1 Otsiɛ nɔ, Ɖina gɛ Leya amɔ̃ akɔ Yakɔb ekoeyi avɛ asɛ tɛ ediɖi badzɛ galɛ kesiakpa nabha. 2 Kibeɛ mɛ gɛ Sikɛm gɛenu Xamɔ gɛede Xivite pɛenu ekusi nɛ kibe ɛlɛ mɛ yɛeyianyɛ amɔ̃ yɛɛ, evũi apɛɛ. 3 Yɛ kituɔ nyanà Ɖina gɛenu Yakɔb yɛeyiadzɛ, kɛlɛ yɛibui zã yɛuli kɛlɛ aɖɔ kaɖɔ akɔɛ nɛ kineke dzyɛdzyɛ̃. 4 Kɛlɛ Shikɛm editseɖe yɛaka Xamɔ asɛ, "Pɛɛ adzɛnuvɔɛ alɛ akɔ mɛ tɛ edzi mɛedzinì."

5 Kibeɛ mɛ gɛ Yakɔb elũ asɛ bapɛɛ yɛeyiadzɛ nɛ tɛgagalĩ mɛɛ, yɛeyianyɛ alɛ azã ayakpa mɛ nɛ̀ yɛ baagã; kliso adã olugbù nɛibui nabha ɔdɛkpɛnɔ sɛ baba bɔpã mɛ.

6 Kɛlɛ Sikɛm yɛaka gɛenu Xamɔ avɛ asɛ adɛɖɔ kaɖɔ nɛ̀ Yakɔb. 7 Otsiɛ nɔ gɛ Yakɔb beyianyɛ elũ kɛgɛ baɛlɛ mɛ koɔ kɛlɛ bekoeyì nɛ ayakpa mɛ aba. Ɔwɔnyɔnɔ̃ nɛ̀ ɔmɔpɔɛ oyuku balɛ mɛ, ɔmɔsɛ Shikɛm abhɛtɛ awuĩ ebui nɛ Israɛl gɛ apɛ́ɛ Yakɔb yɛeyiadzɛ-kibui gɛ kɛma ɔsɛ babhɛtɛ.

8 Pɔ Hamɔ etseɖe balɛ asɛ, "Wɔeyiadzɛ nɛibui zã mɛeyianyɛ Shikɛm nuuli. Ɛkɔ wɔɛtakpu, nɔlɔkɔ yɛɔkɔɛ tɛ edzi yɛedzini. 9 Nɔkɔ bɔgbana bagɔlɔ, nɔkɔ ɔlɔ wɔnɔ beyiadzɛ bɔgbana tɛ wɔnɔ tsyɛ nɔgbanà bɔlɔ beyiadzɛ." 10 Nɔbɔ làtsɛ nɛ bɔlɔɛshi; kesiakpa eli akɔ wɔnɔ. Nɔzã kalɛ abha, nɔgã kedzi nɛ kalɛ mɛ, tɛ nɔpɛ bɔdɔ̃ mɔmɔ̃ nɛ kalɛ mɛ."

11 Kɛlɛ Shikɛm etseɖe Ɖina yɛaka nɛ̀ yɛadza alɛ asɛ, "Nɔkɔ mɛmɔ̃ kɛwɔ̃ kukú nɛ wɔnɔ anhũɔ mɛ kɛlɛ ɛbakɔ wɔnɔ kɛkanyiaka gɛ nobisiɛ. 12 Nɔbhɛtɛ kɛbhɛ nɛ adzɛ shu nɛ̀ bɔdɔ̃ kɔkɔ gɛ kɛlɛ ɔsɛ tɛ ɛmanà nɛ kana gɛ nɔpɛ ɔsɛ tɛ kikpeɛ mɛ, kɛlɛ ɛbabuia kɛkanyiaka gɛ nobisiɛ. Nɔkɔmɛ adzɛnuvɔɛ tɛ edzi mɛedzini yetee ko."

13 Gɛ bapɛ́ɛ balɛ ada Ɖina nɛ tɛgagalĩ mɛ soɔ, Yakɔb yɛeyianyɛ ebuiliulũ nɛ tɛwɔɛwɔɛ mɛ gɛ bazaɖɔ kaɖɔ akɔ Shikɛm nɛ̀ yɛaka Xamɔ. 14 Betseɖe alɛ asɛ, "Bɔtɛ balà kana kibui ɛlɛ ɔbhɛtɛ; bɔtɛ balà lɔkɔ bɔlɔ ada kɔ anyɛ nɔnɔ̃ gɛ begibhui bɔnyɛnyɛ akɔɛ. Kɛbadzi awuĩ ebui akɔ ɔlɔ. 15 Bɔbà kɔwɔ kidzo nɛ kibui tinikpo shu: sɛ nɔzã asɛ bɔlɔ ana tɛ nɔobhui bɔnyɛnyɛ akɔ wɔ beyianyɛ petee. 16 Kɛlɛ bɔbà lɔkɔ wɔnɔ bɔlɔ beyiadzɛ akɔ bɔlɔ shu pɛ bɔbà gbana wɔnɔ beyiadzɛ akɔ bɔlɔ ishu. Bɔba tsɛ nɛ wɔnɔɛshi kɛlɛ bɔbadzi banɔ tenikpo nɛ̀ wɔnɔ̃. 17 Pɔ onupɛ nɔtɛ bɔdɛmɛ ɔsɛ bebhui bɔnyɛnyɛ akɔ wɔnɔɔ, bɔbà yɛkɛ bɔlɔ ada nɔ shɛnɔ."

18 Balɛ kibuiɛ gɛ bakpɛ manà pɛ̃ akɔ Xamɔ nɛ̀ yɛeyianyɛ Shikɛm. 19 Ayisɔ̃ gɛenu anunɔ̃ gɛ bakpɛ kɛtakpuiesi akɔ adɛ petee nɛ yɛaka bɔpã mɛ egizĩ kibe nanà nɛ kibuiɛ gɛ baɖɔ shu amɔsɛ Yakɔb yɛeyiadzɛ nɛibui zã yɛuli. 20 Kliso Xamɔ nɛ̀ yɛeyianyɛ Shikɛm avɛ balɛ ɔmã gbagbla niedulũɔ pɛ badɛ ɖɔ kaɖɔ akɔ balɛ ɔmamɛ banɔnɔ. 21 Baɖɔ asɛ, "Banyɛ alɛ evũ bɔlɔ ɛbhia. Nɔkɔ bazã bɔlɔ kesiakpa nabha tɛ bagã kedzi nɛ kalɛ mɛ; kesiakpa etiɖì kɔalɛ tsyɛ. Bɔbalà gbanà balɛ ɛyiadzɛ pɛ balɛ tsyɛ agbanà bɔlɔ ayɛ. 22 Pɔ banyɛ alɛ abapɛ asɛ azã aplɛnɔ ɔlɔ asɛ banɔ tenikpo ana nɛ kibui ɛlɛ shu asɛ, bɔlɔ banyɛ ebhui bɔnyɛnyɛ asɛ gɛ balɛ tsyɛ alɛ ana. 23 Balɛ bɔpãmɛ baagã, balɛ bɔdɔ̃mɔmɔ nɛ̀ balɛ bagã bhlatɔ petee eti bedzi bɔlɔ ayɛ dza? Kliso nɔkɔ bɔdɛmɛ kɔalɛ, tɛ bàtsɛ̀ nɛ bɔlɔɛshi."

24 Banyɛ petee gɛ ekoeyi adɛ ɔmã gbagbla niedulũɔ adɛmɛ atɔɖɔ kibuiɛ gɛ Hamɔ nɛ yɛeyianyɛ Shikɛm aɖɔ nabha, kɛlɛ bebhui bɔnyɛnyɛ akɔ anyɛ kanyiaka nɛ amã gbagbla mɛ.

25 Ewui taatà ede gɛ balɛ petee azã ishutatã mɛɛ, Yakɔb yɛeyianyɛ taabha, Simeɔn nɛ̀ Levi gɛenu Ɖina yɛadzalɛ alɛ balɔkɔ balɛ babɛtɛɛ pɛ balɔadɔ ɔmã nabha nɛ ɔlɛ matimatì mɛ pɛ beyi anɔnyɛ kanyiaka. 26 Beyí Xamɔ nɛ̀ yɛeyianyɛ Shikɛm kɛlɛ bagbanà Ɖina okoeyi nɛ Shikɛm bɔpãmɛ pɛ bashɛ. 27 Yakɔb yɛ beyianyɛ avɛ ɔmã gbagbala mɛ gɛ banɔnɔ etsí eliɛ kɛlɛ balɔkɔ kɛdɔ̃ kanyiaka nɛ ɔmã mɛ gɛ bevũ balɛ ada apɛ́ɛ nɔ. 28 Bayɛkɛ balɛ baagã azãa, banɛntsyɔɛ, badikuɔ nɛ̀ kɛkanyiaka gɛinu balɛ ɛyɛ nɛ ɔmã mɛ nɛ̀ ayakpa mɛ. 29 Balɔkɔ balɛ ehoeyi bɔdɔ̃ petee nɛ̀ balɛ baadzɛ petee nɛ̀ beyiɛ. Balɔkɔ kɛkanyiaka gɛzã balɛ bapãmɛ ashɛnɔ.

30 Kɛlɛ Yakɔb etseɖe Simeɔn nɛ̀ Levi asɛ, "Nɔ manà buluhũ nɛ mɛabha gɛ nɔbhɛtɛ mɛ kɛdɔ̃ lɔlɔ̃ nɛ Kanananɛ nɛ̀ Perizianɛ nɛ̀ banɔnɔ gɛ balɛ kesiakpa alɛ nabha. Bɔlɔ tɛkakalà mɛ gikpe, kɛlɛ onupɛ beshogo ovolo nɛ mɛishu pɛ balɔ adɔ mɛabhaa, bebezĩ mɛ nɛ̀ mɛɔpãmɛanɛ petee."

31 Pɔ bebuiliulũ asɛ, "Kana kɛlɛ ɔsɛ abhɛtɛ bɔlɔ ada asɛ kedulũazazã elete dza?"