1 Otsinɔ bɔbhɛ dɔdɔ wuli ka gagãlĩi nɛ kesiakpa mɛ. 2 Kliso gɛ baŋã bɔdɔ̃ eyiɛ petee gɛ bedzi odenɔ Egipte, balɛ akaa etseɖe alɛ asɛ, "Notsyina ɔvɛ tɛ nodi dzi bɔŋaŋã ɔbɔ aplɛnɔ akɔ ɔlɔ."

3 Pɔ Yuɖa etseɖe yɛasɛ, "Anyɛ akpɛ ɔlɔ ɔsha piapii, 'Nɔzɔ mɔ mɛamɛ odɛkpɛnɔ sɛ wɔnɔ adza aba aplɛnɔ wɔnɔ.' 4 Onupɛ obɔkpɛ bɔlɔ adza tɛ avɛ aplɛnɔ bɔlɔɔ, bɔba zhi vɛ tɛ budzi bɔŋaŋã akɔ wɔ. 5 Pɔ onupɛ ɔtɛ bɔkpɛ yɛ, bɔtɛ bazhi vɛ, ɔmɔsɛ anyɛ etseɖe bɔlɔ asɛ, 'Nɔzɔ mɔ mɛamɛ odɛkpɛnɔ sɛ wɔnɔ adza aba aplɛnɔ wɔnɔ.' "

6 Israɛl ebisi asɛ, "Kiɖeso pɛ ɔmana buluhũ ɛlɛ nɛ mɛabha pɛ notseɖe anyɛ asɛ adza bhlatɔ alɛ wɔnɔ ahɔɛ dza?"

7 Bebuiliulũ asɛ, "Anyɛ ebisi bɔlɔ kibui nɛ bɔlɔ nɛ̀ bɔlɔ kigbogboɔ ishu piapii. Ebisi bɔlɔ asɛ, 'Wɔnɔ akaa akalɛ nɛ ɛkpã dza? Wɔnɔ adza bhlatɔ akaa lɛ dza?' Bubu yɛebui bibisi nulũ yete. Kɛlɛ bɔbalà pɛ bɔbà tisɛ abaɖɔ asɛ, 'Nɔlɔkɔ wɔnɔ adza mana ɛkɛlɛ dza'?"

8 Kɛlɛ Yuɖa etseɖe yɛaka Israɛl asɛ, "Kpɛ anyɛnuvɔɛ nɔ aplɛnɔ mɛ, kɛlɛ bɔbavɛ tsiɔ̃ɔ, tɛ bɔlɔ nɛ wɔ nɛ̀ wɔeyialɛ bɔbazã nɛ ɛkpã tɛ butitsí. 9 Ɛbalɔkɔ yɛ tɛzazã piapii nɔ akpɛ mɛishu ahɔɛ mɛ; ɔbɔlà obumɛ kɛpɔ gɛ onupɛ kibui tili bhɛtɛ yɛ. Onupɛ ɛgidzini yɛ mana wɔ piapii pɛ ɛlɔkɔ yɛ badzu wɔ baamɛ, ɛbalɔkɔ kɛpɔ bubuɔ tɔɖɔ mɛishu abha nɛ wɔamɛ nɛ mɛ ɛkpã petee mɛ. 10 Kɛlɛ idzi lɛ, onupɛ gɛnɛ kibeɛ butizĩɛ, tsyɛalo bɔtɛ vɛ ba bɔtɛtɛbha."

11 Kɛlɛ balɛ akaa Israɛl etseɖe balɛ asɛ, "Kɛba zã ana, nɔbhɛtɛ kɛɛlɛ: Nɔlɔkɔ bɔdɔ̃ gbangbã dɛ nɛ kesiakpa nabha teli ɔkpɛ wɔnɔ ɛkpɛtɛ mɛ tɛ nɔlɔkɔ ɔvɛnɔ anyɛ asɛ bɔdɔ̃kɔkɔ ana-bɔwɔabɔ huhuuhu, beetsí, kaalĩ nɛ̀ ɔsà baabɔ huhuhu, aɖuɖo beesieyuyu. 12 Nɔlɔkɔ ehoeyi tɛkakalà mɛ edi taabha vunɔ, kɛlɛ sɛ nodzinɔ ehoeyiɛ gɛ balɔkɔ akpɛ wɔnɔ ɛkpɛtɛ nulũ ovɛnɔ. Ogilũ awɔ̃ kesitatá kinu. 13 Nɔlɔkɔ wɔadza tsyɛ tɛ notsyina ɔvɛ anyɛ ɔkɔ tsiɔ̃ɔ. 14 Kɛlɛ tɛ Owusoso Akaa eɖi wɔnɔ ashagabui nɛ anyɛ namɛ tɛ akɔ wɔadza bhlatɔɔ nɛ̀ Bɛndzamin betsina aba nɛ wɔ. Mɛ xɔnɔ, onupɛ betsiɛɛ, mɛ betsí akɔ."

15 Kliso baanyɛ alɔkɔ bɔdɔ̃kɔkɔ nɛ̀ ehoeyi tɛkakalà mɛ edi taabha nɛ̀ Bɛndzamin tsyɛ. Bebu tɛtsɛɖɛmɛ pɛ bavɛ Egipte kɛlɛ balɔkɔ balɛ ishu akasɛ Yosɛf. 16 Gɛ Yosɛf amɔ Bɛndzamin nɛ̀ balɛɛ, etseɖe agɛ eepo yɛɔpã asɛ, "Lɔkɔ baanyɛ alɛ ɔvɛnɔ mɛ bɔpã mɛ, yi agã tɛ ɔtɔ bɔdɔ̃; tɛ bàŋã bɔdɔ̃ nɛ mɛ kemuze."

17 Anyɛ abhɛtɛ asɛ kana gɛ Yosɛf etseɖe yɛ kɛlɛ agbana alɛ avɛnɔ Yosɛf yɛ bɔpã mɛ. 18 Otsinɔ kifu yíi baanyɛ gɛ bagbanà alɛ avɛnɔ yɛ bɔpã mɛ. Beɖi asɛ, "Bamana bɔlɔ nɛ ɛkɛlɛ nɛ ehoeyiɛ gɛ bedzinɔ akpɛ bɔlɔ ɛkpɛtɛ mɛ shu nɛ kibeɛ gɛ buputɔ baa. Apɛ asɛ tɛ alɔadɔ bɔlɔ abha tɛ amɔ ohumi nɛ bɔlɔ abha tɛ evũ bɔlɔ asɛ banɔdzidzi tɛ ayɛkɛ bɔlɔ badikuɔ."

19 Kliso bavɛ agɛ yɛepo Yosɛf yɛɔpã mɛ kɛlɛ baɖɔaɖɔ nɛ yɛ nɛ bɔpã niedulũɔ. 20 Baɖɔ asɛ, "Bɔkɔ wɔɛtakpu, apalete, bɔtɛ ba ɛkɛlɛ akpɛ otugba pɛ bɔbadzi bɔŋaŋã. 21 Pɔ nɛ ɛkɛlɛɛ gɛ bɔtsɛ sɛtɛ za elishiɛ, bɔdãlɛ bɔlɔ ɛkpɛtɛ kɛlɛ anɔnyianɔ amɔ yɛ ehoeyi gɛ abuia-nɛ alɛ bupu mɛ ana-anɔyianɔ ɔkpɛtɛ nulũ. Kliso budzinì alɛ manà. 22 Bɔzɛ lɔkɔ ehoeyi tsyɛ plɛnɔ manà tɛ bɔbadzi bɔŋaŋã. Butinyi anunɔ gɛ yɛalɔkɔ ehoeyiɛ akpɛ bɔlɔ ɛkpɛtɛ mɛ."

23 Aɖɔ asɛ, "Abɔ ana. Notisi kifu. Wɔnɔ Owusoso Akaa, wɔnɔ akaa yɛ Owusoso akaa akɔnɔ kidziyɛyɛkɛ bɔdɔ̃ nɛ wɔnɔ ɛkpɛtɛɛ mɛ; Ɛyɛkɛ wɔnɔ ehoeyiɛ." Kɛɛlɛ ebu Simeɔn eyinɔ amana balɛ ɔbha.

24 Agɛ epo bɔpã agbana balɛ avɛnɔ Yosɛf yɛ bɔpã mɛ, akɔ balɛ bulĩ tɛ bepulu balɛ bɔtsɛɖɛkpɔ kɛlɛ ebhuĩ tɛwa akɔ balɛ adikuɔ. 25 Babalɛ̀ bɔdɔ̃kɔkɔ pɛ bezepo Yosɛf yɛ tɛbaba nɛ kemuze, ɔmɔsɛ belũ asɛ babaŋã bɔdɔ̃ nɛ ɛkɛlɛ.

26 Gɛ Yosɛf aba bɔpã mɛ, balɔkɔ bɔdɔ̃kɔkɔ gɛ bamana bɔpã akpɛ yɛahɔɛ mɛ, kɛlɛ bezhyi ekumũ akɔɛ nɛ kesiakpa. 27 Ebisi balɛ tɛzãzã mɛ, kɛlɛ aɖɔ asɛ, "Kɛlɛ wɔnɔ aka sheshe gɛ yɛibui notseɖe mɛ alɛ? Aka alɛ nɛ ɛkpã dza?"

28 Bebuiliulũ asɛ, "Wɔ axɔɛdɛ bɔlɔ akaa aka alɛ nɛ ɛkpã kɛlɛ alɛ piapii." Kɛlɛ bezhyikumũ akɔ yɛ asɛ kitití kpɛkpɛ ana akɔɛ.

29 Gɛ ebhui awɔ̃ afala nɔ pɛ amɔ yɛadzya Bɛndzamin, yɛelĩeyi anyɛ, ebisi asɛ, "Wɔnɔ adza bhuli nɔ naalɛ, agɛ yɛishuibui nɔɖɔ otseɖe mɛɛ?" Kɛlɛ aɖɔ asɛ, "Owusoso Akaa ebhui wɔebú, mɛeyianyɛ." 30 Yɛishumɛ hɔà gɛ amɔ̃ yɛadzaa, ebu tɛtsɛtsɛɖɛ mɛ ekoeyi adɛpɛ ɔkɔ teli tɛ ebieyò. Avɛ yɛ buvũɔ mɛ pɛ ede bieyo nɛ ɛkɛlɛ.

31 Gɛ epulu baamɛ ebekeɛ, ekoeyi aba, nɛ ishu nyanyanã mɛ, aɖɔ asɛ, "Noshi bɔŋaŋãa."

32 Bakpɛ yɛɔyɛ ɔtɔ, yɛadzalɛ yɛɔyɛ ɔtɔ, kɛlɛ Egipteanɛ teli gɛ baŋã bɔdɔ̃ nɛ yɛɔyɛ ɔtɔ, ɔmɔsɛ Egipteanɛ batɛbala bɔdɔ̃ ŋã nɛ̀ Hebrianɛ, gɛenu ogũ kɔ Egipteanɛ. 33 Banyɛ azã kesi nɛ balɛ tisheshe ulũ, odenɔ eyì kusiɛ nabha ɔdɛkpɛnɔ anuvɔɔ nabha; kɛlɛ bezeɖi baagɔlɔ kibì teli idi. 34 Gɛ bakpɛ bɔŋaŋã odenɔ Yosɛf yɛɔkpɔlɔ̃ nabha, Bɛndzamin yɛɔdɔ̃ kpè edì teeti ɔdɛ anɔnyianɔ ɔyɛ. Kliso baŋã pɛ batã nɛ kifù masimasi mɛ nɛ yɛ.