1 Gɛ Yakɔb ebu bamɛ ewunɔ kabha, Esawu naalɛ gɛ aaba nɛ̀ yɛ banyɛ akpã taalɛ; kliso ebu beyiɛ mɛ akɔ Leya, Ratsɛl, nɛ̀ badzɛ axɔɛdɛ taabha. 2 Alɔkɔ badzɛ axɔɛdɛ nɛ̀ balɛ eyialɛ akpɛ otugba, pɛ otsi Leya nɛ̀ yɛeyialɛ, kɛlɛ Ratsɛl nɛ̀ Yosɛf azã kideɛ. 3 Yakɔb afala vɛ otugbaa pɛ edizhi ekumũ nɛ kesiakpa bɔtɛ tigegene gɛetso aplɛnɔ yɛadzaa.

4 Pɔ Esawu ebu tɛtsɛɖɛ mɛ adɛ tsyana Yakɔb pɛ evũ yɛakpɛ etemɛ; akpɛ ahɔɛ nɛ yɛoliɛ pɛ amɔkɔ̃ yɛolugbùɔ. Kɛlɛ bebi yoyo. 5 Kɛlɛ Esawu ebu bamɛ ewunɔ kabha pɛ amɔ̃ baadzɛ nɛ̀ beeyiɛ. Ebisi yɛasɛ, "Banɔ ɖuwoelu naalɛ nɛ wɔbhà?"

Yakɔb ebuiliulũ asɛ, "Balɛenu beeyiɛ gɛ Owusoso Akaa akɔ wɔaxɔɛdɛ ɔganà yɛanɔabha tiɖiɖi mɛ."

6 Kɛlɛ baadzɛ axɔɛdɛ nɛ̀ balɛ eyialɛ tsyɛ betso aplɛnɔ yɛ pɛ bezhyi ekumũ. 7 Balɛ edeɛ, Leya nɛ̀ yɛeyialɛ aba ezhyi ekumũ. Gɔgɔɛ nɔ, Yosef nɛ̀ Ratsɛl tsyɛ aba, kɛlɛ balɛ tsyɛ edizhi ekumũ.

8 Esawu ebisi yɛasɛ, "Baagã alɛ petee gɛ ɛɛmɔ̃ niesi sɛlɛ?"

Aɖɔ asɛ "Tɛ mɛmɔ̃ kɛwɔ̃ kuku nɛ wɔamɛ, mɛ apalete."

9 Pɔ Esawu ebuiliulũ asɛ, "Balɛ mɛtsyɛ ahɔɛ nɛ tikpekpe mɛ kukuuku, mɛadza. Balɛ̀ kɛgɛ lɛ wɔahɔɛ akɔ wɔ ishu."

10 Yakɔb ebuiliulũ asɛ, "Oho ɛkɔ wɔɛtakpu. Onupɛ ɛmɔ̃ kɛwɔ̀ kuku nɛ wɔanhũɔ mɛɛ, yɛkɛ bɔdɔ̃ kɔkɔ ɔlɛ odenɔ mɛahɔɛ mɛ. Ɔmɔsɛ tɛmɛ mɔ wɔamɛɛ edzi asɛ ɛɛmɔ̃ Owusoso Akaa namɛ, nɛ otsiɛ gɛ ɔyɛkɛ mɛ nɛ̀ ɛyamɛ. 11 Ɛkɔ wɔɛtakpu, yɛkɛ bɔdɔ̃ kɔkɔ ɔlɛ gɛ ɛmanà wɔ, ɔmɔsɛ Owusoso Akaa eɖi mɛ ashagabui kɛlɛ kɛkanyiaka gɛ ɛpɛnɔ lɛ mɛahɔɛ." Kliso gɛ Yakɔb ezetũilɛ akpɛ yɛulũɔ, Asawu abayɛkɛ.

12 Kɛlɛ Esawu aɖɔ asɛ, "Kɔ bɔtɔnɔ̃ bɔlɔ kidzo; ɛbakpɛ abhalà akɔ wɔ."

13 Pɔ Yakɔb etseɖe yɛasɛ, "Mɛ apaleteɛ enyi asɛ mɛeyialɛ eke shè, pɔ kɛlɛ ɔsɛ iɖi ibhoshidzɛ nɛ̀ banɛtsyɔɛdzɛ gɛ baakɔ̀ balɛ eyialɛ kɛmɔ̃ɔ nabha flogo. Onupɛ ɛlɔkɔ tɛgagalĩ gbanà alɛ nɛ kiwui tinikpo mɛɛ, bagãa petee ebetsí. 14 Klisoɔ, kɔ tɛ apaleteɛ eputɔ akɔ yɛaxɔɛdɛ, nɛ kibeɛ gɛ ɛɛgã kɛbɔɛbɔɛ nɛ̀ baagã gɛalɛ mɛ otugbãa nɛ̀ beeyiɛ tɛgagã nulũ, ɔdɛkpɛnɔ ɔsɛ idiku mɛ apeleteɛ ɔkɔ nɛ Sɛya."

15 Esawu aɖɔ asɛ, "Kɛlɛ kɔmɛ shɛnɛ ahɔɛ mɛ banyɛ teli shu kɔwɔ."

Yakɔb ebisi asɛ, "Pɔ kiɖe sopɛ ɔbɔ bhɛtɛ ana? Kɔmɛ mɔ kɛwɔ̃ kuku odenɔ mɛ apaleteɛ awuhũɔ mɛ."

16 Kliso kiwui ɛlɛ nabha Esawu akpɛ yɛidzo gagã niesi etsyina aba Sɛya. 17 Pɔɔ, Yakɔb xɔnɔ̃ afala avɛ Sukɔt, ɛkɛlɛ yɛadɛ bhɔ ɔzãkɔ akɔ yɛishu pɛ awɔá bɔgbà akɔ yɛ bagãa. Kliso pɛ bekulu ɛkɛlɛ asɛ Sukɔt.

18 Kidegba gɛ Yakɔb ede Paɖan Aram ebekuɔ, ediku Shikɛm gɛenu ɔmã gbagbala nɛ Kana piapi kɛlɛ ebhui kazã nɛ amã ɔlɛ ɔmɔkɔ nɔbhà. 19 Gɛ alɔkɔ sikãfufu kɛkpã zɛzɛɛ, edzi kesiakpa nɛ Xamɔ gɛ yɛamɔ Shikɛm yeyianyɛ alɛ ahɔɛ. Kesiakpa alɛ abha yɛedzu yɛ kɛpɔtɛ kagbaa. 20 Ɛkɛlɛ yɛedzu bɔdɔ̃pɔpɔɛ osubha gɛ akɔ ɔlɛinye asɛ Ɛl Elohi Israɛl.