1 Kɛlɛ mɛ Yakɔb avɛ yɛidzo gagã nabha pɛ ediku kiwui otukɔ banɔnɔ kesiakpa nabha. 2 Ɛkɛlɛ yɛamɔ bulĩ ozĩ nɛ kesiakpa mɛ, gɛ ibhoshi aza tɛta wɔsɔ̃ ɔlɛ ɔbhà ɔmɔsɛ bulĩ ozĩ ɔlɛ mɛ beeshi bulĩ akɔ ibhoshiɛ. Kɛklagbuɔ gɛ balɔkɔ adã bulĩ ozĩ nulũɔ gbogblo. 3 Kibeɛ mɛ gɛ ibhoshiɛ petee bashogo nɛ ɛkɛlɛɛ, ibhoshi agbagbana eleteɛ ebeglebè kɛklagbuɔ atsɛ nɛ ozĩ nulũ kã akɔ ibhoshiɛ nulĩ. Kɛlɛ mɛ bebèdzinì kɛklagbuɔ avɛnɔ adɛdã bulĩ ozĩ nulũ.

4 Yakɔb ebisi ibhoshi agbagbana eleteɛ asɛ, "Mɛadzalɛ, fakɔ node?"

Bebuiliulũ asɛ, "Bude Xaran."

5 Ebisi alɛ asɛ, "Nonyi Laban, Nahɔ yɛeshui anyɛnuvɔɛ nɔ dza?"

Bebuiliulũ asɛ, "Ee bunyi yɛ."

6 Kɛlɛ mɛ Yakɔb ebisi alɛ asɛ, "Alɛ piapii dza?"

Baɖɔ asɛ "Ee alɛ piapii kɛlɛ yɛeyi adzɛnuvɔɛ Ratsɛl naalɛ yɛaba nɛ̀ ibhoshiɛ."

7 Aɖɔ asɛ, "Noɖi mɔ, kiwuiɛ katsiɖì kititíɛ; kibe kaná ɔsɛ tɛ beshogo ibhoshiɛ. Nɔkɔ ibhoshi nulĩ tɛ nodzini ɛlɛ ɔgbana ɔvɛnɔ bɔdɔ̃ ɔŋãkɔ."

8 Bebuililũ asɛ, "Bɔtɛ balà, ɔdɛkpɛnɔ ɔsɛ ibhoshiɛ petee lɛba shogo pɛ buglebè kɛklagbuɔ tsɛ nɛ bulĩ ozĩ nulũ. Kɛlɛ bɔbà kɔ ibhoshiɛ nulĩ."

9 Kibeɛ gɛ azaɖɔaɖɔ naalɛ, Ratsɛl ebeku nɛ̀ yɛaka ibhoshiɛ ɔmɔsɛ adzɛ ibhoshi agbagbana elete yɛenu. 10 Kibeɛ mɛ gɛ Yakɔb amɔ̃ Ratsɛl gɛenu yɛelũdzua Laban yɛeyi adzɛnuvɔɛ nɔ nɛ̀ Laban yɛibhoshiɛ, avɛ edi glebè kɛklagbuɔ atsɛ nɛ bulĩ ozĩ nulũ pɛ akɔ yɛelũdzua ibhoshiɛ nulĩ. 11 Kɛlɛ Yakɔb akpɛ ahɔɛ nɛ Raxɛl oliɛ pɛ ashuahɔɛ yoyo mɛ gagalĩi. 12 Etseɖe Ratsɛl asɛ eshopo yɛenu akɔ yɛakaa nɛ̀ eyianyɛ ɔkɔ Rebeka. Kliso ebu tɛtsɛɖɛ mɛ avɛ editseɖe yɛakaa.

13 Odunũ ɔlɛ gɛ Laban enyelũ ɔklasɔ̃ odenɔ Yakɔb gɛenu yɛada yɛeyianyɛ ɔkɔ koɔ, alɔ tsiɔ ɔlɛ pɛ adɛ tsyana yɛ. Anyana yɛakpɛ yɛetemɛ̀ pɛ akpɛ ahɔɛ nɛ yɛoli kɛlɛ agbana yɛavɛnɔ yɛɔpãmɛ, ɛkɛlɛ Yakɔb etseɖe yɛ ebui alɛ petee. 14 Kɛlɛ Laban etseɖe yɛasɛ, "Mɛahɔɛ ishudzya nɛ̀ dzyosu wɔonu."

Gɛ Yakɔb azã yɛɔbhà yɛana woele zɛzɛɛ, 15 Laban etseɖe yɛasɛ, "Gɛnɛ sɛ gɛ eshopo wɔonu akɔmɛ so pɛ ɔbɔwɔa axɔɛ kɔmɛ kɛbhɛ mabuia mabuia. Tseɖe mɛ tɛshɛ nɔnɔ gɛ ɔbɔ yɛkɛ."

16 Otsi nɔ, beeyi adzɛnuvɔɛ taabha azã Laban ahɔɛ; eshesheɛ nɛinye kɛlɛinu Leya, kɛlɛ eyi anuvɔ nɛinye kɛlɛinu Ratsɛl. 17 Leya anhũɔ apɔɔɖi, pɔ Ratsɛl xɔnɔ̃ afɔ̀ kpɔkpɔlɔ piapi, kɛlɛ eyi bubite. 18 Yakɔb adɛmɛ Ratsɛl kibui pɛ aɖɔ asɛ, "Ɛbawɔà axɔɛ kɔwɔ agɔ tegegene tɛ mɛ gbanà wɔeyi adzɛnuvɔɛ eyideɛ Ratsɛl."

19 Laban aɖɔ asɛ, "Apɛ akɔmɛ sɛ tɛ ɛlɔkɔ yɛ kɔwɔ ɔdɛ banyɛ bhlatɔ. Zã ɛkɛlɛ ɔplɛnɔ mɛ." 20 Kliso Yakɔb awɔa axɔɛ agɔ tegegene sɛ tɛ agbana Ratsɛl, pɔ azã akɔɛ asɛ ewui bhlui teli yete nɛ kana gɛ adɛmɛ yɛibui so.

21 Kɛlɛ mɛ Yakɔb etseɖe Laban asɛ, "Lɔkɔ mɛedzini akɔ mɛ. Mɛibeɛ na, kɛlɛ ɛpɛ sɛ tɛ ɛwɔsɔ̃ nɛ̀ yɛ."

22 Kliso Laban eshogo banɔnɔ petee gɛ balɛ ɛkɛlɛ pɛ edzu bɔ̃ŋaŋã ɔkpɔlɔ̃ kɔalɛ. 23 Pɔ gɛ ɔwlagoɔ ɔnaa, alɔkɔ yɛeyiadzɛ Leya akɔ Yakɔb, kɛlɛ Yakɔb awɔsɔ̃ nɛ̀ yɛ. 24 Kɛlɛ Laban alɔkɔ yɛ adzɛaxɔɛdɛ Zilpa akɔ yɛeyiadzɛ sɛ tɛ adɛ axɔɛ akɔɛ.

25 Gɛ kɛvɔlɔ naa, Leya pɔ naalɛ! Kliso Yakɔb ebisi Laban asɛ, "Kibui ɖuwoe idi pɔ nɛlɛ wɔbhɛtɛ nɛ̀ mɛ ana? Ɛdɛ kanɔya kɔwɔ nɛ Raxɛl shu, ɛgɛ dɛ bɔyaa dza? Kiɖeso pɛ ɔwɔɛ mɛ?"

26 Laban ebuiliulũ asɛ, "kinu ɔkɔ̀ nɛ ɛkɛlɛ ɔsɛ tɛ bɔlɔkɔ eyideɛ kɔ anyɛ yɛagbana eputɔ akɔ eyi kusiɛ. 27 Bhɛtɛ eyiadzɛ alɛ tɛgbagbana ɔgɔnɛ ɔkɔɔ beke; kɛɛlɛ bɔbà lɔkɔ eyideɛ tsyɛ kɔwɔ, tɛ owuli ɔdɛ kanɔya agɔ tegegene."

28 Kɛlɛ Yakɔb abhɛtɛ ana. Abhɛtɛ ɔgɔnɛ ɔkɔ ebeke nɛ Leya shu, kɛlɛ Laban alɔkɔ yɛeyiadzɛ Raxɛl akɔɛ asɛ tɛ edzi yɛedzinì. 29 Laban alɔkɔ Bilxah gɛenu yɛadzɛ axɔɛdɛ akɔ Ratsɛl asɛ tɛ edzi yɛaxɔɛdɛ. 30 Yakɔb awɔsɔ̃ nɛ̀ Ratsɛl tsyɛ, kɛlɛ adɛmɛ Ratsɛl ibui adɛ Leya. Kɛlɛ azadɛ kanɔya akɔ Laban agɔ tegegene aplɛnɔ.

31 Gɛ Apaleteɛ amɔ asɛ agɛ dɛmɛ Leya yɛibui soɔ, adãlɛ yɛ kamɔmɔvũɔ nulũ, pɔ Ratsɛl yɛɔmɔ ohuiɛ nulũ dã. 32 Leya emunù ɛya kɛlɛ amɔ eyianyɛ. Akɔ yɛinye asɛ Rubɛn, ɔmɔsɛ aɖɔ asɛ, "Gɛ Apaleteɛ amɔ mɛ ɔwɔnyɔnɔ̃ so. Otsialɛ mɛenyine aba dɛmɛ mɛibui gɛ kɛtɛ batsyina."

33 Eze munù ɛya, kɛlɛ gɛ amɔ eyianyɛ, aɖɔ asɛ, "Ɔmɔsɛ gɛ Apaleteɛ elũ asɛ agɛ dɛmɛ mɛibui soɔ, aza kɔmɛ yɛalɛ̀ tsyɛ." Kliso akɔ yɛinye asɛ Simeɔn.

34 Eze munũ ɛya, kɛlɛ gɛ amɔ eyianyɛ aɖɔ asɛ, "Otsialɛ mɛenyine abakpa yɛishu aplɛnɔ mɛ, ɔmɔsɛ ɛmɔ beyianyɛ taata kɔɛ." Kliso akɔ yɛinye asɛ Levi.

35 Eze munu ɛya, kɛlɛ gɛ amɔ eyianyɛ, aɖɔ asɛ, "Kibèlɛ xɔnɔ̃ ɛbakpɛ Apaleteɛ inye nɛititi." Kliso akɔ yɛinye asɛ Yuɖa. Kɛlɛ ebhui bɔmɔ.