1 Apaleteɛ aɖɔ etseɖe Abram asɛ, "Tu ɔshɛ nɛ wɔ kesiakpa nabha, wɔeshopo alɛ nɛ̀ wɔakaa bɔpãmɛanɛ ɔbha tɛ ɔvɛ kesiakpa gɛ ɛbakasɛ wɔ nabha.

2 "Ɛbabhɛtɛ wɔ kɛmadi gbagbla

kɛlɛ ɛbayula wɔ;

Ɛbabhɛtɛ wɔ kinyeɛ tɛ kidzì kinye gbagbla,

kɛlɛ obodzi anɔ gɛ beyula.

3 Ɛba yula akɔ bagɛ eyula akɔ wɔ,

kɛlɛ anɔ̃ gɛ aɖɔ kibui akpɛ wɔɔ, ɛbaɖɔ kibui ɔkpɛ yɛ;

kɛlɛ banɔnɔ nyɔ̃ɔ nɛ kesiakpa nabha

bebe yula akɔ alɛ ɔgana wɔabha."

4 Kliso Abram etu ashɛ asɛ kana gɛ Apaleteɛ etseɖe yɛ; kɛlɛ Lɔt tsyɛ avɛ aplɛnii. Abram atɛŋã agɔ afɛtegegene nɛ̀ teeti nɛ kibeɛ gɛ etu ashɛ nɛ Xaran. 5 Alɔkɔ yɛedzini Sarai, yɛadzyaeyi Lɔt, ɔplɛnɔ balɛ ahɔɛmɛɔdɔ̃ nɛ̀ baxɔ̃ɛdɛ gɛ amɔ̃ nɛ Xaran, kɛlɛ batɔnɔ Kana kesiakpa nɛidzo kɛlɛ bediku ɛkɛlɛ.

6 Abram agã kidzo afala nɛ kesiakpa mɛ ɔdɛkpɛnɔ ɛkɛlɛ gɛ Mɔɔrɛ busi gbagbala azã nɛ Shekɛm. Nɛ kibe ɛlɛ Kananɛ azã kesiakpa mɛ. 7 Apaleteɛ ebu yɛishu akasɛ Abram pɛ aɖɔ asɛ, "Wɔeyialɛ mɛbalɔkɔ kesiakpa alɛ kɔ." Kliso abhɔ bɔdɔ̃pɔpɔɛ osubha akɔ apaleteɛ nɛ ɛkɛlɛ.

8 Denɔ ɛkɛlɛ, azagã ewu avɛ betuɔ mɛ nɛ Bɛtɛl yɛ kiwiɛotukɔ ɛbe kɛlɛ edzu yɛ kɛpɔtɛagba, gɛ Bɛtɛl azã kɛwɔ̃aa gɛvɛ kiwiɛ ɔdɔkɔ kɛlɛ Ai azã kɛwɔ̃aa gɛvɛ kiwiɛ otukɔ. Abhɔ bɔdɔ̃pɔpɔɛ osubha akɔ Apaleteɛ nɛ ɛkɛlɛ kɛlɛ akpɛ ketakpuesi kɔ Apaleteɛ. 9 Kidegbaa, Abram alɔ pɛ avɛ kidzogagã nabha ɔvɛnɔ oxuinɔ gɛɔvɛ kesiakpa kalɛ kesi ɔkɔ.

10 Otsinɔ bɔbhɛ badɔ nɛ kesiakpa nabha, kɛlɛ Abram etú ezhyi avɛ Egipte tɛ adɛzã ɛkɛlɛ kɛbɔɛ ɔmɔsɛ bɔbhɛ dɔdɔ nulũ gagalĩ. 11 Kibeɛ gɛ ebeku Egipteɛ, etseɖe yɛedzini Sarai asɛ, "Inyi adzɛ gɛeyi bubite nɔnɔ ɛdi gɛonu. 12 Onupɛ Egipteanɛ amɔ wɔɔ, babaɖɔ asɛ, 'Yɛedzini na alɛ.' Kɛlɛ́ɛ bebèyi mɛ pɔ babakɔ wɔ xɔnɔ ɔzã nɛkpã. 13 Ɖɔsɛ mɛadaa woɔnu, tɛ babhɛtɛ mɛ piapii nɛ wɔɛtakpu tɛ mɛ zã nɛkpã nɛ wɔɛtakpu.

14 Gɛ beku Egipteɛ, Egipteanɛ amɔsɛ Sarai enu adzɛ gɛeyi bubite piapii. 15 Kɛlɛ gɛ Farao yɛanɔ sheshèɛ amɔ Sarai, badɛ ɖɔ ebui gbangbã nɛishu etseɖe Farao, kɛlɛ bagbana yɛavɛnɔ yɛ ekusiupã mɛ. 16 Abhɛtɛ Abram piapii nɛ adzɛ nɛtakpu, kɛlɛ Abram amɔ ibhoshi, banɛtsyɔ̃ɛ, badikunye nɛ̀ badikudzɛ, badzɛ axɔɛdɛ, ɔplɛnɔ kipoasɔ akɔ yeishu.

17 Pɔ Apaleteɛ akɔ banyã kpà Farao nɛ̀ yɛɔpãmɛanɛ nabha adɔ nɛ Abram yɛedzini Sarai kɛtakpu. 18 Kliso Farao ekulu Abram amana yɛamɛ. Ebisiɛ yɛasɛ, "Kiɖe wɔ bhɛtɛ nɛ mɛishu ana?" "Kiɖeso pɛ ogi tseɖe mɛ ɔsɛ wɔedzini yɛenuɔ dza?" 19 Kiɖeso pɛ ɔɖɔsɛ, 'Mɛadaa yɛenu,' pɛ ɛlɔkɔɛ pɛ edzi mɛedzini dza? Kliso otsie nɔ, ɔmɔ wɔedzini. Gbana yɛ tɛ ɔshɛ!" 20 Kidegbaa, Farao akɔ yɛaxɔɛdɛ ɔsha nɛ Abram ishu, kɛlɛ bakpɛ yɛidzo yɛashɛ ɔplɛnɔ yɛedzini nɛ̀ kɛkanyiaka gɛ amɔ kɔ yɛishu nɛ ɛkɛlɛ.