1 Otsi nɔ balɔkɔ Yosɛf avɛnɔ Egipte. Pɔtifa, Egipte eyi gɛenu Faɖawo ɔzãkɔanɔ gbagbala, gɛeɖi bagɛ beepo yɛ nabha, edzii nɛ Ishmaelanɛ gɛ balɔkɔ yɛ avɛnɔ ɛkɛlɛ́ ahɔɛ.

2 Apalete azãplɛnɔ Yosɛf kɛlɛ ebui apɛ̃ akɔɛ, kɛlɛ azã yɛ Egipte apaleteɛ bɔpã mɛ. 3 Gɛ yɛ apaleteɛ amɔsɛ Apalete alɛ aplɛnɔ yɛ, pɛ Apalete akɔ asɛ kɛkanyiaka gɛ abhɛtɛ kɛdɔ kɛlɛ abhaa, 4 Yosɛf eku awɔ̃ nɛ yɛanhũɔ mɛ kɛlɛ ebedzi yɛ apɛplɛnɔ. Pɔtifa alɔkɔ yɛedzu yɛ bɔpã nulũ, kɛlɛ alɔkɔ yɛ kɛkanyiaka akpɛ yɛahɔɛ mɛ. 5 Odenɔ kibeɛ gɛ akɔ asɛ eɖi yɛ bɔpã nɛ kɛkanyiaka gɛlɛ yɛahɔɛ nabhaa, Apalete eyula Egipte eyie bɔpã nɛ Yosɛf kɛtakpu. Apalete yɛ tiyuyula azã kɛkanyiaka gɛ kɛlɛ Pɔtifa ahɔɛ, nɛ bɔpã mɛ nɛ̀ ayakpa mɛ. 6 Kliso alɔkɔ yɛ kɛkanyiaka akpɛ Yosɛf ahɔɛ; gɛ Yosɛf yɛeɖi yɛ bɔdɔ̃ nabhaa, ebuamɛ nɛ kɛkanyiaka abhà ɔdɛ yɛ kɛŋaŋã gɛ aŋã yete.

Otsi nɔ Yosɛf amɔ ishumɛ piapii kɛlɛ eyu buyinsɔ, 7 kɛlɛ nɛ kibe teli idiɛ, yɛ apaleteɛ yɛedziniɛ ebhui awɔ̃ nɛ̀ Yosɛf kɛlɛ aɖɔ asɛ, "Ba tɛ ɔbɔ wɔsɔ̃ nɛ mɛ!"

8 Pɔɔ agɛ dɛmɛ. Etseɖe yɛasɛ, "Nɛ mɛ bɔdɔ̃abhaɖiɖiɛ mɛ, mɛ apaleteɛ ebuamɛ nɛ kɛkanyiaka shu nɛ bɔpã mɛ; yɛ kɛkanyiaka alɔkɔ akpɛ mɛ ahɔɛ. 9 Anɔ nanà agɛ mɔ ohumi nɛ bɔpã ɔlɛ mɛ adɛ mɛ. Mɛ apaleteɛ ebuidzo nɛ yɛ kɛkanyiaka ishu akɔmɛ ɔdɛ wɔ yete, ɔmɔsɛ wɔonu yɛedzini. Kiɖeso pɛ ɛbabhɛtɛ kɛtakpumɛ gagalĩ lɛ pɛ ɛbaŋã kɛpɔ nɛ Owusoso Akaa ishu?" 10 Gɛ eze bisi odenɔ Yosɛf ɔkɔ kiwui ɔvɛnɔ kiwui mɛ tsyɛɛ, agɛdɛmɛ asɛ tɛ awɔsɔ̃ nɛ̀ yɛ pɛnɔsɛ tɛ azã plɛnɔ yɛ.

11 Kiwui tenikpo avɛ yɛaxɔɛ ɔwa ɔkɔ nɛ bɔpã mɛ, kɛlɛ baxɔɛdɛ ɔmayɛmɛ nanà agɛ zã bɔpã mɛ. 12 Adzɛ atahɔɛ anyanà yɛ kabha akpɛkpɛ kɛlɛ etseɖe yɛasɛ, "Ba tɛ ɔbɔ wɔsɔ̃ nɛ mɛ!" Pɔɔ etso ekoeyì nɛ kabha akpɛkpɛ mɛ akpɛ yɛahɔɛ mɛ pɛ ebu tɛtsɛɖɛ mɛ ekoeyi nɛ bɔpã mɛ.

13 Gɛ amɔ asɛ yɛ kabha akpɛkpɛɛ awɔ yɛahɔɛ mɛɛ pɛ ebú tɛtsɛɖɛ mɛ ekoeyi nɛ bɔpã mɛɛ, 14 ekulu yɛ bɔpãmɛ axɔɛdɛ. "Noɖi mɔ," aɖɔ etseɖe balɛ asɛ, "Bamana Hebrieyialɛ sɛ tɛ aba pɛ́ɛ bɔlɔ! Aba ɛkɛlɛ sɛ tɛ awɔsɔ̃ nɛ mɛ, pɔɔ ɛkpɛ ozĩ. 15 Gɛelũ sɛ ɛkpɛ ozĩ tɛ banɔ aba aplɛnɔ mɛɛ, ashɛ ayɔlɔ yɛ kabha akpɛkpɛ nɛ mɛɔbha pɛ ebú tɛtsɛɖɛ mɛ ekoeyi nɛ bɔpã mɛ."

16 Abálɛ kabha akpɛkpɛ ɔdɛkpɛnɔ kibeɛ gɛ yɛ apaleteɛ aba bɔpã mɛ. 17 Kɛlɛ aɖɔ kibui ɛlɛ etseɖe yɛ: "Hebrieyi axɔɛdɛ alɛ gɛ ɔmana bɔlɔ ebetsoku mɛabhà sɛ tɛ apɛ́ɛ mɛ. 18 Pɔɔ gɛ ɛkpɛ ozĩ tɛ banɔ aba plɛnɔ mɛ soɔ, ashɛ yɔlɔ yɛ kabha akpɛkpɛ nɛ mɛɔbha kɛlɛ ebu tɛtsɛɖɛ mɛ ekoeyi nɛ bɔpã mɛ."

19 Gɛ yɛ apaleteɛ elũ kibuiɛ gɛ yɛedzini etseɖe yɛ, pɛ aɖɔ asɛ, "Kana wɔ axɔɛdɛ dzidziɛ abhɛtɛ amana mɛɔkɔɔ," ɔmɔpɔɛ tsuifu nɛ yɛ mɛ. 20 Yosɛf yɛ apaleteɛ alɔkɔ yɛ adɛkpɛ ɔɖa buvũ mɛ, nɛ ɛkɛlɛ gɛ baadã ekusiɛ yɛ ebuikpa bhɛbhɛtɛanɛ akpɛ.

Pɔɔ gɛ Yosɛf azã ɔɖa buvũɔ mɛɛ, 21 Apalete azã plɛnɔ yɛ; abhɛtɛ ɛyamɛ gbangbã akɔ yɛ kɛlɛ akɔ asɛ tɛ anunɔ gɛ eeɖi ɔɖa buvũmɛanɛ nabha adɛmɛ yɛ kibui. 22 Kliso ɔɖa buvũabha eɖiɖileteɛ alɔkɔ kɛkanyiaka gɛ babhɛtɛ nɛ ɔɖa buvũɔmɛ akpɛ yɛahɔɛ. 23 Ɔɖa buvũabha eɖiɖileteɛ egelu awɔ̃ nɛ kɛkanyiaaka mɛ gɛ alɔkɔ akpɛ Yosɛf ahɔɛ, ɔmɔsɛ Apalete azã aplɛnɔ Yosɛf kɛlɛ akɔ yɛ kɛkanyiaka gɛ abhɛtɛ dɔ kɛlɛ abha akɔɛ.