Kesikpɛkpɛ 19

Bezĩ Sodom nɛ̀ Gomora

1 Baxɔɛdɛ taabha edikú Sodom nɛ ɔwlagoɔ, gɛ Lɔt ezhyi azã kesi nɛ ɔmã gbagbala niedulũɔ. Kibeɛ gɛ amɔ balɛ, alɔ pɛ adɛ tsyana alɛ kɛlɛ ezhyini bamɛ ekumũ kesi akɔ alɛ. 2 Aɖɔ asɛ, "Mɛ apalete alɛ, ɛkpɛ kɛtakpu esi kɔ wɔnɔ, nɔvɛ wɔnɔ axɔɛdɛ bɔpamɛ. Nɔbɔ la wɔnɔ bɔtsɛɖɛkpɔ oplu tɛ nɔza elishiɛ tɛ nɔvɛ wɔnɔ kidzo gagã nabha nɛ kɛvɔlɔ plii.

Bebuiliulũ asɛ, "Oho, bɔbadɛza befù ɔtsɛkɔɔ."

3 Pɔ etũilɛ akpɛ balɛ ulũ gagalĩ asɛ bavɛ bɔpãmɛ aplinii. Atɔ bɔdɔ̃ kɔalɛ, apɔɛ abolo gɛ bagɛ kpɛ kɛdɔ̃ nyanyã nɛ yɛ mɛ, kɛlɛ batã. 4 Flogo tɛ badɛ wɔsɔ̃ kesiɛɛ, banyɛ nyɔ̃ɔ gɛede Sodom ɔmã gbagbla kampɛ kanyiaka-bunuvɔɛ nɛ̀ besheshè-bakpɛ kanà bɔpã. 5 Bekulu Lɔt asɛ, "Fakɔ banyɛ gɛ aba wɔkɔ oboɔ elishiɛ balɛ dza? Bu balɛ oyinɔ tɛ bɔwɔsɔ̃ naalɛ."

6 Lɔt ekoeyi avɛ ɔtɔ̃ɔ tɛ atsyɔà nalɛ kɛlɛ adã opupuɔ nɛ yɛedeɛ 7 kɛlɛ aɖɔ asɛ, "Oho, mɛɔbhialɛ. Nɔtɛ bhɛtɛ kɛtakpumɛ gagalĩ kibui ɛlɛ. 8 Noɖi, beyiadzɛ taabha gɛ betinyɛ anyɛ alɛ mɛahɔɛ. Nɔkɔ mɛgbana alɛ oyinɔ mana wɔnɔ, kɛlɛ nɔbɔlà bhɛtɛ kɛgɛ nɔpɛ nɛ̀ balɛ. Pɔ nɔtɛ bhɛtɛ kibui nanà ɔvɛnɔ banyɛ alɛ shu, ɔmɔsɛ babatsɛ nɛ mɛ ovutɔ esi."

9 Baɖɔ etseɖe yɛasɛ, "Fala nɛ kidzo mɛ ɔkɔ ɔlɔ." Kɛlɛ baɖɔ asɛ, "Anɔ alɛ aba ɛkɛlɛ asɛ efù ana, otsinɔ apɛ asɛ abhɛtɛ asɛ kebhuekulu yɛenu! Bɔbà tũkpɛ kɔwɔ dɛ balɛ." Bazã etũilɛ akpɛ Lɔt ulũ kɛlɛ bagã avɛ otugba asɛ tɛ bayɛɛ opupuɔ.

10 Pɔ banyɛ gɛazã kɛmɛɛ bakpɛ ɔhɔɛ anyanà Lɔt kɛlɛ betsinì yɛ amanà bɔpã mɛ kɛlɛ badã opupuɔ. 11 Balɔkɔ anhũ pupú ehu banyɛ gɛazã bɔpã niedulũɔ, bunuvɔɛ nɛ̀ besheshè tɛ batɛ mɔ kedulũɔ.

12 Banyɛ ebisi Lɔt asɛ, "Banɔ bhlatɔ teli aka alɛ wɔahɔɛ nɛ ɛkɛlɛ-wɔ awɔà, beyianyɛ pɛnɔsɛ beyiadzɛ, pɛnɔsɛ anɔkanyiaka gɛ alɛ ɔmã gbagbla mɛ gɛenu wɔ ayɛ dza? Bu alɛ oyinɔ nɛ ɛkɛlɛ, 13 ɔmɔsɛ bɔbàzĩ ɛkɛlɛ. Ozĩ kpɛkpɛ ɔvɛ Apaleteɛ ɔkɔ nɛ ɛkɛlɛ banɔnɔ shuɔ okpè afalanɔ ifú, kliso akpɛ bɔlɔ ɔsɛ tɛ bɔbazĩ ɔlɛ."

14 Kliso Lɔt ekoeyì pɛ adɛ ɖɔaɖɔ akɔ yɛawɔ̀a, gɛ beti bisi yɛ beyiadzɛ nɛtɔ asɛ bagbanà. Aɖɔ asɛ, "Nɔkɔ yɛatsɔ tɛ nokoeyi nɛ ɛkɛlɛ, ɔmɔsɛ Apaleteɛ evili bezĩ ɔmã gbagbla!" Pɔ yɛawɔ̀a eɖi asɛ ɔwɔfu.

15 Nɛ olizatɔ gɛɔbaa mɛɛ, baxɔɛdɛ etuilɛ akpɛ Lɔt asɛ, "Kɔ yɛatsɔ̀! Gbana wɔ edziniɛ nɛ̀ wɔ eyiadzɛ taabha gɛ alɛ ɛkɛlɛ, onu gɛnɛ anaa, babagbã wɔnɔ̃ tsyɛ akpɛ gɛ onupɛ bapɔ̃ batɔ̃ akɔ ɔmã gbagbla."

16 Gɛ kitiku yɛawɔ̃ɔ, banyɛ atahɔɛ nyanà yɛɔhɔɛ nɛ̀ yɛedziniɛ ahɔɛ ɔyɛ nɛ̀ yɛ beyìadzɛ taabha ɔyɛ kɛlɛ bagbana alɛ boeboeboe okoeyi nɛ ɔmã gbagbla mɛ, ɔmɔsɛ Apaleteɛ ebi alɛ ashagabui. 17 Gɛ anya gashu ebualɛ oyinɔ koɔ, balɛ anɔ tenikpo aɖɔ asɛ, "Nɔkɔ wɔnɔ tɛtsɛɖɛ tsɔ tɛ nɔobu wɔnɔ ɛkpã! Noti otsyina ɖi kide, kɛlɛ nɔtɛ wɔzã ɔkɔnanà nɛ kadadasiɛ mɛ! Nobu tɛtsɛɖɛ mɛ ɔvɛ beetu nabha onu gɛnanaa, babagbã wɔnɔ akpɛ!"

18 Pɔ Lɔt etseɖe balɛ asɛ, "Oho, mɛ apalete alɛ, ɛkɔ wɔnɔɛtakpu! 19 Wɔnɔ axɔɛdɛ amɔ tɛdɛdɛmɛ nɔ nɛ wɔnɔ bamɛ, kɛlɛ nɔkasɛ mɛ ɛyamɛ gbangbã gɛ nobu mɛkpã. Pɔ ɛtɛ balà bu tɛtsɛɖɛ mɛ ɔvɛ beetu nabha; kibui kpa ɛlɛ banyanã mɛ, kɛlɛ ɛbà tsí. 20 Noɖi, ɔmã toli nɔlɛ gɛ lotso ɔplɛnɔ bɔlɔ gɛ bɔbalà bu tɛtsɛɖɛ mɛ ɔvɛ, kɛlɛ lodzi bhlui tsyɛ. Kɔmɛ ibu tɛtsɛɖɛ vɛ ɔlɛ mɛ-lodzi bhlui piapi, kɛma ana dza? Kɛlɛ bebebu mɛkpã oyinɔ nɛ kɛlɛ mɛ."

21 Etseɖe yɛasɛ, "Abɔ ana, ɛba buidzo nɛ wɔ tibibisi ɛlɛ tsyɛ ishu kɔwɔ; ɛtɛ bayɛɛ ɔmã ɔlɛ ishu kibui gɛ ɔɖɔɔ. 22 Pɔ kɔ wɔ tɛtsɛɖɛ tsɔ vɛ ɛkɛlɛ, ɔmɔsɛ ɛtɛ balà kɛnanà bhɛtɛ ɔdɛkpɛnɔ sɛ odiku ɔlɛ mɛ." (Kliso pɛ bekulu ɔmã ɔlɛ asɛ Zoa gɛ kɛlɛ esi kɛlɛinu ɔsɛ ɔmã bhlui).

23 Tɛ kibeɛ gɛ Lɔt ediku Zoa bànáa, kiwuiɛ tibi nɛ kesiakpa nabha. 24 Kɛlɛ mɛ Apaleteɛ akɔ iɖù gɛ atã adɔ atɔɖɔ Sodom nɛ̀ Gomoɖa abha-odenɔ Apaleteɛ ɔkɔ nɛ owusoso nɔ mɛ. 25 Klisoɔ ayɛɛ ɛmã gbagbla ɛlɛ nyɔ̃ɔ nɛ kadadasiɛ, nɛ̀ bagɛ bazã ɛmã gbagbla mɛ-nɛ̀ kifutùɔ tsyɛ gɛzã kesiakpa mɛ. 26 Pɔ Lɔt yɛedzini eɖi kide, kɛlɛ etsyina edzì bɔmɔɛteɖe.

27 Kelizaza nɛvɔlɔ plii nɔ, Abraham alɔ pɛ etsyina avɛ ɛkɛlɛ gɛ azã nɛ Apaleteɛ namɛ. 28 Eɖi ezhyinɔ asisɛ Sodom nɛ̀ Gomoɖa, asisɛ kɛdasi kesiakpa nyɔ̃ɔ mɛ, kɛlɛ amɔ̃ ɔnyɔ̃ dodo gɛ lokoeyì blublublù odenɔ kesiakpa mɛ, asɛ ɔnyɔ̃ gɛ loode okoeyi nɛ ɔgbaa mɛ ana.

29 Klisoɔ gɛ Owusoso Akaa ezĩ kadadasi ɛmã gbagbla gɛzã, abaka Abraham, kɛlɛ ebu Lɔt denɔ kibui kpa gɛyɛɛ ɛmã gbagbla mɛ gɛ Lɔt azãa.

Lɔt nɛ̀ Yɛ Beyiadzɛ

30 Lɔt nɛ̀ yɛ beyiadzɛ bashɛ nɛ Zoa kɛlɛ bedibhui kazã nɛ beetuɔ mɛ, ɔmɔsɛ esi kifù sɛ tɛ azã Zoa. Yɛ nɛ̀ yɛ beyiadzɛ taabha bazã aklagbu ozĩ mɛ. 31 Kiwui tinikpo tili, eyiadzɛ shesheɛ etseɖe yɛada bhlui nɔ asɛ, "Bɔlɔ aka eshè, kɛlɛ anyɛ nanà ama kibe ɛlɛ gɛ abawɔsɔ̃ nɛ bɔlɔ, asɛ gɛ ɔkɔɔ ɔlɛ nɛ kesiakpa nyɔ̃ɔ abha. 32 Kɔ bɔkɔ bɔlɔ akaa bunù yɛawɔɛ tɛ bɔwɔsɔ̃ niyɛ tɛ buvũ bɔlɔ bɔpã kihui nɔ dzù ɔganà bɔlɔ akaa mɛ."

33 Elishi alɛ bakɔ balɛ akaa bunu yɛawɔɛ, kɛlɛ yɛeyiadzɛ shesheɛ avɛ adɛ wɔsɔ̃ niyɛ. Egitì kibe nɔnɔ gɛ adzɛ awɔsɔ̃ niyɛ pɛnɔsɛ kibe nɔnɔ gɛ adzɛ alɔ.

34 Kiwui bhalàa, eyiadzɛ shesheɛ etseɖe eyiadzɛ bhului nɔ asɛ, "Elishiɛ gɛ aba falaa, ɛwɔsɔ̃ nɛ̀ mɛaka. Kɔ bɔkɔɛ bunù tɛ ewuli awɔɛ oboɔ elishi, tɛ ɔvɛ ɔdɛ wɔsɔ̃ niyɛ tɛ buvũ bɔlɔ bɔpã kihui nɔ odzu ɔganà bɔlɔ akaa mɛ." 35 Klisoɔ, bakɔ balɛ akaa awɔɛ bunù elishi alɛ tsyɛ, kɛlɛ eyiadzɛ bhului nɔ avɛ adɛ wɔsɔ̃ niyɛ. Kɛlɛ tsyɛɛ, aza egitì kibeɛ gɛ adzɛɛ awɔsɔ̃ ni yɛ pɛnɔsɛ kibeɛ gɛ adzɛ alɔ.

36 Klisoɔ Lɔt yɛeyiadzɛɛ taabha emunu ɛya akɔ balɛ akaa. 37 Eyiadzɛɛ shesheɛ amɔ eyianyɛ, kɛlɛ akɔ yɛ kinye asɛ Muab; yɛenu akaa akɔ oboɔ Muabuanɛ. 38 Eyiadzɛ bhlui nɔ tsyɛ amɔ eyianyɛ, kɛlɛ akɔ yɛ kinye asɛ Bɛn-Ammi; yɛenu akaa akɔ oboɔ Amonianɛ.