1 Pɔ Owusoso Akaa abakà Noa nɛ̀ ayakpamɛ baagã nɛ̀ kepi bagã gɛazã yɛɔbha nɛ aɖaka nɔ mɛ nɛibui, kɛlɛ asɛsɛ kɛlɛɛ nɛ kesiakpa nabha kɛlɛ bulĩkekpuɔ batsì. 2 Otsi tisi mɛ bulĩɛ nɛ̀ kitití budekelĩ budulũɔ ulũ badã, kɛlɛ subha ayɔlɔ tɛdɔdɔ odenɔ kɛlɛɛ nɔ mɛ. 3 Kɛbɔɛbɔɛ bulĩɛ batsì nɛ kesiakpa nabha. Nɛ ewui alafa zɛzɛ nɛ̀ afɛeti edeɛ, buliɛ bazhyi kesi, 4 kɛlɛ nɛ kiwui gegenemiɛ nɛ woele gegenemiɛ nabhaa, aɖaka nɔ abadɔ Aɖaɖat beetu nabha. 5 Bulĩɛ odenɔ titsitsì abha ɔvɛnɔ woele lɔfɔ mɛ, kɛlɛ nɛ kiwuiɛ gɛiputɔ nɛ woele lɔfɔ mɛɛ, bakpà beetu nabha mɔ.

6 Nɛ ewui afɛtaalɛ edeɛ, Noa adalɛ fɛsrɛ nɔ gɛ ebu nɛ aɖaka nɔ shuɔ 7 kɛlɛ ebu kipleke asɛsɛ, kɛlɛ ezepruru pɛ avɛ pɛ aba ɔvɛnɔ ɔsɛ gɛ bulĩɛ batsì nɛ kesiakpa nabha. 8 Kɛlɛ sɛsɛ abronimɛ tɛ̀ etì asɛ bulĩɛ titsì beke nɛ kesiakpa nabha dza. 9 Pɔ gɛ abronimɛ nɔ agɛmɔ ɔkɔ nanà tɛ̀ edzu yɛtsɛɖɛ, ɔmɔsɛ bulĩɛ yukù kesiakpa petee abha, klisoɔ etsyina aba Noa ɔkɔ nɛ aɖaka nɔ mɛ. Akpɛ yɛɔhɔɛ asɛsɛ pɛ anyanà abronimɛ nɔ kɛlɛ edzinì yɛ amanà yɛɔbhà nɛ aɖaka ohu nɔ mɛ. 10 Noa azã epo ewui tegegene aplɛnɔ, kɛlɛ aza sɛsɛ abronimɛ nɔ odenɔ aɖaka nɔ mɛ. 11 Gɛ abronimɛ nɔ etsyina aba yɛɔkɔ nɛ ɔwlagoɔ mɛɛ, bɔbɔ busi kɛwɔlakpa gɛ bapɔ̃ avɔvɔɔ azã yɛolugbùɔ mɛ! Ɛkɛlɛ Noa ebetì asɛ buliɛ titsì beke nɛ kesiakpa nabha. 12 Azã epo ewui tegegene aplɛnɔ kɛlɛ ewuli aza sɛsɛ abronimɛ nɔ, pɔ kibelɛ xɔnɔɔ egetsyina aba yɛɔkɔ.

13 Nɛ kiwuiɛ gɛiputɔ nɛ woele nɔ gɛeputɔ nɛ Noa yɛagɔ alafa teehlo nɛ̀ toliɛ nabhaa, buliɛ tsì nɛ kesiakpa nabha. Kɛlɛ Noa akpà bɔdɔɔ̃ gɛ alɔkɔ edere aɖaka ohuɔ mɛɛ ɛkɛlɛ yɛamɔ asɛ kesiakpa nabha atɛ kpaá. 14 Nɛ woele bhalaa yɛ ewui afɛtaabha nɛ̀ tegegene nabhaa, kesiakpa petee abha aba kpaá.

15 Kidegbaa, Owusoso Akaa etseɖe Noa asɛ, 16 "Koeyì nɛ aɖaka ohuɔ mɛ, wɔ nɛ̀ woedzini, wɔ beyianyɛ nɛ̀ balɛ edzini alɛ. 17 Bu ɛkpã baagã kanyiaka gɛ alɛ wɔbha oyinɔ-bɔzhɔɛ nɔ, baagã nɛ̀ baagã petee gɛetsì nɛ kesiakpa nabha-sɛ tɛ beyuku nɛ kesiakpa nabha tɛ bamɔ be eyi tɛ bekpè atɔɖɔ."

18 Kliso Noa ebekoeyì aplɛnɔ yɛedziniɛ nɛ̀ yɛ beyianyɛ nɛ̀ balɛ edzini alɛ. 19 Baagã petee nɛ̀ baagã gɛetsì nɛ kesiakpa nabha nɛ̀ bɔzhɔɛ nɔ tsyɛ petee-kɛkanyiaka gɛ kɛɛgã nɛ kesiakpa nabha-koeyì nɛ aɖaka ohuɔ mɛ, nɛ balɛ ediedi mɛ.

20 Kɛlɛ Noa abhɔ bɔdɔ̃ pɔpɔɛ osubha akɔ Apaleteɛ, kɛlɛ gɛ alɔkɔ baagã nɛ̀ bɔzhɔɛ nɔ gɛ balɛ ishu bhuiɛɛ, abhɛtɛ bɔdɔ̃ pɔpɔɛ nɛ osubha nabha. 21 Apaleteɛ elukũ tɛlɔlɔ̃ huhuhuɔ kɛlɛ aɖɔ nɛ yɛ kitúɔ mɛ asɛ: "Kɛza baɛlɛ mɛ oɖi ɔsɛ ɛbaɖɔ kibui ɔkpɛ kesiakpa oɖi nɛ anɔdzrame ɛtakpu, gɛ yɛ kitemɛ tɛtɔtɔɖɔ kɛkanyiaka kinu kibui zizĩ odenɔ yɛinuvɔbe xɔnɔ pɔ. Kɛlɛɛ ɛzaka bu baagã petee gɛ alɛ nɛkpã balɛ ɛkpã oyinɔ oɖi, asɛ gɛ ɛbhɛtɛ ana.

22 "Gɛ kesiakpa anyã lɛ koɔ,

kɛdɔ̃ɛ ɖabe nɛ̀ kɛdɔ̃ ɛpɔ̃ kibe,

tɛyɔyɔ nɛ̀ kɛkpɛkpɛ,

ekpé nɛ̀ ekukù,

kelizaza nɛ̀ elishi

batɛ bazɔkɔ yɔlɔ eɖi."