1 Kibe teli ideɛ, betseɖe Yosɛf asɛ, "Wɔ akaa ishumɛ zĩ." Kliso agbanà yɛeyianyɛ taabha Manase nɛ̀ Efraim aplɛnɔ yɛishu. 2 Gɛ betseɖe Yakɔb asɛ, "Wɔeyianyɛ Yosɛf aba wɔkɔɔ" Israɛl akpɛ kemí alɔ azã nɛ yɛ ɛpã nabha.

3 Yakɔb etseɖe Yosɛf asɛ, "Owusoso Akaa Ohumi Petee Eleteɛ ebú yɛishu akasɛ mɛ nɛ Luz nɛ Kana kesiakpa nabha, ɛkɛlɛ yɛeyulà akɔ mɛ 4 kɛlɛ etseɖe mɛ asɛ, 'Ɛbakɔ wɔ oyù eyuyù kɛlɛ ɛbakɔ wɔ tɛkakalà mɛ kpè tɔɖɔ. Ɛbakɔ wɔodzì ɔmã, kɛlɛ ɛba lɔkɔ kesiakpa alɛ akɔ wɔ asɛ wɔahɔɛmɛ kɛdɔ̃ tihɔɔ akɔ wɔ kihui nɔ gɛ babà nɛ wɔɛdeɛ.'

5 "Otsinɔ, kɛlɛ, wɔ beyianyɛ taabha gɛ bamɔ́ akɔ wɔ nɛ Egipte flogo pɛ ɛba wɔkɔ nɛ ɛkɛlɛ̀ babà kalà alɛ sɛ mɛ ayɛ; Efraim nɛ̀ Manase ebedzì mɛ ayɛ asɛ kana gɛ Ruben nɛ̀ Simeɔn enu mɛ ayɛ ana. 6 Beyi kanyiaka gɛ bazamɔ́ akɔ wɔ nɛ baalɛ niedeɛ ebedzì wɔ ayɛ; nɛ kampɛ nɔnɔ gɛedzi balɛ kaŋãsiɛ, babà kalà alɛ akpɛ balɛ adza alɛ enye niesi. 7 Gɛ itsyina ide Paɖan pɛ ɛbaa, nɛ mɛ ɔwɔnyɔnɔ mɛɛ, Raxɛl etsí nɛ Kana kesiakpa nabha gɛ bɔka tsiɖi kidzo nabha vɛɛ, tidzedze bhlui odenɔ Efrat. Kliso ɛvɔbɔ yɛ nɛ ɛkɛlɛ nɛ kidzoɔ gɛili ɔvɛ Efrat shu" (Gɛenu Betlɛxɛm).

8 Gɛ Israɛl amɔ̀ Yosɛf yɛ beyianyɛ, ebisi asɛ, "Fakɔ anɛ naalɛ?"

9 Yosɛf etseɖe yɛaka asɛ, "Balɛenu beyianyɛ gɛ Owusoso Akaa akɔ mɛ nɛ ɛkɛlɛ̀."

Kɛlɛ Israɛl aɖɔ asɛ, "Gbanà balɛ ɔmanà mɛ tɛ mɛiyulà akɔ alɛ." 10 Otsiɛ nɔ Israɛl yɛanhũɔ eelĩ nɛ tisheshèɛ shu so, kɛlɛ atɛka mɔ piapii. Kliso Yosɛf agbanà yɛeyianyɛ etso aplɛnɔ yɛ, kɛlɛ yɛaka akpɛ ahɔɛ nɛ balɛ oliɛ pɛ anyanà balɛ akpɛ etemɛ.

11 Israɛl etseɖe Yosɛf asɛ, "Ɛgaa ɖi kidzo mɛ sɛ iwuli bamɔ wɔamɛ, kɛlɛ otsiɛnɔ Owusoso Akaa akɔmɛ kidzo tɛ mɛmɔ wɔeyialɛ tsyɛ."

12 Kɛlɛ Yosɛf atsɛ alɛ nɛ yɛaka ekuisi nɔ pɛ ezhyinɔ bamɛ ekumu kesi. 13 Kɛlɛ Yosɛf agbanà balɛ taabha, Efraim akpɛ yɛŋã mɛ gɛvɛ Israɛl kɛblɛkpɛ ɔhɔɛ mɛ, kɛlɛ akpɛ Manase nɛ yɛ kɛblɛkpɛ nɔ mɛ gɛvɛ yɛaka kɛŋã ɔhɔɛ mɛ, kɛlɛ agbanà alɛ aplɛnɔ yɛishu. 14 Pɔ Israɛl akpɛ yɛŋã ɔhɔɛ sɛsɛ kɛlɛ alɔkɔ ɔlɛ atɔɖɔ Efraim yɛtakpú nabha, flogo nɔ yɛenu anuvɔ, kɛlɛ gɛ akpɛ yɛhɔɛ tsakɛ bagɔlɔɔ, atɔɖɔ yɛ kɛblɛkpɛ ɔhɔɛ nɛ Manase kɛtakpuɔ, flogo nɔ manaseɛ yɛenu esheshèɛ.

15 Kɛlɛ yɛeyulà akɔ Yosɛf pɛ aɖɔ asɛ,

Tɛ Owusoso Akaa gɛ yɛamɛ mɛakaalɛ agãa

Mɛakalɛ Abraham nɛ̀ Isak

Owusoso Akaa gɛedzi mɛ obhoshi gbagbana elete

nɛ mɛ ɛkpãa petee mɛ bɔkpɛnɔ obuɔ,

16 Akaa axɔɛdɛ gɛ ebú mɛ odenɔ ɔfɔ̃wɔawɔa kanyiaka mɛ

eyulà akɔ banyɛnuvɔɛ alɛ.

Balɔkɔ mɛinyieɛ ekulu balɛ nɔ

nɛ̀ mɛakalɛ Abraham nɛ̀ Isak balɛ enyeɛ,

kɛlɛ bekpè atɔɖɔ gelee

nɛ kesiakpa nabha."

17 Gɛ Yosɛf amɔ sɛ yɛaka aalɔkɔ yɛŋã ɔhɔɛ atɔɖɔ Efraim yɛtakpúɔ, kɛgɛ zã yɛuli, kliso anyanà yɛaka ɔhɔɛ atsɛ nɛ Efraim kɛtakpúɔ avɛnɔ Manase ɛtakpúɔ. 18 Yosɛf etsɖe yɛasɛ, "Oho, mɛakaa, yɛalɛ yɛenu eyì kusiɛ, tɔɖɔ wɔ kɛŋã ɔhɔɛ nɛ yɛtakpúɔ."

19 Pɔ yɛakaa agɛ dɛmɛ kɛlɛ aɖɔ asɛ, "Inyi, mɛeyianyɛ, inyi. Yɛtsyɛ ebedzi ɔmã, kɛlɛ ebedzi anɔ gbagbla. Kɛlɛ ana tsyɛelo, yɛadza anuvɔ ebedzi anɔ gbagbla adɛ yɛ, kɛlɛ yɛ kihui nɔ badzì amadi kɛza." 20 Eyulà akɔ balɛ nɛ kiwui ɛlɛ nabha kɛlɛ aɖɔ asɛ,

"Nɛ wɔɛnyeɛ mɛ Israɛl abaɖɔaɖɔ nɛ tiyuyulà ɛlɛ shu:

'Tɛ Owusoso Akaa abhɛtɛ wɔ asɛ Efraim nɛ̀ Manase.' "

Kliso abhɛtɛ Efraim kɛtakpù akɔ Manase.

21 Kɛlɛ Israɛl etseɖe Yosɛf asɛ, "Ɛba otsìkɔ, pɔ Owusoso Akaa abazã aplɛnɛ wɔ kɛlɛ ebedzinì wɔ agbanà amanà wɔakaalɛ kesiakpa nabha." 22 Kɛlɛ wɔ asɛ anɔ gɛ avɛ otugbà ɔdɛ wɔadza alɛ ana, ɛkɔ wɔ beetu kesiakpa alɛ gɛ ɛyɛkɛ odenɔ Amorianɛ ahɔɛ nɛ̀ mɛ bɛtɛ̀ nɛ̀ mɛ̀ bɔnyɔ̃.