1 Yosɛf avɛ editseɖe Faɖawo asɛ, "Mɛaka nɛ̀ mɛadza alɛ nɛ̀ balɛ bagãa azaa nɛ̀ banɛntsyɔɛ nɛ̀ kɛkanyiaka gɛlɛ balɛ ahɔɛ, bede Kana kesiakpa nabha kɛlɛ balɛ Gɔshɛn otsialɛ." 2 Ebu yɛadza alɛ ɔmaiyɛmɛ banɔ teeti kɛlɛ ebu balɛ akasɛ Faɖao.

3 Faɖao ebisi yɛadzyalɛ asɛ, "Kɛxɔɛ ɖuwoe awɔawɔa nɔonu?"

Bebuiliulũ akɔ Faɖao asɛ, "Wɔaxɔɛdɛ enu ibhoshi abha eɖiɖi elete asɛ kana gɛ bɔlɔ akalɛ tsyɛ azãa." 4 Betseɖe tsyɛ asɛ, bɔba sɛ tɛ bɔbazã ɛkɛlɛ kɛbɔɛ, ɔmɔsɛ bɔbhɛ dɔdɔ nulũ gagãlĩ nɛ Kana kɛlɛ tɛwɔa mã akɔ wɔaxɔɛdɛ yɛ baagã kɛzaa. Kliso otsiɛ nɔ, ɛkɔ wɔɛtakpu kɔ tɛ wɔaxɔɛdɛ ebhui kazã nɛ Gɔshɛn."

5 Faɖao etseɖe Yosɛf asɛ, "Wɔaka nɛ̀ wɔadza alɛ aba wɔkɔ, 6 kɛlɛ Egipte kesiakpa eli wɔamɛ; kɔ wɔaka nɛ̀ wɔadza alɛ batsɛ nɛ kesiakpa kalɛ ɔgbagbã ɔkɔ adɛ. Kɔ bazã Gɔshɛn. Kɛlɛ onyi balɛ mɛ ɔmaiyɛmɛ teli gɛ enyi kɛxɔ ɛlɛ piapii nɔ, lɔkɔ yɛodzu mɛ ibhoshi nulũ."

7 Kɛlɛ Yosɛf agbana yɛaka Yakɔb amana kɛmɛɛ kɛlɛ ebu yɛakasɛ Faɖao. Gɛ Yakɔb eyula akɔ Faɖao ebekeɛ, 8 Faɖao ebisi yɛasɛ, "Agɔ taashɛ wɔtɛŋã?"

9 Kɛlɛ Yakɔb etseɖe Faɖao asɛ, agɔ gɛ ɛgã kidzoɔ kɛkpã zɛzɛ nɛ̀ afɛata. Mɛ agɔ egi kpè kɛlɛ alɛ mɛ agagãlĩ, gɛ lagɛ shɔ nɛ̀ mɛakaalɛ kidzo gagã agɔɔ." 10 Kɛlɛ Yakɔb eyula akɔ Faɖao pɛ ashɛ nɛ yɛamɛ.

11 Kliso Yosɛf ebhui kazã akɔ yɛaka nɛ̀ yɛadzalɛ nɛ Egipte, kɛlɛ akɔ alɛ ahɔɛmɛ bɔdɔ̃ nɛ̀ kesiakpa kalɛ bɔbɔ olukɔɔ, nɛ Ramese kɛkɔtɔ mɛ asɛ gɛ Faɖao akpɛ ɛlɛ nɛ yɛulũɔ. 12 Yosɛf akɔ yɛaka nɛ̀ yɛadza alɛ nɛ̀ yɛakapã petee bɔŋaŋã tsyɛ nɛ balɛ eyialɛ tɛkakalà ulũ.

13 Bɔŋaŋã gɛzã, pɔ nɛ kɛkɔtɔ mɛ nyɔ̃ɔ nɔ bɔbhɛ dɔdɔ nulũ gagãlĩ, kɛlɛ Egipte nɛ̀ Kana banɔnɔ petee azhɔlɛ nɛ bɔbhɛ dɔdɔ shu so. 14 Yosɛf ayɛkɛ ehoeyiɛ petee gɛ babamɔ̃ nɛ Egipte nɛ̀ Kana akɔ kɛbhɛ babuia nɛ bɔdɔeyiɛ gɛ bezedziɛ, kɛlɛ alɔkɔ bɔlɛ amanà Faɖao yɛ bukusipãmɛ. 15 Gɛ Egipteanɛ nɛ̀ Kananɛ ehoeyiɛ ebeleɛ, Egipteanɛ petee aba Yosɛf ɔkɔ kɛlɛ baɖɔ asɛ, "Kɔ bɔlɔ bɔŋaŋã. Kiɖe sopɛ kɛlɛ ɔsɛ butsí nɛ wɔamɛ? Bɔlɔ ehoeyiɛ ebele."

16 Yosɛf aɖɔ asɛ, "Kɛɛlɛ́ nɔdɛ manà mɛ wɔnɔ kepi bagãa. Ɛbadɛ bɔŋaŋã akɔ wɔnɔ tɛ nɔlɔkɔ wɔnɔ kepi baagã ɔbuia kɛbhɛ nɔ, gɛ wɔnɔ ehoeyiɛ ebeleɛ." 17 Klisoɔ balɔkɔ balɛ kepi bagãa amanà Yosɛf kɛlɛ akɔalɛ bɔŋaŋã alɔkɔ atsaɖakɛ nɛ̀ balɛ basɔ nɔ, balɛ ibhoshiɛ nɛ̀ beepidzyaa, balɛ banɛntsyɔɛ nɛ̀ badikuɔ. Kɛlɛ agbanà alɛ afalanɔ nɛ kɛgɔ ɛlɛ mɛ nɛ̀ bɔŋaŋã gɛ alɔkɔ atsaɖakɛ nɛ̀ balɛ kepi bagãa petee.

18 Gɛ kɛgɔ ɛlɛ falaa, baba yɛɔkɔ kɛgɔ gɛkpatɔnɔ̃ ɛlɛ mɛ pɛ baɖɔ asɛ, "Bɔtɛ balà lɔkɔ kpũ bɔlɔ apaleteɛ asɛ odenɔ gɛ bɔlɔ ehoeyiɛ ebele kɛlɛ bɔlɔ kepi bagãa enu wɔayɛɛ, kɛdɔ̃ nanà gɛtɔ ɔkɔ bɔlɔ apalete ɔdɛ bɔlɔ ishudzyaa nɛ̀ bɔlɔ kesiakpa. 19 Kiɖe sopɛ kɛlɛ sɛ butsí nɛ wɔamɛ--bɔlɔ nɛ̀ bɔlɔ kesiakpa tsyɛ? Dzi bɔlɔ nɛ bɔlɔ kesiakpa tɛ ɔlɔkɔ tsaɖakɛ akɔ bɔŋaŋã, tɛ bɔlɔ nɛ̀ bɔlɔ kesiakpa azã ohokuimɛ ɔkɔ Faɖao. Kɔ bɔlɔ bɔdɔeyi tɛ bɔzã nɛkpã tɛ butitsí, tɛ kesiakpa atɛ bawɔ akpakpa."

20 Klisoɔ Yosɛf edzi kesiakpa petee nɛ Egipte akɔ Faɖao. Egipteanɛ akanyiaka, badɛ balɛ ayakpa ɔmɔsɛ bɔbhɛ dɔdɔ nulũ gagãlĩ kɔalɛ faanɔ. Kesiakpa ebedzi Faɖawo ayɛ. 21 Kɛlɛ Yosɛf abhɛtɛ banɔnɔ bedzi axɔɛdɛdɛ elete, odenɔ Egipte kampɛ tienikpo mɛ ɔvɛnɔ kabhlatɔ. 22 Pɔ, egidzì bakpukpudziɛ busiakpa xɔnɔ, ɔmɔsɛ baza yɛkɛ bɔŋaŋã kɔkɔ edenɔ Faɖawo ɔkɔ ɔmɔsɛ bamɔ̃ bɔŋaŋã gɛ bukpè odenɔ bɔŋaŋã kɔkɔ gɛ Farao akɔalɛ mɛ. Kliso pɛ bagɛ dɛ balɛ busiakpa.

23 Yosɛf etseɖe banɔnɔ asɛ, "Otsiɛnɔ gɛ idzi wɔnɔ nɛ̀ wɔnɔ busiakpa oboɔ akɔ Faɖawo, bɔdɔeyiɛ naalɛ akɔ wɔnɔ sɛ tɛ nɔlà alɛ ɔɖa nɛ kesiakpa. 24 Pɔ onupɛ bɔdɔ̃pɔpɔ̃ baa, nɔlɔkɔ bɔlɛ mɛ kampɛ̃ itiɛ akɔ Faɖawo. Bɔmpɛ tɔɔlɛ nɛ itiɛ mɛɛ, nɔbɔ là balɛ asɛ bɔdɔeyi akɔ wɔnɔ bayaa nɛ̀ bɔŋaŋã akɔ wɔnɔ ishu nɛ̀ wɔnɔ bɔpãa nɛ̀ wɔnɔ beyialɛ."

25 Baɖɔ asɛ, "Obu bɔlɔ ɛkpã. Tɛ bɔmɔ̃ awɔ̃kuku nɛ bɔlɔ apaleteɛ namɛ, bɔbazã ohokuimɛ akɔ Faɖawo."

26 Kliso Yosɛf akpɛ ɛlɛ asɛ ɔsha nɛ kesiakpa gɛalɛ Egipteɛ-kɛkanu ɔsha obuɔ-sɛ bɔdɔ̃pɔpɔ̃ bɔlɛ itiɛ bunu Faɖawo yɛ. Bakpukpudzi busiakpa yete bɔlɛ gɛidzi Faɖawo ɔyɛ.

27 Otsialɛ Israelianɛ batsɛ nɛ Egipte nɛ Gɔshɛn kɛkɔtɔ mɛ. Bamɔ bɔdɔ̃ akɔ ishu nɛ ɛkɛlɛ beyù pɛ bekpè atɔɖɔ gbi nɛ tɛkakalà mɛ.

28 Yakɔb azã Egipte agɔ kɛfɔ nɛ̀ tegegene, kɛlɛ yɛ ɛkpã agɔ azã kɛkpã zɛzɛ nɛ̀ afɛtaalɛ nɛ̀ tegegene. 29 Gɛ kibeɛ tsooba akɔ Israel tɛ etsíɛɛ, ekulu yɛeyianyɛ Yosɛf kɛlɛ etseɖe yɛasɛ, "Onupɛ ɛmɔ̃ awɔkuku nɛ wɔ anhũɔ mɛɛ, lɔkɔ wɔ ɔhɔɛ kpɛ mɛ kɛtsɛɖɛta niesi, tɛ ɔɖɔ kibui olu ɔsɛ, ɔbɔ kasɛ mɛ ɛyamɛ gbangbã nɛ̀ kibui abha tɛbhɛbhɛtɛ. Tɛ vɔbɔ mɛ nɛ̀ Egipte, 30 pɔ onupɛ ɛvɛ baaka ɔkɔɔ, tuku mɛ okoeyi nɔ nɛ Egipte tɛ ɔdɛ vɔbɔ mɛ nɛ ɛkɛlɛ gɛ bavɔbɔ balɛ."

Ebuiliulũ asɛ, "Ɛba bhɛtɛ asɛ kana gɛ ɔɖɔɔ.

31 Aɖɔ asɛ, "Tanà bɔdɔ̃ kɔmɛ." Kɛlɛ Yosɛf atanà bɔdɔ̃ akɔɛ, kɛlɛ Israel abhɛtɛ kɛtakpuesi kpɛkpɛ gɛ akpà atɔɖɔ osivuvũɔ nabha.