1 Gɛ Yakɔb eti sɛ bɔdɔ̃eyi azã Egipteɛ, etseɖe yɛ beyianyɛ asɛ, "Kiɖeso pɛ nooɖi wɔnɔ baagɔlɔ ana yete?" 2 Avɛ kɛlɛ abha sɛ, "Ilũ sɛ bɔdɔ̃eyi lɛ Egipte. Nɔ ozhi ɔvɛ ɛkɛlɛ tɛ nɔodzi teli ɔmana bɔlɔ, tɛ bɔbazã nɛ ɛ́kpa kɛlɛ bɔtɛbatsi."

3 Kɛlɛ Yosɛf yɛdzya lɛ lɔfɔɔ bavɛ tɛ bedidzi bɔŋaŋã eyiɛ nɛ Egipte. 4 Pɔɔ Yakɔb agɛ kpɛ Bɛndzamin, Yosɛf yɛadza, ɔplɛnɔ yɛadzya abhlatɔɔ, ɔmɔsɛ esi kifu asɛ kizizĩ baba yɛabha. 5 Kliso Israɛl yɛ beyianyɛ bazã banɔnɔ gɛ bavɛ edi dzi bɔŋaŋã eyiɛ mɛ, ɔmɔsɛ bɔbhɛ dɔ nɛ Kana kesiakpa nabha tsyɛ.

6 Otsinɔ Yosɛf yɛedzi kɛmadi ekusi akɔ kesiakpa, anɔnɔ gɛ adɛ bɔdɔ̃eyi akɔ kɛmadi mɛ anɛ. Kliso gɛ Yosɛf yɛadalɛ edikuɔ, bezhyi ekumũ akɔɛ gɛ batsɛ́ balɛ bamɛ akpɛ esi. 7 Gɛ Yosɛf amɔ yɛadzalɛɛ koɔ, eti sɛ balɛ, pɔ abhɛtɛ yɛishu aasɛ efu ana kɛlɛ ata kanyã akpɛ balɛ ɔkɔ. Ebisi balɛ asɛ, "Fakɔ nɔode?"

Bebuiliulũ asɛ, "Budè Kana kesiakpa nabha, pɛ bɔbadzi bɔdɔ̃eyi."

8 Yosɛf eti asɛ yɛadzalɛ, pɔɔ balɛ xɔnɔ begitì asɛ yɛ. 9 Kɛlɛ ábaka yɛ balala nɛ balɛ ishu kɛlɛ etseɖe balɛ asɛ, "Bawɔ̃nyɔnɔanɛ nonu! Nɔba sɛ tɛ noboɖi bɔlɔ kesiakpa mɛ ɛkɛlɛ gɛ betie epoɔ."

10 Bebuiliulũ asɛ, "Oho, mɛ apalete. Wɔ axɔɛdɛ babá sɛ tɛ bebedzi bɔŋaŋã. 11 Bɔlɔ petee anyɛ tenikpo yɛeyianyɛ bunù. Wɔ baxɔɛdɛ enu banɔ gɛ betitsyina kineke, pɛnɔsɛ bawɔ̃nyɔnɔanɛ."

12 Etseɖe balɛ asɛ, "Oho! nɔba sɛ tɛ noboɖi bɔlɔ kesiakpa ɛkɛlɛ gɛ beti epoɔ."

13 Pɔ bebuiliulũ asɛ, "Wɔaxɔdɛ baadza lɔfɔ nɛ̀ taabha, beyianyɛ odenɔ anyɛ tenikpo yɛɔkɔ, gɛ balɛ Kana kesiakpa nabha. Ebhulibhuli nɔ alɛ bɔlɔ akaa yɛɔkɔ otsiɛ, kɛlɛ tenikpo abhama."

14 Yosɛf etseɖe balɛ asɛ, "Kɛlɛ ana asɛ gɛ itseɖe wɔnɔ: Bawɔ̃nyɔnɔanɛ nonu! 15 Kɛlɛ kidzo ɛlɛ nabha bebefeke wɔnɔ eɖi: Gɛ Faɖawo alɛ nɛ ɛkpaa, nɔtɛbɔshɛ nɛ ɛkɛlɛ oɖi ɔdɛkpɛnɔ sɛ wɔnɔ adza bhulii nɔ aba ɛkɛlɛ. 16 Nɔkpɛ wɔnɔ ɔmayɛmɛ tenikpo tɛ adɛ gbana wɔnɔ adza mana; wɔnɔ bagɔgɔ̃ɔ babàkpɛ wɔnɔ buvũ, tɛ befeke wɔnɔ kibuiɖɔɖɔ eɖi asɛ nɔɖɔ kibui gbã dza. Onu pɛ gɛnɛ kanaa, kɛlɛ́ɛ gɛ Faɖawo alɛ nɛ ɛkpaa, bawɔ̃nyɔnɔanɛ nonu!" 17 Kɛlɛ akpɛ balɛ petee buvũ ewui taata.

18 Nɛ kiwui tɛɖamɛ nabhaa, Yosef etseɖe balɛ asɛ, "Nɔ bhɛtɛ anii kɛɛlɛ nɔbɔzã nɛkpã, ɔmɔsɛ isi Owusoso Akaa kifu: 19 Onupɛ nonu banɔ gɛ betitsyina kinekeɛ, nɔkɔ wɔnɔ adza tenikpo azã buvũ nɛ ɛkɛlɛ, gɛ wɔnɔ bagɔgɔ̃ xɔnɔ ɔbɔshɛ pɛ nɔbɔ lɔkɔ bɔdɔ̃ɛbeyi ɔvɛnɔ wɔnɔ bapãa gɛ badɔ ɔbhɛɛ. 20 Pɔ kɛlɛ sɛ nɔgbanà wɔnɔ adza bhuli nɔ ɔmanà mɛ, tɛ bapɔɛ wɔnɔ ebuiɖɔɖɔ shu tɛ nɔtɛ obotsi." Kɛlɛ baavɛ ɛlɛ abha asɛ abhɛtɛ.

21 Betseɖe bagɔlɔ asɛ, "Kɛgbã baapɔ̃ batɔ̃ akɔ ɔlɔ nɛ bɔlɔ adzaa ishu. Bɔmɔ kana gɛ awɔnyɔnɔ ɔzã yɛmɛɛ gɛ akɔɛtakpu nɔlɔ akɔ yɛkpã, pɔ bɔgɛ dɛmɛ sɛ ilũ; kliso pɛ ɔwɔ̃nyɔnɔ ɔlɛ aba bɔlɔ abha."

22 Rubɛn ebuiliulũ asɛ, "Ɛgɛitseɖe wɔnɔ asɛ nɔtɛ bhɛtɛ kibui kpa nɛ anyɛnuvɔɛ nɔ shu? Pɔ nɔgɛ dɛmɛ sɛtɛ nɔolũ! Otsiɛ kɛna asɛ tɛ bebisi yɛ dzyosu nɔ odenɔ bɔlɔ ahɔɛ mɛ." 23 Begitì asɛ Yosɛf abalà elũ balɛ baliesi ɔmɔsɛ aza wɔa bulũhũ esi bubu elete ishu axɔɛ.

24 Etsyina nɛ balɛ ɔbha kɛlɛ ashuahɔɛ yoyo mɛ, pɔ etsyina ba balɛ ɔbha kɛlɛ ewlui aɖɔaɖɔ akpɛ balɔkɔ. Akɔ bebu Simeɔn nɛ balɛ ishi kɛlɛ banyã yɛ nɛ balɛ amɛ.

25 Yosɛf akpɛ ɔsha asɛ bakpɛ bɔdɔ̃eyiɛ leyuku balɛ ɛkpɛtɛ mɛ, tɛ balɔkɔ balɛ ɔmayɛmɛ akanyiaka yɛ ehoeyi etsyina akpɛ yɛ ɔkpɛtɛ mɛ akɔɛ, tɛ bakɔ balɛ bɔŋaŋã akɔ balɛ kidzo gagã. Gɛ babhɛtɛ ana akɔ balɛ ebekeɛ, 26 bakpɛ balɛ bɔdɔ̃eyie etuku atɔɖɔ balɛ adiku nabha kɛlɛ bashɛ.

27 Nɛ ɛkɛlɛ gɛ batsɛ sɛtɛ bazã elishiɛ, balɛ ɔmayɛmɛ tenikpo adalɛ yɛ ɔkpɛtɛ tɛ akɔ yɛ adiku nɔ bɔŋaŋã, kɛlɛ amɔ yɛ ehoeyiɛ nɛ yɛ ɔkpɛtɛ nielũ. 28 Etseɖe yɛadzalɛ asɛ, "Betsyina mɛ ehoeyi akɔ mɛ, ɔmɔ alɛ nɛ mɛ ɔkpɛtɛɛ mɛ."

Balɛ kiteɛ zhyieku balɛ ɛyamɛ kɛlɛ betsyina bamɛ akpɛ baagɔlɔ pɛ beshuku, pɛ baɖɔ asɛ, "Keɖe nɛlɛ gɛ Owusoso Akaa abhɛtɛ nɛ ɔlɔ?"

29 Gɛ bedeku balɛ akaa yɛɔkɔ nɛ Kana kesiakpa nabha, betseɖe yɛ kɛgɛ ɛlɛ ba balɛ abha petee. Baɖɔ asɛ, 30 "Anyɛ gɛ yɛenu apalete nɛ kesiakpa nabha atɛ kanya akpɛ bɔlɔkɔ kɛlɛ abhɛtɛ bɔlɔ asɛ gɛ bɔnyɔ̃awɔ̃ nɛ kesiakpa nabha. 31 Pɔ butseɖe yɛ asɛ, 'Bunu banɔ gɛ bɔtɛ tsaɖakɛ kineke; butinu bɔnyɔ̃awɔ̃nɔanɛ. 32 Badza lɔfɔ nɛ̀ taabha bunu, akaa tenikpo yɛeyianyɛ. Tenikpo abhama, kɛlɛ ebhulibhuli nɔ alɛ bɔlɔ akaa ɔbha nɛ Kana otsiɛ.'

33 "Kɛlɛ anyɛ gɛ yɛenu apaleteɛ nɛ kesiakpa nabha etseɖe bɔlɔ asɛ, 'Kidzo ɛlɛ nabha mɛba tisɛ nonu baanɔ gɛ batɛ atsaɖakɛ kineke: Nɔshɛ̃ nahɔɛ wɔnɔ adza tenikpo nɛ mɛɔbhà nɛ ɛkɛlɛ, tɛ nɔ lɔkɔ bɔŋaŋã akɔ wɔnɔ bapãa gɛadɔ bɔbhɛ tɛ nɔshɛ. 34 Pɔ nɔgbanà wɔnɔ adza bhuli nɔ manà tɛ mɛiti sɛ notinu awɔnyɔ̃nyɔ̃nɔanɛ pɔɔ banɔ gɛ batɛ tsaɖakɛ kineke. Kɛɛlɛ ɛbatsyina wɔnɔ adza akɔ wɔnɔ, tɛ nɔlà kedzi gã nɛ kesiakpa nabha.' "

35 Gɛ beetsyina bɔdɔ̃eyi ebu nɛ balɛ ɛkpɛtɛ mɛɛ, balɛ ɔmayɛmɛ akanyiaka amɔ̃ yɛ ehoeyiɛ ɔkpɛtɛ mɛ! Gɛ balɛ nɛ̀ balɛ aka amɔ ehoeyi nɛ ɛkpɛtɛɛ mɛɛ, kifu dɛ alɛ. 36 Balɛ akaa Yakob etseɖe balɛ asɛ, "Nɔpɔ̃ mɛeyialɛ tɛɛ nɛ mɛishu. Yosɛf abhama kɛlɛ Simeɔn abhama, kɛlɛ otsiɛ, nɔkɔ pɛ ɔsɛ tɛ nɔlɔkɔ Bɛndzamin. Kɛkanyiaka lɔɛtiti nɛ mɛishu!"

37 Kɛlɛ Rubɛn etseɖe yɛaka asɛ, "Ɔbɔlà oyi mɛ beyianyɛ taabha gɛ igidzini yɛ mana wɔ. Lɔkɔ yɛ ɔkpɛ mɛahɔɛ mɛ, kɛlɛ ɛ́badzini yɛ mana."

38 Pɔ Yakɔb aɖɔ asɛ, "Mɛyianyɛ atɛba vɛ ɛkɛlɛ nɛ wɔnɔ; yɛadza etsi kɛlɛ yɛ tenikpo yɛagɔ̃. Onu pɛ kizĩzĩ teli abhɛtɛ yɛ nɛ kidzo ɛlɛ gɛ nɔgã mɛɛ, nobo zhyini mɛ kɛtakpu fufuliɛ akpɛ odzeɖe mɛ nɛ ɔwɔnyɔ̃nɔ mɛ."