Arca de noé
A arca de Noé é história de salvação e fidelidade. Deus instruiu Noé a construir a arca para salvar sua família e os animais do dilúvio — exemplo supremo de obediência e fé.
Aba lariñagun lun Noé:
—Nagumuchaguagüdaaña sun gürigia, gíbeti anarimeni ubouagu hádangiñeti, nagumuchaguagüdaaña lubeiti labu sun ubóu. Dáguaba aban ugunei lautu fulansu buiti, badaagua burime rumu tidan, baputiheime sun láfadaragun fulansu le tuágubei lau barama dandu múnadagiñe keisi bóugudigiñe mebelura láamuga duna tidoun. Ítara luba tueirin ugunei tuguya: San-darandi-seingü méturu timigifen, wein-biama méturu dimí tidabuberen, tareisi méturu dimí tiñun. Ǘrüwabei fuló tidan, bíchigame aban funedera kei burí dimí méturu ǘnabu luéi tábulugu, luma aban bena luéigiñe aban touba.
Lárigiñe aba lariñagun Bungiu lun Noé:
—Dinaba tidoun ugunei hau sun biduheñu, ladüga hádangiñe sun gürigia báurügüñein nagundaara.
Aba ládinun tidoun ugunei hau lirahüñü, lúmari hama lídiñugu, lun hesefurun. Animaalugu ha geigúadibaña hama ha meigúadibaña, ha áhamahabaña hama ha aduruuhabaña, aba lebelaagüdün biama hádangiñe sun hawuyeri animaalugu würiña hama wügüriña, ha geigúadibaña hama ha meigúadibaña, ha áhamaharügübaña hama ha aduruuharügübaña múarugu aba hebelurun luma Noé tidoun ugunei, biámagueina, wügüri animaalu tuma würi animaalu, kei lariñaguni Bungiu lun. Sedü weyu lárigiñe, aba lagumeserun guran abuinchagüdei ubóu.
Aban wügüri tuma aban würi hádangiñe sun hawuyeri animaalu, ítara kei lariñaguni Bungiu lun Noé, lárigiñe aba ladouruni Bungiu tubenari ugunei.
Bián-weinñein weyu lau guran. Dan le liñurunbei duna, aba liñurunu ugunei múarugugiñe aba táfayarun. Iñureina ligíatima duna áfayareinatima ugunei.
Noérügüñein hama ha ebelurubaña luma tidoun ugunei eredera nibagariñu; ha híbiri gumuguagüdawatiña: Gürigia, ibiñanigu, dunuru hama animaalugu ha aduruuharügübaña múarugu,
aba lagumeserun duna ararira murusun murusun. Luágubei san-dimí weyu ararireinatimahaali duna, wéyubei disedü lidan lisedün hati ligía tadagarun ugunei luagu wübü le gíribei Ararátü.
Lárigiñe bián wein weyu, aba ladaaruni Noé tufunederan ugunei to buga ladügüboun, Ábati lígiragüdün aban dunuru wuriti, aba lerederun dunuru ligía áhamaha yaroun yagüroun agurabahei lamabeidun múa. Lárigiñeti buga lira ábanya lígiragüdün Noé aban unhun lun larihin anhein mábeihali lubéi múa; ábayati tagiribudun unhun tugía tidoun ugunei ladüga madari tan halíaba lan temeraagua lugundun wéirigili lan buga lubuinga ubouagu. Ábati línchuni Noé lúhabu, aba lárügüdünu unhun tugía aba lebelaagüdünu tidoun ugunei.
Sedü weyu lárigiñe, ábaya lóunahanu Noé unhun. Aguñedeinaali tagiribudunbei unhun. Barüina tuguyati murusun tilimun wewe oliwu tiyumulugu, ítara liña lubeiti lasubudiruni Noé luagu amabeideinaali lan buga ubóu. Sédüya weyu lárigiñe, ábaya lóunahanu unhun tuguya, gama lumoun magiribudúnharu.
Dan le sisi-san-ábanhali irumu lau Noé ligía lamabeidun múa. Furumiñe weyu lidan furumiñeti hati, aba lagidaruni Noé tábulugu ugunei, aba larihin luagu mábeihali lan múa.
Ábati lariñagun Bungiu lun Noé:
—Furiba tídangiñe ugunei tau búmari, birahüñü hama bídiñugu. Sagabaña giñe sun animaalugu ha búmabaña ñein: Dunuru, animaalu áüdübüna hama ha aduruuharügübaña múarugu, ñüdün hamaamuga, garahüñügua hamaamuga, buíngüda hamaamugei ubóu.
Ariñagati giñe Bungiu lun Noé hau sun lirahüñü:
—Ariha humá, nadügaali nidaradun huma luma hama hadügawagun, luma hama sun animaalugu ha húmabaña, ha áfuridubaña tídangiñe ugunei: Dunuru, animaalugu ha ibiñani hama ha áraabuna, luma hama sun animaalugu ha ubouagubaña. Masansiragunbei nidaradun huma: Magumuchaguagüdün naaña gürigia hama animaalugu lau ladibirun ubóu. Mabuluchagüdündigia naali ubóu luéi náfaraguniña lílana.
Ru naaru nani heremuru dúerirugu, teseriwiduba liseininme daradu le nadügübei hama lílana múa.
Lau lafiñen Noé, dan le lawisarunbalin Bungiu luagu ladagaruba lan aban óunwenbu guran, lau sun marihinñahagili lan guran, aba ladügüni le lubeibei Bungiu, aba ládaragun aban óunwenbu ugunei lun lasalbarun hau sun tílana luban. Ítara liña lasiadiruni Noé ubóu, aba lubéi leresibiruni Bungiu keisi aban wügüri richaguati luagu lafiñen.
Sífirigu hagía, gürigia meha ha awinwandubaña lidan lidaani Noé, lau sun arufuda lani Bungiu lueirin luguraasun houn lidan le lagurabahani tagumuchún ugunei to ladügüboun Noé, to ídanboun hasalbara wídürügü gürigia lau duna. Dúnati ligía, ítara liña hamuga kei lidunarina badisei guentó, le ídangiñebei wanügǘwa lun wasalbarun. Mama lun larumadun úgubu badisei; arufudarügü lumuti luagu harumaaru tan wanigi ligibugiñe Bungiu lau wafiñerun luagu Kristu, luagu giñe sálbaadiwa lan lau lásaarun Kristu lídangiñe óunweni. Múdeiti Kristu sielun, ani anihein ñun luéigiñe lóunwenren Bungiu guentó hau sun ánheligu hama sun híbiri ubafu sielu lábugiñe lubafu.
«Ítara kei meha lasuseredun lidan meha lidaani Noé, ítara luba giñe danme le niabin, au le Wügüri Garaüwarügüti. Lidan meha dan ligía, lubaragiñe ladibirun ubóu, heredera meha gürigia eiga, ata, amarieidagua, íchaahaña hasaanigu lun maríei, darí weyu le lebelurunbei Noé tidoun ugunei. Mefentiña, darí ladibirun ubóu, aba hañaradagun súngubei. Ítara luba giñe danme niábinya, au le Wügüri Garaüwarügüti ubouagun. Lídanme dan ligía, ñéinbaña bián wügüriña áraabu; lanügǘba aban, igirúame le aban según hafiñen nuagu. Ñéinbaña bián würiña amuliha; tanügǘba aban, igirúame to aban.