Kesikpɛkpɛ 49

Yakɔb Eyulà Yɛ Beyianyɛ

1 Kidegba Yakɔb ekulu yɛ beyianyɛ kɛlɛ aɖɔ asɛ: "No shogo nɛ mɛɔbha tɛ ɛbala itseɖe wɔnɔ kɛ gɛ babá wɔnɔ abha nɛ ewui gɛ aba ba mɛ.

2 "Noshogo tɛ nɔtaatɔ̃, Yakɔb beyianyɛ;

nɔtaatɔ̃ wɔnɔaka Israɛl.

3 "Rubɛn, wonu mɛeyikusi,

mɛ ohumi, mɛ ohumi eyuyu gɛeputɔ aba,

ɔɔnà nɛ kɛtakpuesi kpɛkpɛ mɛ, ɔɔna nɛ ohumi mɛ.

4 Ɔgɛdɔ fɔɔ̃ asɛ kelĩkpɛkpɛ ana,

ɔɔzɔkɔ na,

ɔmɔsɛ owu wɔaka ɛpã abha, nɛ mɛ ɛpã bɔdɔ̃ nabha kɛlɛ ɔkpɛ yɛɔtsɔ̃.

5 "Simeɔn nɛ̀ Levi benu baadzya-

balɛ bɛtɛ benu bɔdɔ̃zĩzĩ eyuta bɔdɔ̃.

6 Tɛkɔ mɛiku balɛ ɔhamɛ,

tɛkɔ mɛitsoku balɛ tishoshogomɛ,

ɔmɔsɛ beyí baanyɛ nɛ ɔmɔpɔɛ mɛ

kɛlɛ bagbã nɛntsyɔɛ tɛtsɛtsɛɖɛ aasɛ kana gɛ ba pɛ.

7 Kibuiɖɔkpɛanɔ edzi balɛ ɔmɔpɔɛ, lokuifù,

kɛlɛ balɛ ɔmɔpɔɛ kpɛkpɛ, kɛtakpumɛ gagalĩ!

Ɛba pɔ̃ɛalɛ mɛ kanà nɛ Yakɔb mɛ

kɛlɛ ɛba hɔɛalɛ nɛ Israɛl mɛ.

8 "Yuɖa, wɔadzalɛ abakpɛ wɔ nɛititi;

wɔahɔɛ bazã baagɛ batɛaɖɔwɔ balɛ oli;

wɔaka yɛ beyianyɛ bebè zhyiekumũ akɔwɔ.

9 Onu dzata eyi, O Yuɖa;

otsyinaba odenɔ agã gɛ ovũɔɔ, mɛeyianyɛ.

Aasɛ dzata ana gɛ aabhɛ̃ kɛlɛ ezhyi eli kesi,

aasɛ dzataelĩ-afa gɛ abala hɔana yɛ?

10 Akɔfra atɛba shɛ nɛ Yuɖah ɔkɔ,

pɛnɔsɛ dzaŋgbɛ nɛ yɛ ɛtsɛɖɛ ishi,

ɔdɛkpɛnɔ gɛ aba agɛ yɛayɛ yɛenuɔ ɔkɔ

kɛlɛ kɛmadiɛ baatɔ̃ lulu enu yɛayɛ.

11 Aba kpaka yɛ adiku nɛ wain kihui ishu,

yɛ adiku eyi nɛ bɔshɛ̀ɛ gbangbã ishu;

ebepulu yɛ apɔtɛ nɛ wain mɛ,

yɛ akpɛkpɛ nɛ wain eyuyu dzyosu mɛ,

12 Yɛ anhũɔ aba nɔ tũtũũtũ adɛ wain,

yɛ eneɛ befuli adɛ bɔmɔlĩ.

13 "Zebulun ábà zã bulĩkekpu tɔ̃

kɛlɛ ebedzi ɔtsɛkɔ akɔ kelĩ ihuɔ;

yɛ buboɔ aba nɛ̀ avɛ Sidɔn.

14 "Isaka enu adiku kpɛkpɛlɛ

gɛ awɔsɔ̃ adiku ɛkpɛtɛ taabha ishi.

15 Kibe nɔnɔ gɛ amɔ̃ kana gɛ yɛ omoelè ɔkɔ ɔpɛɛ

nɛ̀ kana gɛ yɛ kesiakpa alɔdzɛ̃,

ebezhyini yɛ owudɔ niesi akɔ kitukuɔ

kɛlɛ aba wɔa kɛxɔɛ gɛ batɔɖɔ yɛabha.

16 "Ɖan aba ebe kulu kebhu gbangbã akɔ yɛanɔnɔ

asɛ Israɛl kigbogbɔ tenikpo.

17 Ɖan ebedzì eblidzya nɛ kidzo ishu,

eblidza gɛ eyi ashà nɛ kidzo kɛwɔã

gɛenemi ɛsɔ yɛ katsɛɖɛkpɔ edeɛ

sɛtɛ agɛ yɛekũ yɛ adɔ oboe avɛ kide.

18 "Iɖi kidzomɛ akɔ wɔ tibubuɔ, O Apalete.

19 "Beyutaɛza abalɔ adɔ Gaɖ abha,

pɔ abalɔ adɔ balɛ abha gɛ beebu tɛtsɛɖɛ mɛ.

20 "Asha yɛ bɔŋaŋã baluubɔ,

abakɔ bɔŋaŋã edi gɛ abashɔ̃ akɔ ekusi.

21 "Naftali enu asabho gɛ beboele

gɛ amɔ́ beeyi gɛ beyì bɔnɔ.

22 "Yosɛf enu kihui gɛiyu eyuyù.

kihui gɛiyu eyuyù gɛalɛ bulĩ gɛ bukoeyi nɛ kesiakpa mɛɔbha,

gɛ kɛlɛ bɔsha buwu ɔgã kigili abha.

23 Nɛ ishumɛ pɔpɔɛ mɛɛ, bɔnyɔ̃ atata eleteɛ alɔadɔ yɛabha;

batá yɛ nɛ tɛmaɖɔ́maɖɔ́ mɛ.

24 Pɔ yɛ bɔnyɔ̃ɔ gɛishukù,

yɛ ɛhɔɛ gagãliɛ zɛ hɔà piapii,

nɛ Yakɔb yɛ Ohumi eleteɛ ɔhɔɛ gagãlĩ kɛtakpu,

nɛ ibhoshi Agbagbana elete, Israɛl yɛ Ɔxɔàa kɛtakpu so,

25 nɛ wɔaka yɛ Owusoso Akaa, gɛ aplɛnɔ wɔ kɛtakpu

nɛ Ohumielete gɛ eyulà akɔ wɔ kɛtakpu

nɛ̀ tiyuyulà gɛede owusoso nɔ gɛalɛ kabhaa

tiyuyulà gɛede kesiakpa mɛ nɛ̀ kesiɛ ɔkɔ

tiyuyulà gɛede kɛmɔ́ nɛ̀ kamɔmɔvũ mɛ

26 Wɔaka tiyuyulà egbogblo

ɔdɛ beetùkukuɔ tiyuyulà,

adɛ beetukpɔ sheshe bɔdɔ̃kɔkɔ.

Kɔ baalɛ nyɔ̃ɔ bemoelè nɛ Yosɛf yɛtakpu nabha,

nɛ ekusieyiɛ yɛ ketúɔ nɛ yɛadzalɛ nɛishi.

27 "Bɛndzamin enu kifutùmɛ ebu gɛ bɔbhɛ yi;

nɛ kɛvɔlɔ mɛ aatã agãvuvũɔ,

ɔwlagoɔ aapɔ̃ɛ keyudɔ̃ mɛ."

28 Israɛl yɛ egbogbo lɔfɔ nɛ̀ taabha nyɔ̃ɔ naalɛ, kɛlɛ kibui ɛlɛ balɛ akaa etseɖe balɛ gɛ eyulà akɔalɛ, pɛ akɔ anɔnyianɔ yɛ tiyuyulà gɛ ashɔ̃ akɔɛ.

Yosɛf Yɛ Titsitsí

29 Kɛlɛ akpɛ ɛsha ɛlɛ akɔalɛ: "Atɔ kɛbɔɛ gɛ ɛbavɛ mɛashuĩalɛ ɔkɔ. Nɔvɔbɔ mɛ nɛ mɛakalɛ ɔbhã nɛ kɛklagbu ozĩɛ gɛlɛ Efrɔn Hetieyie yɛ ayakpaa mɛ, 30 kɛklagbu ozĩɛ nɛ Makipɛla ayakpaa mɛ, nɛ Mamrɛ gɛalɛ Kana, gɛ Abraham edzì akɔ ɔvɔbɔkɔ odenɔ Efrɔn Xitieyiɛ, ɔplɛnɔ ayakpaa. 31 Ɛkɛlɛ bavɔbɔ Abraham nɛ̀ yɛedzinì Sara, ɛkɛlɛ́ bavɔbɔ Isak nɛ̀ yɛedzini Rebeka, ɛkɛlɛ mɛvɔbɔ Leya. 32 bedzi ayakpaa nɛ kɛklagbu ozĩ gɛ akpasɛ kalɛ mɛɛ odenɔ Xitianɛ ɔkɔ."

33 Kibeɛ gɛ Yakɔb ayɔlɔ ɛsha akpɛ akɔ yɛ beyianyɛ, efeke yɛtsɛɖɛ atɔɖɔ ɛpã nabha, pɛ afuĩa gɔgɔɛ kɛlɛ avɛ yɛashuĩalɛ ɔkɔ.