Kesikpɛkpɛ 35

Yakɔb Etsyina Avɛ Bɛtɛl

1 Kɛlɛ Owusoso Akaa etseɖe Yakɔb asɛ, "Wu vɛ Bɛtɛl tɛ ɔdɛtsɛ nɛ ɛkɛlɛ, tɛ odzu bɔdɔ̃pɔpɔɛ osubha nɛ ɛkɛlɛ akɔ Owusoso Akaa gɛebu yɛishu akasɛ wɔ nɛ kibeɛ gɛ ozobù tɛtsɛɖɛ mɛ ɔshɛ nɛ wɔadza Esawu ɔbhà."

2 Kliso Yakɔb etseɖe yɛɔpãmɛ anɛ nɛ̀ bagɛ azã yɛɔkɔ petee asɛ, "Nɔ shɛnɛ ahɔɛ nɛ ɛmabhlatɔ mɛ ibudiɛ petee gɛlɛ wɔnɔ ahɔɛ shu, tɛ nɔbhɛtɛ ishu libhui tɛ nɔtsaɖakɛ wɔnɔ bakpɛkpɛ. 3 Kɛlɛ nɔba, tɛ buwu ɔvɛ Bɛtɛl, nɛ ɛkɛlɛ gɛ ɛbabhɔ bɔdɔ̃pɔpɔɛ osubha akɔ Owusoso Akaa, agɛ yɛadɛmɛ akɔmɛ nɛ mɛ bɔtɔ kibeɛ, nɛ̀ agɛ yɛazã mɛishu nɛ ɔkɔnyiakɔ gɛ ɛdɛ." 4 Kliso balɔkɔ ɛmabhlatɔ mɛ ibudiɛ gɛzã balɛ ahɔɛ petee nɛ̀ batɔ̃ kisikpɛ nɔ gɛzã balɛ atɔ̃ɔ, kɛlɛ Yakɔb avɔbɔ ɛlɛ nɛ odidosiɛ niesi nɛ Shikɛm. 5 Kɛlɛ batɔnɔ kidzo, kɛlɛ kifusisi nɛ̀ Owusoso Akaa dɔ ɛmã petee gɛzã ɛkɛlɛ nabha sɛ tɛ ananà atɛ kpatɔnɔ̃ alɛ.

6 Yakɔb nɛ̀ banɔnɔ petee gɛazã yɛishuɔ ediyì nɛ Luz, (gɛenu Bɛtɛl) nɛ Kana kesiakpa nabha. 7 Ɛkɛlɛ yɛabhɔ bɔdɔ̃pɔpɔɛ osubha, pɛ akɔ ɛkɛlɛ nɛinye asɛ Ɛl Bɛtɛl, ɔmɔsɛ ɛkɛlɛ Owusoso Akaa ebu yɛishu akasɛ yɛ nɛ kibeɛ gɛ ezebu tɛtsɛɖɛ mɛ ashɛ nɛ yɛadza ɔbhà.

8 Otsiɛ nɔ Debora gɛ yɛeɖi Rebeka abha ebetsí kɛlɛ bavɔbɔ yɛ nɛ odidosiɛ gɛɔzã Bɛtɛl niesi. Kliso bakɔ ɛkɛlɛ nɛinye asɛ Alɔn Bakut.

9 Kidegba gɛ Yakɔb etsyina ede Paɖan Aram, Owusoso Akaa ezebu yɛishu akasɛ yɛ pɛ eyulà akɔɛ. 10 Owusoso Akaa etseɖe yɛasɛ, "Wɔɛnyeɛ kɛlɛinu Yakɔb pɔ bezeke kulu wɔ asɛ Yakɔb; wɔɛinyeɛ ebedzi Israɛl." Kliso akɔ yɛinye asɛ Israɛl.

11 Kɛlɛ Owusoso Akaa etseɖe yɛasɛ, "Mɛinu Owusoso Akaa ohumi petee eleteɛ; mɔ beeyi tɛ wɔ tɛkakalà mɛ kpe tɔɖɔ. Amadi nɛ̀ ɛmã ebekoeyi odenɔ wɔ mɛ, kɛlɛ beekusi ebekoeyi odenɔ wɔ mɛ. 12 Kesiakpa gɛ ɛkɔ Abraham nɛ̀ Isak, mɛlɔkɔ kɔwɔ tsyɛ, kɛlɛ ɛbalɔkɔ kesiakpa alɛ akɔ wɔ kihui nɔ gɛ ababà nɛ wɔɛdeɛ." 13 Kɛlɛ Owusoso Akaa ashɛ ewu kabha nɛ ɛkɛlɛ gɛ aɖɔ kaɖɔ nɛ yɛ.

14 Yakɔb edzu kɛklagbu osi nɛ ɛkɛlɛ gɛ Owusoso Akaa aɖɔ kaɖɔ nɛ yɛ, kɛlɛ abalɛ̀ bunù asɛ bɔdɔ̃ kɔkɔ ana nɛ kɛlɛ abhà; azabalɛ bɔbɔ tsyɛ nɛ kɛlɛ abha. 15 Yakɔb akɔ ɛkɛlɛ gɛ Owusoso Akaa aɖɔaɖɔ nɛyɛ nɛinye asɛ Bɛtɛl.

Raxɛl nɛ̀ Isak Balɛ Titsitsí

16 Kɛlɛ bavɛ kidzo gagã nabha odenɔ Betɛl. Gɛ atɔ kɛbɔɛ tɛ beku Efratiɛ, bɔmɔ̃ vũ Ratsɛl, gɛ agagalĩ akɔɛ. 17 Kɛlɛ gɛ eyimɔmɔ̃ agagãlĩ akɔɛ nɔ, adzɛ gɛ ayɛkɛ bɔmɔ̃ɔ akɔɛ etseɖe yɛasɛ, "Tɛosifu, ɔmɔsɛ ɔmɔ̃ eyianyɛ bhlatɔ." 18 Gɛ afuĩa gɔgɔɛ nɔ-ɔmɔsɛ avɛlɛ dã olugbù-akɔ yɛeyianyɛ nɛinye asɛ, Ben-Oni. Pɔ yɛaka akɔ yɛinye asɛ Bɛnyamin.

19 Klisoɔ Ratsɛl etsí kɛlɛ bavɔbɔ yɛ nɛ kidzoɔ gɛvɛ Efratiɛ (gɛenu Betlehem). 20 Yakɔb edzu kɛklagbu osi nɛ yɛ odzeɖe nabha, kɛlɛ bɔkpɛnɔ obuɔ kɛklagbu osi ɔlɛ gɛ edzuɔ dzi kɛwɔ̃ akɔ Ratsɛl odzeɖeɛ.

21 Israɛl ezewuli avɛ otugba edidzu yɛpɔtɛ kagba nɛ Migdal Elda otugba. 22 Kibeɛ gɛ Israɛl azã kɛma ɛlɛ mɛ, Reuben avɛ adɛ wɔsɔ̃ nɛ̀ yɛaka yɛagɔlɔ Bilxa, kɛlɛ Israɛl elũ kibuiɛ.

Yakɔb amɔ̃ beyianyɛ lɔfɔ nɛ̀ taabha.

23 Leya yɛeyialɛ balɛedzì:

Reuben yɛedzì Yakɔb yɛeyianyɛ gɛ eputɔɔ,

Simeon, Levi, Yuɖah, Isaka nɛ̀ Zebulon.

24 Ratsɛl yɛeyianyɛ balɛedzì:

Yosɛf nɛ̀ Bɛnyamin.

25 Ratsɛl yɛadzɛ axɔɛdɛ Bilxa yɛeyianyɛ balɛedzì:

Ɖan nɛ̀ Naftali.

26 Leya yɛadzɛ axɔɛdɛ Zilpa yɛeyianyɛ balɛedzì:

Gad nɛ̀ Asha.

Banɔ alɛ balɛedzì Yakɔb yɛeyianyɛ gɛ bamɔ́ akɔɛ nɛ Paɖan Aram.

27 Yakɔb avɛ kepi nɛ yɛaka Isak ɔkɔ nɛ Mamrɛ, gɛ etsò aplɛnɔ Kiriat Arba (gɛenu Hebrɔn), nɛ ɛkɛlɛ gɛ Abraham nɛ̀ Isak azãa. 28 Isak azã nɛkpã agɔ kɛkpã zɛzɛ nɛ̀ afɛtaasɛ. 29 Kɛlɛ yɛafuiã gɔgɔɛ pɛ etsí kɛlɛ balɔkɔ yɛavɛnɔ yɛeshopo alɛ, anɔ gɛ eshè nɛ̀ agɔ geleee. Kɛlɛ yɛeyianyɛ Esawu nɛ̀ Yakɔb avɔbɔ yɛ.