1 Otsialɛ Abraham ebeshè gɛ yɛagɔ avɛ otugbà, kɛlɛ Apaleteɛ eyulà akɔɛ nɛ kidzò kanyiaka abha. 2 Etseɖe ekusi axɔɛdɛ nɛ bɔpãmɛ, anɔ gɛ yɛalɛ bɔdɔ̃ petee gɛlɛ yɛahɔɛ nulũɔ asɛ, "Kpɛ wɔ ɔhɔɛ nɛ mɛ kɛtsɛɖɛta niesi. 3 Ɛpɛ sɛ tɛ ɔlɔkɔ Apaleteɛ, gɛenu kitití Owusoso Akaa nɛ̀ kesiakpa abha Owusoso Akaa yɛinyeɛ ɔtanà bɔdɔ̃ nɔ sɛ, ɔtɛbɔ gbanà adzɛ ɔkɔ mɛeyianyɛ odenɔ Kana beyiadzɛ gɛ balɛ ishi mɛkpasɛ mɛ, 4 pɔ ɔbɔvɛ mɛ kɛmadiɛ mɛ gɛ ideɛ nɛ mɛeshopo alɛ mɛ tɛ ɔdɛ gbanà adzɛ ɔkɔ Isak."

5 Axɔɛdɛ ebisi yɛasɛ, "Pɛ adzɛɛ atɛapɛ asɛ ababa nimɛ gɛ onupɛ itsodzi ba kesiakpa alɛ nabha xɔ̃ɔ? Idzinɔ wɔeyianyɛ vɛnɔ kesiakpa gɛ kalɛ abha wodeɛ dza?"

6 Abraham aɖɔ asɛ, "Ɖi kɛlɛ ɔkɔ sɛ ogìdzìnɔ mɛeyianyɛ ɔvɛnɔ ɛkɛlɛ. 7 Apalete Owusoso Akaa gɛede kititíɛ, anɔ gɛ yɛebumɛ eyinɔ nɛ mɛakaa bɔpã mɛ, nɛ̀ kesiakpa gɛ kalɛ abha mɛideɛ mɛ, anɔ gɛ yɛaɖɔaɖɔ nɛ mɛ pɛ atɔɖɔ kibui elu akɔ mɛ odenɔ bɔdɔ̃ tatanã mɛ pɛ aaɖɔ asɛ, 'Wɔeyialɛ mɛ balɔkɔ kesiakpa alɛ akɔ'-abakpɛ yɛaxɔɛdɛ asɛsɛ kpɛ wɔotugbà tɛ ɔbɔmɔ̃ adzɛ ɔkɔ mɛeyianyɛ odenɔ ɛkɛlɛ́. 8 Onupɛ adzɛ agɛpɛ asɛ aba aplɛnɔ wɔɔ, kɛlɛ́ mɛɔdɔ̃ tatanà ɛlɛ baboele nɛ wɔ shu. Kɛgɛ ɛpɛ yete kɛlɛinu ɔsɛ titsyina mɛeyianyɛ ɔvɛnɔ ɛkɛlɛ́." 9 Kliso axɔɛdɛ akpɛ ɔhɔɛɛ nɛ yɛapalete Abraham yɛtsɛɖɛta niesi kɛlɛ atanà bɔdɔ̃ akɔɛ nɛ kibui ɛlɛ shu.

10 Kɛlɛ mɛ axɔɛdɛ alɔkɔ yɛapaleteɛ kipusɔ lɔfɔ pɛ ashɛ, gɛ alɔkɔ bɔdɔ̃ gbangbã ediedi odenɔ yɛapaleteɛ ɔkɔ evũnɔ. Atɔnɔ kidzo avɛ Aram Naharaim, kɛlɛ afala ediyì nɛ Nahɔ ɔmã mɛ. 11 Akɔ kipusɔ nɔ edzu ekuisi esi nɛ bulĩ ozĩɛ gɛɔlɛ ɔmã niedeɛ shu; ɔwlago ɔvɛlɛ na, nɛ kibeɛ gɛ badzɛ ekoeyi edishi bulĩɛ.

12 Kɛlɛ ekulu Owusoso Akaa asɛ, "Oo, Apaleteɛ gɛenu mɛapãka Abraham yɛ Owusoso Akaa, kɔmɛ kidzoɔ tɛpɛpɛ̃ obuɔ, tɛ ɔbhɛtɛ ɛyamɛ gbangbã ɔkɔ mɛapãka Abraham. 13 Ɖi, ɛlɔɛtiti nɛ bulĩ ɛlɛ gɛ bude koeyi nɛ tisiɛ mɛ shu, kɛlɛ beyiadzɛ gɛenu ɔmã mɛ eyiɛ aaba ebeshi bulĩɛ. 14 Kɔ kɛba ɛlɛ mɛ ɔsɛ onupɛ itseɖe adzɛnuvɔɛ teli sɛ, 'Ɛkɔ wɔɛ takpu, zhyini wɔ ketsukpu niesi tɛ mɛwɔ̃ɛ wɔliɛ tuliɛ,' pɛ aɖɔ asɛ, 'Wɔɛ, kɛlɛ ɛbakɔ wɔ kipusɔ nɔ tsyɛ'-kɔ yɛedzi anɔgɛ yɛ wobu ɔkɔ wɔaxɔɛdɛ Isak. Ɔganà kibui ɛlɛ nabha, ɛbatì ɔsɛ ɔbhɛtɛ ɛyamɛ gbangbã ɔkɔ mɛapaleteɛ."

15 Xego tɛ ebekulu Owusoso Akaa ebekeɛ, Rebeka ekoeyi aba nɛ̀ yɛetsukpuɔ nɛ yɛ owũdɔɔ. Yɛedzì Betuɛl gɛedzì Milka yɛeyianyɛ yɛeyi adzɛnuvɔɛ, gɛedzi Abraham yɛadza Nahɔ yɛedzini. 16 Adzɛnuvɔɛ nɔ eyi bubite, kebite gɛetinyi anyɛ; anyɛ nanà akawɔsɔ̃ nɛ̀ yɛeɖi. Ezhyi avɛ bulĩɛ gɛ bukoeyì nɛ tisiɛ mɛ shu, eshi bulĩɛ eyukù yɛ ketsukpuɔ mɛ pɛ etsyina aba.

17 Axɔɛdɛɛ ebu tɛtsɛɖɛ mɛ pɛ adɛ tɔnɔ yɛ pɛ aɖɔ asɛ, "Ɛkɔ wɔɛtakpu, kɔmɛ wɔ ketsukpumɛ bulĩ nɛbɔɛ."

18 Adzɛnuvɔɛ nɔ aɖɔ asɛ, "Mɛapalete, wɔ̃ɛ," kɛlɛ ezhyini ketsukpu niesi akpɛ yɛhɔɛ mɛ odunũ ɔlɛ kɛlɛ akɔɛ bulĩ.

19 Gɛ akɔɛ bulĩɛ yɛawɔ̃ɛ ebekeɛ, adzɛnuvɔɛ nɔ aɖɔ asɛ, "Ɛbàshi kɔ wɔ kipuasɔ nɔ tsyɛ bawɔɛ ɔvɛnɔ ɔsɛ bawɔɛ ebeke." 20 Kliso tsiɔ̃ ɔlɛ koɔ, etsyina bulĩɛ akpɛ kedzrepeɛ mɛ kɛlɛ ebu tɛtsɛɖɛ mɛ avɛ bulĩ oziɛ shu pɛ ewuli edishi bukpè pɛ abakɔ kipuasɔ nɔ tsyɛ petee bawɔ̃ɛ. 21 Nɛ kaɖɔ maɖɔmaɖɔ mɛɛ, anyɛ elu awɔ̃ eɖi kpakpamii tɛ etì asɛ Apaleteɛ abhɛtɛ yɛidzo gagãa mɛ sɛ kɛpɛ̃ pɛnɔsɛ kɛgɛ pɛ.

22 Gɛ kipuasɔ nɔ awɔ̃ɛ bulĩɛ ebekeɛ, anyɛ ebu kɛnyɔtɔ̃ sikãdzadzã kisikpɛ, gɛ kɛlɛ bupu mɛ bazã asɛ pɔ̃ɔ zɛzɛ ana nɛ̀ sikãdzadzã kahɔkpɔ kabhɛ gɛ kalɛ bupumɛ bazã asɛ pesewa lɔfɔ anà. 23 Kɛlɛ ebisi asɛ, "Afana yɛeyiadzɛ wɔonu? Ɛkɔwɔ kɛtakpu sɛ tɛ otseɖe mɛ, buvũ lɛ wɔakaa ahɔɛ nɛ bɔpãmɛ gɛ bɔbamɔ̃ ɔzakɔ elishi alɛ dza?"

24 Ebuiliulũ akɔɛ asɛ, "Betuɛl yɛeyiadzɛ mɛinu, eyianyɛ gɛ Milka amɔ́ akɔ Nahɔ." 25 Kɛlɛ aɖɔ aplɛnɔ asɛ, "Tɛwɔ̀a kpakpáa nɛ̀ baagã bɔŋaŋã gelee alɛ bɔlɔ ahɔɛ nɛ̀ buvũ tsyɛ kɔ wɔnɔ tɛ nɔza nɛ elishiɛ."

26 Kɛlɛ mɛ anyɛ ezhyi ekumũ pɛ akpɛ kɛtakpuiesi akɔ Apaleteɛ, 27 pɛ aaɖɔ asɛ, "Nɔkpɛ Apaleteɛ yɛinye nɛitití, mɛ apalete Abraham yɛ Owusoso Akaa, anɔ gɛ agɛ shɛnɛ ahɔɛ yɛ ɛyamɛ gbangbã nɛ̀ kibui abha tɛbhɛbhɛtɛ shu ɔkɔ mɛ apalete Abraham. Mɛxɔnɔɔ, Apaleteɛ agbanà mɛ nɛidzo gagã nabha ɔvɛnɔ mɛ apaleteɛ yɛeshopo alɛ ɔkɔ."

28 Adzɛnuvɔɛ nɔ ebu tɛtsɛɖɛ mɛ avɛ yɛelĩ bɔpãmɛanɛ ɔkɔ pɛ editseɖe alɛ ebui alɛ. 29 Otsinɔ, adzya teli azã Rebeka ahɔɛ gɛ bekulu asɛ Laban, kɛlɛ ebú tɛtsɛɖɛ mɛ tsiɔ̃ ɔlɛ ekoeyi avɛ anyɛ nɔbhà nɛ bulĩɛ gɛide okoeyi nɛ tisiɛ mɛ ɔbhà. 30 Odunũ ɔlɛ gɛ amɔ̃ kɛnyɔtɔ̃ sikãkisikpɛ nɔ nɛ̀ sikãkadzã kabhɛ nɛ yɛada kahɔkpɔ, pɛ etilũ kɛgɛ Rebeka etitseɖe yɛ nɛ kibuiɛ gɛ anyɛ etseɖe yɛ shu soɔ, avɛ anyɛ ɔbhà kɛlɛ amɔ yɛ gɛ alɔɛtití nɛ kipuasɔ nɔ balɛ ɔbhà nɛ bulĩɛ gɛ bukoeyi nɛ tisiɛ mɛ shu. 31 Aɖɔ asɛ, "Ba, wɔ anɔ gɛ Apaleteɛ eyulà akɔ. Kiɖeso pɛ oli kitití nɛ ɛkɛlɛ ana? Iti woese bɔpãmɛ lu, nɛ̀ ɔzãkɔ akɔ wɔ kipuasɔ nɔ."

32 Kliso anyɛ avɛ bɔpãmɛ, kɛlɛ batsɛ etukuɔ nɛ kipuasɔ nabha. Balɔkɔ tɛwɔ̀a kpakpa nɛ̀ bagã bɔŋaŋã amanà kipuasɔ nɔ, nɛ̀ bulĩ kɔ yɛ nɛ̀ banyɛɛ gɛ balɛ yɛ kedeɛ tɛ bepulu balɛ bɔtsɛɖɛkpɔ. 33 Kɛlɛ bedzù bɔŋaŋã nɛ yɛotugbaa, pɔ aɖɔ asɛ, "Ɛtɛbà ŋã bɔdɔ̃ ɔdɛkpɛnɔ gɛ itseɖe wɔnɔ kɛgɛ lɛ mɛahɔɛ sɛ mɛɖɔ." Laban aɖɔ asɛ, "Kɛɛlɛ́ tseɖe bɔlɔ."

34 Kliso aɖɔ asɛ, "Abraham yɛaxɔɛdɛ mɛinu. 35 Apaleteɛ eyulà akɔ mɛ apaleteɛ gelee, kɛlɛ ebedzì ehoeyi elete. Akɔɛ ibhoshì nɛ̀ banɛntsyɔɛ, sikãfufu nɛ̀ sikãdzadzã, banyɛ axɔɛdɛ nɛ̀ badzɛ axɔɛdɛ, nɛ̀ kipuasɔ nɛ̀ badiku. 36 Mɛ apaleteɛ yɛedzini Sara amɔ́ eyianyɛ akɔɛ nɛ yɛ tisheshè mɛ, kɛlɛ alɔkɔ kɛkanyiaka gɛlɛ yɛahɔɛ akɔ yɛ. 37 Kɛlɛ mɛ apaleteɛ akɔ mɛ tanã bɔdɔ̃ pɛ ɛɖɔ ɔsɛ, 'Kɛma ɔsɛ ɔgbanà adzɛ ɔkɔ mɛeyianyɛ odenɔ Kana beyiadzɛ mɛ, gɛ balɛ kesiakpa nabha mɛ lɛɛ mɛ, 38 pɔ, vɛ mɛaka beshopoɔ alɛ ɔkɔ nɛ̀ yɛ kigbogbo nɛishi tɛ ɔdɛ gbana adzɛ ɔkɔ mɛeyianyɛ.'

39 "Kɛlɛ ibisi mɛ apaleteɛ ɔsɛ, 'Kiɖe mɛbhɛtɛ onupɛ adzɛ agɛ dɛmɛ asɛ abà aplɛnɔ mɛ?'

40 "Ebuiliulũ asɛ, 'Apaleteɛ gɛ yɛamɛ mɛgãa, abakpɛ yɛaxɔɛdɛ aplɛnɔ wɔ kɛlɛ abakɔ asɛ wɔ kidzo gagãa babà ɛlɛ mɛ, sɛ tɛ ɔmɔ adzɛ ɔgbanà ɔkɔ mɛeyianyɛ odenɔ mɛahɔɛ kigbogboɔ mɛ, nɛ̀ mɛaka yɛishopo alɛ mɛ. 41 Kɛlɛ, ɔvɛ mɛ kigbogboɔ mɛɛ, bebè boele wɔ nɛ mɛ tɛtatanã mɛ kɛlɛ onupɛ kɛba ɛlɛ mɛ ɔsɛ bagɛ lɔkɔ adzɛɛ akɔwɔ tsyɛɛ-bebè boele wɔ nɛ mɛ tɛtatanà mɛ.'

42 "Gɛ ɛba bulĩɛ gɛide tisiɛ mɛ koeyì shu obuɔ, ɛɖɔ ɔsɛ, 'O Apalete, mɛ apalete Abraham yɛ Owusoso Akaa, onupɛ ɔdɛmɛɛ, ɛkɔ wɔɛtakpu, kɔ kɛgɛ kɛlɛ shu sopɛ ɛgã kidzoɔ pɛ̃ kɔmɛ. 43 Ɖi, ɛlɔɛtití nɛ bulĩ gɛikoeyi nɛ tisiɛ mɛ shu; onupɛ adzɛnuvɔɛ teli ekoeyi asɛ ebeshi bulĩ pɛ itseɖe yɛɔsɛ, "Ɛkɔ wɔɛtakpu kɔmɛ wɔ ketsukpu mɛ bulĩɛ tuli," 44 kɛlɛ onupɛ aɖɔ etseɖe mɛ asɛ, "Wɔ̃ɛ, tɛ mɛishi akɔ wɔ kipuasɔ nɔ tsyɛ bawɔ̃ɛɛ," kɔ yɛedzì agɛ yɛ Apaleteɛ ebu akɔ mɛ apaleteɛ yɛeyianyɛɛ.'

45 "Flogo tɛ ɛyɔlɔ Owusoso Akaa tikukluɔ nɛ mɛ kituɔ mɛɛ, Rebeka ekoeyi aba, gɛ yɛ ketsukpuɔ etsiɖì yɛ owũdɔ. Ezhyi avɛ bulĩɛ gɛ bukoeyì nɛ tisiɛ mɛ shu kɛlɛ edishi bulĩ, kɛlɛ itseɖe yɛɔsɛ, 'Ɛkɔ wɔɛtakpu, kɔmɛ bulĩ tɛ mɛwɔ̃ɛ.'

46 "Ezhyini yɛ ketsukpu niesi tsiɔ̃ ɔlɛ odenɔ yɛ owũdɔ pɛ aɖɔ asɛ, 'Wɔ̃ɛ, tɛ mɛkɔ wɔ kipuasɔ nɔ tsyɛ.' Kliso gɛ ɛwɔ̃ɛ, akɔ mɛ kipuasɔ nɔ tsyɛ.

47 "Ibisi yɛɔsɛ, 'Afana yɛeyiadzɛ wɔonuɔ dza?'

"Aɖɔ asɛ, 'Betuɛl, Nahɔ yɛeyianyɛ gɛ Milka amɔ̃ akɔɛ yɛeyiadzɛ mɛinu.'

"Kɛlɛ ɛkpɛ kisikpɛ nɔ ɔkɔɛ nɛ kɛnyɔtɔ̃, pɛ ɛlɔkɔ kahɔkpɔ kabhɛ akpɛ yɛhɔɛɛ, 48 kɛlɛ mɛizhyi kumũ pɛ ɛkpɛ Apaleteɛ kinyeɛ nɛitití. Ɛkpɛ Apaleteɛ, mɛ apalete Abraham yɛ Owusoso Akaa nɛinye nɛitití, agɛ yɛagbana mɛ nɛidzo gbangbã nabha pɛ ɛbamɔ̃ mɛ apalete Abraham yɛadzya yɛeshui yɛeyi adzɛnuvɔɛ akɔ yɛeyianyɛ. 49 Otsiɛ nɔ onupɛ ɔ́bɔ kasɛ ɛyamɛ gbangbã nɛ̀ kibui abha tɛbhɛbhɛtɛ ɔkɔ mɛ apaleteɛ, tseɖe mɛ; onupɛ ɔtɛbɔ bhɛtɛ ana tsyɛɛ, tseɖe mɛ, tɛ mɛitì kidzo nɔnɔ gɛ ɛbalɔkɔ."

50 Laban nɛ̀ Betuɛl ebuiliulũ asɛ, "Apaleteɛ ɔkɔ kibui ɛlɛ de; bɔza la kɛnanà tseɖe wɔnɔ nɛ kidzo nanà abha. 51 Rebeka naalɛ; gbanà yɛ tɛ ɔshɛ, tɛ ɔkɔ yɛedzi wɔapaleteɛ yɛeyianyɛ yɛedzinì, asɛ kidzoɔ gɛ Apaleteɛ akasɛ."

52 Kibeɛ gɛ Abraham yɛaxɔɛdɛ elũ kibuiɛ gɛ baɖɔɔ, ezhyi ekumũ kesiakpa akɔ Apaleteɛ. 53 Kɛlɛ axɔɛdɛ ebu sikãdzadzã nɛ̀ sikãfufu bɔdɔ̃ɔ eyinɔ, ɔplɛnɔ bakpɛkpɛ ediedi pɛ alɔkɔ akɔ Rebeka; azalɔkɔ bɔdɔ̃ gɛ yɛkɛ kedzi akɔ yɛadzya nɛ̀ yɛelĩɛ tsyɛ. 54 Kɛlɛ yɛ nɛ banyɛ gɛazã yɛɔbhà baŋã pɛ bawɔ̃ɛ pɛ baza elishiɛ nɛ ɛkɛlɛ. Gɛ balɔ kelizaza mɛ, aɖɔ asɛ, "Nɔkpɛ mɛidzo tɛ mɛvɛ mɛ apaleteɛ ɔkɔ."

55 Pɔ Rebeka yɛadzya nɛ̀ yɛelĩɛ ebuiliulũ asɛ, "Kɔ tɛ adzɛnuvɔɛ nɔ azã bɔlɔ ɔbhà asɛ ewui lɔfɔ pɛnɔsɛ kibe ana, flogo tɛ nɔshɛ."

56 Pɔ etseɖe alɛ asɛ, "Nɔtɛ vũmɛ odzù otsiɛ gɛ Apaleteɛ atɛkɔ mɛidzoɔ pɛ̃. Nɔkpɛ mɛidzo tɛ mɛvɛ mɛ apaleteɛ ɔkɔ."

57 Kɛlɛ baɖɔ asɛ, "Nɔkɔ bukulu adzɛnuvɔɛ nɔ tɛ bubisi yɛ kibui nɛ kɛlɛ shu oɖi." 58 Kliso bekulu Rebeka kɛlɛ bebisi yɛasɛ, "Wɔnɛ anyɛ alɛ ɔbɔshɛ dza?"

Aɖɔ asɛ, "Ɛbavɛ." 59 Kliso bakpɛ balɛ ada Rebeka kidzo ɔplɛnɔ agɛ yɛeɖi yɛabha nɛ̀ Abraham yɛaxɔɛdɛ nɛ̀ yɛ banyɛ. 60 Kɛlɛ beyulà akɔ Rebeka pɛ betseɖe yɛasɛ,

Bɔlɔ ada, kpè tɔɖɔ

vɛnɔ ihotu ɔdɛ tɔɖɔ ihotu abha;

tɛ wɔeyi mɔmɔ alɛ aŋã

bagɛ atɛaɖɔ wɔ nabha."

61 Kɛlɛ Rebeka nɛ̀ bagɛ eɖi yɛabha babalɛ pɛ bewu eku balɛ kipusɔ nabha aplɛnɔ anyɛ. Kliso axɔɛdɛ agbanà Rebeka kɛlɛ ashɛ.

62 Otsinɔ Isak ede Biɛɛ Lahai Rɔi, ɔmɔsɛ azã Nɛgɛv oxui kesiakpa mɛ. 63 Ekoeyi ɔwlago tenikpo avɛ ayakpa mɛ tɛ adɛnyɔ̃ yɛishu mɛeɖi, kɛlɛ gɛ ebu bamɛ ewunɔ kabhaa, amɔ kipuasɔ gɛ beetsò aaba. 64 Rebeka tsyɛ ebu bamɛ ewunɔ kabha kɛlɛ amɔ̃ Isak. Ezhyi nɛ yɛ kipusɔ nabha 65 kɛlɛ ebisi axɔɛdɛ asɛ, anyɛ ɖuwoe naalɛ gɛ akpasɛ ayakpa mɛ pɛ aba atsyana bɔlɔ dza?"

Axɔɛdɛ ebuiliulũ akɔɛ asɛ, "Yɛenu mɛ apaleteɛ." Kliso alɔkɔ yɛ bamɛ kɛpɔtɛ adã yɛishuɔ.

66 Kɛlɛ axɔɛdɛ etseɖe Isak ebuiɛ petee gɛ abhɛtɛ. 67 Isak agbanà Rebeka avɛnɔ yɛelĩ Sara kɛpɔtɛ kagbaa mɛ, kɛlɛ agbanà yɛ. Kliso edzì yɛedzinì, kɛlɛ adɛmɛ yɛibui; kɛlɛ Isak amɔ ishumɛ dɔdɔ nɛ yɛelĩ butsí niede.