɔ yɛadzalɛ nɛ̀ banɔnɔ nyɔ̃ɔ gɛ batɔnɔ yɛ avɛ yɛaka ɔvɔbɔ kɔ.

15 Kibeɛ gɛ Yosɛf yɛadzyalɛ amɔ asɛ balɛ aka etsíɛ, baɖɔ asɛ, "Ebedzi asɛ Yosɛf anyana kibui evunɔ nɛ bɔlɔ ishu kɛlɛ ababuia kɛbhɛ kɔ bɔlɔ nɛ ebuikpa nyɔ̃ɔ gɛ bɔbhɛtɛ nɛ yɛishu xɔ̃ɔ?" 16 Kliso basɛsɛ Yosɛf ɔklasɔ̃, gɛ baaɖɔ asɛ, "Wɔakaa aɖɔ ebui bhɛbhɛtɛ alɛ elu akpɛ bɔlɔ ahɔɛ flogo pɛ etsi: 17 'Kibuilɛ mɛpɛ sɛ nɔɖɔ otseɖe Yosɛf: Ibisi wɔ sɛ ɔlɔkɔ wɔadzalɛ ebuikpa bhɛbhɛtɛ nɛ̀ ebuikpa gɛ babhɛtɛ manà wɔishu nyagãa nɔ otsye alɛ.' Otsinɔ ɛkɔ wɔɛtakpu sɛ ɔlɔkɔ wɔakaa yɛ Owusoso Akaa axɔɛdɛ ebuikpa bhɛbhɛtɛ otsye alɛ." Gɛ balɛ ɔklasɔ̃ ode ku yɛɔkɔɔ, Yosɛf ebieyo.

18 Yɛadzalɛ aba kidegba kɛlɛ bezhyiadɔ nɛ yɛotugba. Baɖɔ asɛ, "Wɔ banɔdzidzi bunu."

19 Pɔ Yosɛf etseɖe balɛ asɛ, "Notoosi kifu. Ɛlɛ́ Owusoso Akaa yɛɔzãkɔ dza? 20 Wɔnɔ nɔtɔɖɔ sɛtɛ nozĩ mɛ, pɔ Owusoso Akaa atɔɖɔ kɛlɛ akɔ kɛgbangbã sɛ kɛgɛ aabhɛtɛ otsiɛnɔ baɛlɛ mɛ, gɛenu baanɔ gelee ɛkpã bubú. 21 Kliso, noti si kifu. Ebaɖi wɔnɔ nɛ̀ wɔnɔ eyiale abha."

22 Yosɛf azã Egipte, ɔlɔkɔ plɛnɔ yɛaka bɔpãmɛanɛ petee. Azã nɛ ɛkpã agɔ kɛkpã zɛzɛ̃ nɛ kɛfɔ 23 kɛlɛ amɔ̀ Ephraim yɛ baagblenɛ. Manase yɛeyianyɛ Makiɛ yeyialɛ tsyɛ bamɔ́ alɛ atɔɖɔ Yosɛf yɛ ekluisi abha.

24 Kɛlɛ Yosɛf etseɖe yɛadzalɛ asɛ, "Eba batsí. Pɔ Owusoso Akaa aba aplɛnɔ wɔnɔ tɛ ebu wɔnɔ ekoeyi nɛ kesiakpa alɛ nabha ovɛnɔ kesiakpa gɛ aɖɔ elu nɛ bɔdɔ̃ tɛtata nã mɛ akɔ Abraham, Isak nɛ̀ Yakɔb sɛ abakɔ alɛ." 25 Kɛlɛ Yosɛf akɔ Israɛl yɛ beyianyɛ batanà bɔdɔ̃ kɛlɛ aɖɔ asɛ, "Owusoso Akaa aba aplɛnɔ wɔnɔ gɛ kɛtɛ batsyina, kɛɛlɛ́ tɛ nɔlɔkɔ mɛaxɔa ɔshɛnɔ nɛ ɛkɛlɛ."

26 Kliso Yosɛf etsí gɛ aŋã agɔ kɛkpã zɛ̃zɛ nɛ̀ kɛfɔ. Kɛlɛ gɛ babalɛ yɛ nɛ bɔwɔa mɛ ebekeɛ, balɔkɔ yɛ akpɛ bekpu aɖaka mɛ nɛ Egipte.