1 Ewui teli edeɛ, Owusoso Akaa efeke Abraham eɖí. Etseɖe yɛasɛ, "Abraham!" Ebuiliulũ asɛ, "Mɛ naalɛ."

2 Kɛlɛ Owusoso Akaa aɖɔ asɛ, "Lɔkɔ wɔeyianyɛ, Isak, tenikpo nɔ gɛ yɛibui wɔdɛmɛ nɔ, tɛ nɔvɛ Moɖia bɔdɔ̃ mɛ. Lɔkɔ yɛɔbhɛtɛ bɔdɔ̃ pɔpɔɛ nɛ ɛkɛlɛ nɛ butúɔ tenikpo tuli abha gɛ ɛba tseɖe wɔ."

3 Kelizaza kalɛ kɛvɔlɔ plii nɔ, Abraham alɔ kɛlɛ atɔɖɔ bɔdɔ̃ gɛ bɔlɛ abha yɛabazã nɛ yɛ adiku nabha. Agbana yɛaxɔɛdɛ taabha nɛ̀ yɛeyianyɛ Isak aplɛnɔ yɛishu. Kibeɛ gɛ ebhui bɔdzyɛɛ nɔ pɛ bukpè akɔ bɔdɔ̃ pɔpɔɛ nɔ, atɔnɔ̃ kidzo avɛ ɛkɛlɛ gɛ Owusoso Akaa etseɖe yɛɛ. 4 Nɛ kiwui teɖamɛ nabhaa, Abraham ebu bamɛ ewunɔ kabha kɛlɛ amɔ̃ ɛkɛlɛ asɛsɛ nɛ odzololokɔ. 5 Etseɖe yɛaxɔɛdɛ asɛ, "Nɔzã ɛkɛlɛ̀ ɔplɛnɔ adikuɔ tɛ mɛ nɛ̀ anyɛnuvɔɛ nɔ bɔvɛ kede ɔkɔ ɔlɛ. Bɔbàkpɛ kɛtakpuesi kɛlɛ, bɔbàtsyina bà wɔnɔ ɔbhà."

6 Kibe ɛlɛ mɛ Abraham alɔkɔ bɔdzyɛ nɔ gɛ abàlɔkɔ abhɛtɛ bɔdɔ̃ pɔpɔɛ nɔ atɔɖɔ yɛeyianyɛ Isak nabha, kɛlɛ yɛ xɔnɔ̃ alɔkɔ kifúɔ nɛ̀ kɛpãmi nɔ. Gɛ balɛ taabha bagã avɛɛ, 7 Isak aɖɔaɖɔ pɛ ebisi yɛaka Abraham asɛ,

"Mɛakaa"

Abraham ebuiliulũ asɛ, "Ee, mɛeyianyɛ." Isak ebisi yɛaka asɛ, "Gɛ kifúɔ nɛ̀ bɔdzɛɛ nɔ li ɛkɛlɛ pɔ, fakɔ obhoshi eyiɛ gɛ bɔba lɔkɔ bhɛtɛ bɔdɔ̃ pɔpɔɛ nɔ lɛ ɔlɛ dza?"

8 Abraham ebuiliulũ asɛ, "Mɛeyianyɛ, Owusoso Akaa abakɔ ɔlɔ obhoshi eyiɛ kɔ bɔdɔ̃ pɔpɔɛ nɔ nɛ yɛahɔɛ mɛ. Kɛlɛ balɛ taabha bagã avɛ kitsù.

9 Gɛ bediku ɛkɛlɛ gɛ Owusoso Akaa etseɖe yɛɛ, Abraham abhɔ osubha nɛ ɛkɛlɛ pɛ alɔkɔ bɔdzyɛ nɔ atɔɖɔ ɔlɛ abha. Anyã yɛeyianyɛ Isak kɛlɛ alɔkɔ yɛatɔɖɔ bɔdzyɛɛ nabha, nɛ osubha nabha. 10 Kɛlɛ akpɛ yɛ ɔhɔɛ pɛ alɔkɔ kɛpami nɔ tɛ̀ ebhui yɛeyianyɛ. 11 Pɔ Apaleteɛ yɛaxɔɛdɛ akpɛ ozĩ ekulu yɛ asɛsɛ odenɔ kititíɛ asɛ, "Abraham! Abraham!" Ebuiliulũ asɛ, "Mɛ naalɛ."

12 Aɖɔ asɛ "Tɛkɔ wɔhɔɛ lɔpa nɛ anyɛnuvɔɛ nɔ shu. Tɛbhɛtɛ kibui nanà nɛ̀ yɛ. Otsialɛ inyi ɔsɛ oosì Owusoso Akaa nɛifù, ɔmɔsɛ ɔgɛ lɔkɔ wɔeyianyɛ ɔbhɛtɛ mɛ amumũ, wɔ eyianyɛ tenikpo nɔ."

13 Abraham ebu bamɛ ewunɔ kabha kɛlɛ nɛ kifutùkpɔɛ mɛ, amɔ obhoshinyè toli gɛ ehui akpakà ɔlɛ ashaa. Avɛ kɛlɛ edibu obhoshinyè kɛlɛ adɛwɔ̀a ɔlɛ shu axɔ̃ɛ asɛ bɔdɔ̃ pɔpɔɛ nɛ yɛeyianyɛ nulũ. 14 Kliso Abraham ekulu ɛkɛlɛ asɛ, Apaleteɛ Abakɔ. Kliso ɔdɛkpɛ nɔ obuɔ, baɖɔ asɛ, "Nɛ Apaleteɛ yɛ butú nabhaa babàkɔ kɛdɔ̃."

15 Apaleteɛ yɛaxɔɛdɛ eze kulu Abraham odenɔ kititíɛ bɔbhalà 16 kɛlɛ aɖɔ asɛ, "Ɛtanà mɛ kinyeɛ, Apaleteɛ ebu aɖɔ asɛ, gɛ ɔbhɛtɛ kibui ɛlɛ pɛ ɔgɛ lɔkɔ wɔeyianyɛ ɔbhɛtɛ mɛ amumũɔ, wɔ eyianyɛ tenikpo nɔ, 17 kliso ɛba yulà akɔ wɔ gɛ kɛtɛ bàtsyina, kɛlɛ ɛbabhɛtɛ wɔ kihui nɔ gɛ nobokpe asɛ awɔ̃ɛ nɛ kɛlɛɛ nɔ mɛ̀, nɛ̀ asɛ ayisɛɛ nɛ kelikekpu gbagbla nɔtɔ̃. Wɔ kihui nɔ bayɛkɛ bagɛ atɛaɖɔ wɔ balɛ ɛmã gbagbala, 18 kɛlɛ ganà wɔ bɔmɔ̃ɔ mɛɛ, bebeyula atɔɖɔ akɔ amadiɛ petee nɛ kesiakpa nabha ɔmɔsɛ olũ mɛ atɔ̃."

19 Kɛlɛ mɛ, Abraham etsyina avɛ yɛaxɔɛdɛ ɔkɔ, kɛlɛ yɛ nɛ balɛ batɔnɔ̃ kidzo avɛ Biɛshɛba. Kɛlɛ Abraham azã Biɛshɛba.

20 Kibè tili edeɛ, betseɖe Abraham asɛ, "Milka tsyɛ enu eyielĩ; amɔ̃ beyianyɛ akɔ wɔadzya Nahɔ: 21 Uz gɛedzì eyianyɛ gɛeputɔɔ, Buz gɛenu yɛadzya, Kemuɛl (Aram yɛaka), 22 Kɛsɛd, Hazo, Pildas, Yiɖlaf nɛ̀ Betuɛl." 23 Betuɛl amɔ́ Rebeka. Milka amɔ̃ beyianyɛ taasɛ alɛ ɔkɔ Abraham yɛadzya Nahɔ. 24 Yɛagɔlɔ gɛ bezekulu asɛ Ruma tsyɛ amɔ beyianyɛ: Tɛba, Gaham, Tahash nɛ̀ Maaka.