1 Aba lariñagun Moisesi houn gürigia:

—Ligía burí gumadi, luma lúrudu le lariñagubei Wabureme le Hubungiute nun lun narufudahani hun lun hadügüni lidan ageiraü le lunbei hibihini. 2 Ítara luba híchuguni inebesei lun Wabureme le Hubungiute, gúnfuli humeime lilurudun luma lugumadin súnwandan, huguya, hisaanigu hama hibañan; ítara luba habagaridun saragu dan. 3 Adüga huméi lubeiti sun katei le Ísüraelina. Ítara luba buidu lan lidin hun, ábame hagibedagun ligibuagu múa le, le rísibei ani buidu ligía lun ábunaguni ítara kei lariñaguni Bungiu le Habungiute hagüchagu hun.

4 —Aganbabá, Ísüraeli: Bungiu le Wabungiute ligíarügüñein Bungiu.

5 —Hínsiñela Babureme le Bubungiute bun tau sun banigi, tau sun buani luma lau sun bere.

6 —Areidabei sun katei le ariñaga náalibei bun lidan bisaminan, 7 arufudahabei houn birahüñü súnwandan; adimurehabá houn luagu, dandu búbiñe kei luagu béibuguniwagu, danme le barounrun luma danme le básaarun. 8 Barübei gumadi burí le gürañu luagu búhabu luma bereberugu keisi seini, 9 abürühabéi giñe luagu burí tuágaburi luma luagu tubenari buban.

10 Aba lasigirun Moisesi ariñaga:

—Líchugubei Wabureme le Wabungiute ageiraü le uágubei láfiñura lun Abüraámü, Isaakü luma Hakobu ha hagüchagu luagu lederegerubei lan hun. Aban ageiraü le ñein lumuti óunwenbu burí lubuidun uburugu le mama hadügün; 11 muna burí buin lau katei buíduburiti le mama híchugun ñeinhin, lau burí fusu le mama hachigin, tuma burí beibei-agei to mama hábunagun gama lumoun héigiba tídangiñe darí hakimuledun. 12 Danme lasuseredun katei le, houcha humá mabulieidagun humá luéi Bungiu le asagarubalün Ehiptugiñe le meha ñein lubéi idamuni humá. 13 Hudugua humá lun Wabureme le Hubungiute, lúnrügüla heseriwida, danme lunti lan háfiñurun, lídanrügüla liri Bungiu hadügei. 14 Midin humá hárigi búngiugu ha lubungiutegu ageiraü burí le geyegubei hau, 15 lugundun anhein hadüga gayaraabei lagañidun Wabureme le Hubungiute wama, ábameti lagünrinchaguniwa sunsuinagubei, ladüga emeiditi Bungiu le wámabei.

16 —Móuchagua huméi Wabureme le Hubungiute, kei hadüga yágüta Masá. 17 Gúnfuli huméi lugumadin Wabureme le Hubungiute súnwandan luma lilurudun le uágubei lariñaga hun. 18 Adüga huméi katei le úaraguabei, le aubei lagundaara Bungiu, lun buidu lan lidin hun, ragǘ humaamugei múa buiti le meha füramase lubéi Bungiu lau fiñú houn hagüchagu, luagu líchugubei lan hun, 19 lun giñe léibaaguagüdüniña Bungiu sun áganiñu ha agagibudagutiña huma, ítara kei lariñaguni.

20 —Danme hálügüdünün hisaanigu lachülürünme dan, ka lan mini lan gumadi burí luma lúrudu le, le uágubei lariñaga Bungiu le Wabungiute woun, 21 hariñagame houn: "Lidamunñadiwa meha urúei Ehiptuna, uburugu Ehiptu, aba lasagaruniwa Bungiu ñéingiñe lau óunwenbu ubafu. 22 Ariha wamuti luéinamun milaguru le ladügübei Bungiu kóntüra urúei Ehiptuna kóntüra sun gürigia Ehiptu luma kóntüra sun ha erederubaña lúbiñe urúei; 23 gama lumoun aba lasagaruniwa ñéingiñe, aba lanügüniwa lidoun ageiraü le meha füramase lubéi houn wagüchagu, aba líchuguni woun. 24 Lárigiñe aba lariñagun Bungiu le Wabungiute woun lun wagunfulirun luma burí gumadi le, luma lun inebe lan woun, lun buídubei lan lidin woun luma lun lágüdahani wabagari kei chülǘ lumoun dan le. 25 Buídubei lubeiti wadüga lau wagunfuliruni gumadi burí le lau duari ligibugiñe Bungiu le Wabungiute, ítara kei lariñaguni woun."