1 Kɛlideɛ, Apalete ibuiɛ ba kɔ Abram nɛ bɔlalà mɛ ebuibubu kasɛ:

"Kifu ti yi wɔ, Abram.

Mɛinu wɔ ɔɖaɛtɛ̃,

wɔ kɛbhɛ babuia gbagbla."

2 Pɔɔ Abram aɖɔ asɛ, "O, Ekusi Apalete, kiɖe wɔbɔ kɔmɛ gɛ eyi ama mɛahɔɛ kɛlɛ anunɔ gɛ ebedzi mɛ aŋãsie yɛenu Elieza gɛ ede Damaskɔs?" 3 Kɛlɛ Abram aɖɔ asɛ, "Ɔgɛ kɔ mɛ eyi nana; kliso mɛaxɔ̃ɛdɛ bedzi mɛ kaŋãsiɛ."

4 Kidegba Apalete kibuiɛ ba kɔyɛ asɛ: "Anyɛ alɛ etibedzi wɔ kaŋãsiɛ, pɔ eyianyɛ ebede wɔ mɛ gɛebedzi wɔ kaŋãsiɛ. 5 Agbanaɛ yɛ avɛnɔ ɔtɔ̃ɔ kɛlɛ aɖɔ asɛ, "Ɖi kititíɛ tɛ ɔkala awɔ̃ɛ-onupɛ ɔbɔla alɛ ɔkala." Kelideɛ, etseɖe yɛasɛ, "Kana wɔ eyialɛ ebe kpe."

6 Abram ayɛkɛ Apaleteɛ nabha ŋã, kliso alɔkɔ kɛlɛ akɔɛ asɛ kibui dadalɛ yɛabhɛtɛ.

7 Etseɖee tsyɛ asɛ, "Mɛinu Apaleteɛ gɛebu wɔnɔ denɔ Ul nɛ Kaldeanɛ kesiakpa mɛ tɛ ɛ́balɔkɔ kesiakpa alɛ kɔwɔ tɛ edzi wɔayɛ."

8 Pɔ Abram aɖɔ asɛ, "O Apalete Ohumielete, kɛlɛ mɛbati sɛ ɛba yɛkɛ kesiakpa alɛ?"

9 Kliso Apaleteɛ aɖɔ etseɖe yɛ asɛ, "Lɔkɔ nɛtsyɔɛyi, epidzya nɛ̀ obhoshinye, gɛ bayɛkɛ agɔ taata, plɛnɔ abronimɛeyi nɛ kɛkpakpoeyi."

10 Abram alɔkɔ bɔdɔ̃ petee amana yɛ, ebhũi baagã mɛ tabha tabha kɛlɛ elu baagã bhubhũi mɛ nɛ bagɔlɔ ɔbha pɔ egibhũi bɔzhyɔɛ nɔ mɛ. 11 Kidegba bɔzhyɔɛ gɛ bɔtã bɔdzya bábadɔ bagã tsitsi nabha, pɔ Abram ákaka balɛ ashɛ̃ nɔ.

12 Gɛ kiwiɛ kɛɛdɔɔ, Abram avɛnɔ taɖamɛ, kɛlɛ otumũ vĩĩ oku nɛ yɛabha. 13 Kidegba Apaleteɛ etseɖe yɛasɛ, "Ɛkɔ oti sɛ woeyialɛ ebedzi befù nɛ ɔma toli gɛ lotinu balɛ ɔyɛ mɛ, kɛlɛ baba lɔkɔ balɛ asɛ banɔ dzidzi kɛlɛ babakpɛ alɛ bɔtɔ agɔ akpã taalɛ̃. 14 Pɔ ɛbapɔ̃ batɔ̃ kɔ kɛmadiɛ gɛ babhɛtɛ alɛ asɛ banɔ dzidzi ana, kɛlɛ kidegbaa, bebè koeyi nɛ banɔesizazã mɛ kɛlɛ babashɛ nɛ balɛahwɛ mɛ bɔdɔ̃ gele. 15 Wɔ xɔnɔ ɔbɔ vɛ wɔ akaalɛ kepi nɛ ishu yɔyɔ mɛ kɛlɛ baba vɔbɔ wɔ nɛ wɔ tisheshè mɛ. 16 Nɛ bɔmɔ lɛlɛ̃ mɛ woeyialɛ ebetsodzi aba ɛkɛlɛ, ɔmɔsɛ Amorianɛ ebuikpa bhɛbhɛtɛ ekeku alɛ okukɔ.

17 Onupɛ kiwiɛ dɔ bekeɛ pɛ otumũ okuɔ, kitsikpi gɛ kifu ekoeyi nɛ kɛlɛ mɛ bagã bɔdzya bhubhui nɛishi. 18 Odenɔ kiwui ɛlɛ Apaleteɛ anyã olugbù nɛ̀ Abram kɛlɛ aɖɔ etseɖe yɛasɛ, "Eba lɔkɔ kesiakpa alɛ, odenɔ Egipte kelĩ gbagbla ɔdɛkpɛnɔ Yufratis kelĩ gbagbla ishu- 19 Kenaianɛ, Kenizianɛ, Kaɖmonianɛ, 20 Xitianɛ, Perizaianɛ, Refaianɛ, 21 Amorianɛ, Kanaianɛ, Gigashianɛ nɛ̀ Dzebusianɛ balɛ kesiakpa."