1 Ábanya lariñagun Moisesi houn:

—Danme günringua laaña Wabureme le Hubungiute néchanigu, ruleime múa le hamúanbei guentó hun, danme hánihali burí haburugute tuma burí haban, 2 lunti hanúadirun ǘrüwa uburugu lídangiñe ageiraü le líchugubei Wabureme le Hubungiute hun, 3 ábame haranseruni lémeri. Hadügübei giñe ageiraü ligía lidan ǘrüwa fánreinti, lun furumiñeguarügü lan le áfarahati gayara láamuga lanurahan lidoun furumiñeguarügü lídangiñe uburugu ligía. 4 Le áfarahabei gayaraabei lanurahan ñeinhin lun lesefuruni libagari, anhein larufuda luagu mama lan lau labusenrun ladügei, ani ua lan buga gáganiguaü hadan. 5 Kei burí hamuga guentó, lidin aban gürigia luma louba áraabu áhina, dan le lagayuahan tau harawa aba taguyedagun lúhaburugugiñe aba tadagarun luagun gürigia le lúmabei ñein áraabu aba lounwen, gayaraabei lanurahan lidoun aban lídangiñe uburugu ligía lun lesefuruni libagari. 6 Lugundun anhein dise lubéi fulasu, gayaraabei léibaahani aban liduhe le óunwebei lun láfaruni leweñegua láfaruni liduhe, lau sun moun lan yebe lafarún lugundun máganiguati luma le láfarubei lubaramegiua, mama lau labusenrun láfarei. 7 Ligía nariñagunbei hun lun hanúadirun ǘrüwa uburugu, 8 dánmeti laweiridagüdüni Bungiu le Hubungiute hufulasun ruleime sun múa hun kei buga lariñaguni houn hagüchagu, 9 ábame híchugunya ǘrüwa uburugu aramudaguagülei lanwoun ǘrüwa le aniheinhalibei (líchigatimaba Bungiu lanwoun humúan gúnfulirügü humaali ligíame gumadi burí le, níchugubei hun uguñe, lun hínsiñe lan Wabureme le Hubungiute hun, falá humeime lémeri súnwandan.) 10 Ítara luba máwiyurun lan hitaü madurunti lidan ageiraü le líchugubei Wabureme le Hubungiute hun lun hánime, mábürühan ligíame duru lánina óunweni huagun.

11 —Gama lumoun anhein gáganigua lubéi aban wügüri luma amu, aba léibaahani, dan ladariruni aba láfaruni, lárigiñe aba lanurahan lidoun aban lídangiñe uburugu le aramudaguagülei, 12 ábame híchugun ábutigu dimurei lun ladaürǘniwa, ábame lederegerúniwa lun liduhe gürigia le láfarubei, lun lasiadirúniwa lun lounwen. 13 Magudemedalá hun, ítara luba mígirun humá lun lafarúniwa gürigia madurunti Ísüraeli. Buídubeiti lasalirun sun katei hun.

14 —Lidan ageiraü le lunbei líchuguni Wabureme le Hubungiute hun, gasu inebe lan láfadaragun lufulasun hubesinan hun, ítara kei lafanreinhóun lidan dan le sügühalibei.

15 —Lóuguabei lererun ábanrügü gefenti lun lachoururún luagu áfarahaali lan aban gürigia o adügaali lan duru. Dánrügüba añahein lan biama o ǘrüwa gefentiña ligíarügüba gebegi lan hererun.

16 —Anhein ñübuin aban gefenti le marasualuguti ariñaga luagu áfarahaali lan aban gürigia 17 ábame hayabin biama ha awuribuhabaña hámagua ligibugiñoun Bungiu luma hagibugiñoun fádirigu hama aguseragüdütiña lidoun burí weyu ligía. 18 Ábame haturiahani aguseragüdütiña kesi lau saragu góunigi, ánheinti iyeeni lubéi le lariñagubei gefenti luagu le aban gürigia, 19 ábame lasufuriruni le marasualugubei le yebe labusenrubei lun lasufuriruni le uágubei lamarasuha. Ítara luba hagumuchun lau wuribani le haganaguabei. 20 Dánmeti hasubudiruni ha híbiri, hanufudeduba, madügünhañame aban katei wuribati kei lira. 21 Magudemedalá hun, haguburaha ibagari luagu ibagari, aguu luagu aguu, ari luagu ari, úhabu luagu úhabu, ugudi luagu ugudi.