Kesikpɛkpɛ 20

Abraham nɛ̀ Abimɛlɛk

1 Otsiɛ nɔ, Abraham ashɛ nɛ ɛkɛlɛ avɛ Negɛv oxuiɛ bɔdɔ̃ mɛ kɛlɛ adɛzã Kaɖɛsh nɛ̀ Shɛɛ kishiɛ. Nɛ kibe guluĩ mɛɛ, adɛzã Gera. 2 ɛkɛlɛ Abraham aɖɔ nɛ yɛedzini Sara ishu asɛ, "Mɛada yɛenu." Kɛlɛ mɛ Abimɛlɛk gɛenu Gera ekusiɛ akpɛ anɔ nɛ Sara ɔkɔ kɛlɛ agbanà yɛ.

3 Pɔ Owusoso Akaa ebu yɛishu akasɛ Abimɛlɛk nɛ bɔlalà mɛ elishi tenikpo pɛ etseɖe yɛasɛ, "Ɔshɔnɔ kɛdɔ tsitsí ana nɛ adzɛɛ gɛ ɔgbanà shu; enu adzɛ gɛ batɛ gbanà."

4 Otsiɛ nɔ Abimɛlɛk eke hunũ yɛ kliso aɖɔ asɛ, "Apalete, obozĩ kɛmadi gɛ kɛgɛ bhɛtɛ kizizĩ nanà dza? 5 Gɛnɛ butseɖe yɛetseɖe mɛ asɛ, 'Mɛada yɛenu' pɛ yɛtsyɛ aɖɔ asɛ, 'Mɛadza yɛenuɔ dza'? Ɛbhɛtɛ kibui ɛlɛ nɛ kɛtakpu gbangbã nɛ̀ ahɔɛ bhuibhui mɛ."

6 Kɛlɛ mɛ Owusoso Akaa etseɖe yɛ nɛ bɔlala mɛ asɛ, "Ee, inyi sɛ kɛtakpu gbangbã mɛ wɔ lɔkɔ ɔbhɛtɛ kliso pɛ ɛgɛ kɔwɔ kidzo sɛ tɛ ɔbhɛtɛ kibui kpa ɔmanà mɛishu. Kɛlɛ shu so pɛ ɛgɛkɔ wɔ kidzo sɛ tɛ ohunũ yɛ. 7 Otsiɛ nɔ, tsyina anyɛɛ yɛedziniɛ ɔvɛnɔ yɛ, ɔmɔsɛ ebuiɖɔluanɔ yɛenu, kɛlɛ ebekulu Owusoso Akaa nɛ wɔɛtakpu tɛ ɔzã nɛkpã. Pɔ onupɛ ɔgi tsyina yɛ ɔvɛnɔɔ, kɛzã tititì mɛ akɔwɔ asɛ, wɔ nɛ̀ wɔeshopo alɛ petee ebetsí."

8 Kelizaza kɛvɔlɔ plii nɔ, Abimɛlɛk ekulu yɛanɔshesheɛ petee, kɛlɛ gɛ etseɖe alɛ kɛgɛ ba kɛlɛ mɛɛ, kifù yialɛ gelee. 9 Kɛlɛ mɛ, Abimɛlɛk ekulu Abraham amanà yɛɔbhà pɛ aɖɔ asɛ, "Kibui ɖuwoelu wɔbhɛtɛ nɛ̀ bɔlɔ ana? Kizizĩ ɖuwoelu mɛbhɛtɛ nɛwɔ pɛ ɔmanà kiwuĩ gbagbla ɛlɛ ɔbɔ tɔɖɔ mɛ nɛ̀ mɛ bukusi ɔŋãkɔ nabha dza? Ɔbhɛtɛ nɛ̀ mɛ̀ ebui gɛ kɛma ɔsɛ babhɛtɛ." 10 Kɛlɛ Abimɛlɛk ebisi Abraham asɛ, "Kibui ɖuwoelu so pɛ ɔbhɛtɛ kibui ɛlɛ?

11 Abraham ebuiliulũ asɛ, "Ɛɖɔ tseɖe mɛishu ɔsɛ, 'Kɛgbã kɛlɛ ɛlɛ mɛ ɔsɛ Owusoso Akaa kifù sisi ma ɛkɛlɛ, kɛlɛ bebeyi mɛ nɛ mɛedzini kɛtakpu.' 12 Ɔlɔkɔ ɛplɛnɔ kɛlɛ̀ɛ, kɛlɛ ɛlɛ mɛ kɛgbã sɛ mɛada yɛenu, mɛaka yɛeyiadzɛ pɔ gɛnɛ mɛelĩ eyi, kɛlɛ ebedzì mɛedzini. 13 Kɛlɛ gɛ Owusoso Akaa akɔ mɛzɛ nyɔ̃ nɛ mɛakaa bɔpãmɛ, itseɖe Sara sɛ, 'Kidzo ɛlɛ nabha wobo obù ɔkasɛ mɛ wɔaɖɔyɛ mɛinu: Ɔkɔnyiakɔ gɛ bɔvɛɛ, ɖɔ nɛ mɛishu ɔsɛ, "Mɛadzya yɛenu." ' "

14 Kɛlɛ mɛ Abimɛlɛk adɛ manà ibhoshi nɛ̀ banɛntsyɔɛ, banyɛ nɛ̀ badzɛ banɔ dzidzì pɛ alɔkɔ akɔ Abraham, kɛlɛ etsyina yɛedzini Sara akɔɛ. 15 Kɛlɛ Abimɛlɛk aɖɔ asɛ, "Mɛ kesiakpa eli wɔamɛ; zã ɔkɔnyiakɔ gɛ ɔpɛ."

16 Kɛlɛ Sara aɖɔ etseɖe asɛ, "Ɛbakɔ wɔadzya sikàfufu ohotu zɛzɛ. Tɛ ɛlɔkɔ kpɛ kibui kpa gɛ ɛbhɛtɛ manà wɔ kɔ nulũ nɛ́ bagɛ balɛ wɔbhà petee amɛ; ibu bɔtsyɔa akɔ wɔ petee."

17 Kɛlɛ Abraham ekulu Owusoso Akaa, kɛlɛ Owusoso Akaa ebu eyi mamɔmamɔ bɔnyãa nɛ Abimɛlɛk, yɛedzini nɛ̀ yɛadzɛnuvɔɛ dzidziɛ balɛ ishumɛ tɛ bewuli amɔ eyi, 18 ɔmɔsɛ Owusoso Akaa atɛdã bɔmɔmɔ̃ kamɔmɔvũ kanyiaka nɛ Abimɛlɛk bɔpã mɛ nɛ Abraham yɛedzini Sara kɛtakpu.