1 Anihán burí lébeha daradu le uágubei lariñaga Bungiu lun Moisesi lun ladügüni hama Ísüraelina lidan ageiraü Moabü, lúmounya daradu le buga adüga láalibei hama luagu wübü Orebü. 2 Aba lóundaruniña Moisesi sun Ísüraelina, aba lariñagun houn:

—Ariha humaali sun le ladügübei Bungiu lun urúei Ehiptuna Ehiptu, houn lánigu luma lun sun lageira, 3 ani gefentün luagu seini luma burí milaguru ligía. 4 Gama lumoun chülǘ lumoun oura le, míchugili Bungiu gunfurandaü hun, ani máhagili lun gunfuranda humani lanichigu sun katei ligía. 5 Bián-wein irumu nau adundehaün lidan fulasu mageirawati, lidan sun dan ligía mawesiruntu hadaüragun ni higeidin. 6 Méigingidün fein, matun diwéin ni uniñein héreti, lun hasubudiruni luagu Bungiu lan Hubungiutebei.

7 —Dan le wachülürünbei lidoun fulasu le, furiti Sihón le lurúeite Esübón luma Ogu lurúeite Basán ageindagua wama, gama lumoun gañei wamutiña 8 aba werederun lau hageira, aba wíchuguni houn lani Rubén luma Gadü hama hamidan lani Manasési türibu hánime. 9 Gúnfuli huméi lubeiti le lariñagubei daradu le, ani adüga humeime, buidu láamuga lidin hun lidan sun hadüga.

10 —Óundaragu hiña sun huguya uguñe ligibugiñe Wabureme le Hubungiute: Hábutigu türibu, sun gumadimatiña, úfisigu, hama sun wügüriña, 11 irahüñü, würiña hama terencha ha aganóubaña haganagua, lúmagiñe le áhinubei watu lumoun le adaburagubei duna, 12 sun huguya aünha ya lun füramase humá luagu hagunfulirubei lan daradu le uágubei láfiñura Bungiu luagu ladügübei lan daradu ligía huma uguñe. 13 Lun huguyaba lan lumutuniña ha lanúadirubaña, ani lun ligíaba lan Hubungiute, kei meha füramase lani ani fiñuléi lun Abüraámü, lun Isaakü luma lun Hakobu ha hagüchagu. 14 Gama lumoun mámarügüñein huma ladügei Bungiu daradu luma áfiñuruni le, 15 ladügüñein giñe hama ha úabaña wama ya uguñe ligibugiñe. 16 Subudi humuti buidu buidu ida liña lan bugaha wabagaridun Ehiptu luma ida liña lan ligaburi wásügürün hádangiñe néchanigu ha wadarirubaña wémerirugu, 17 ariha humutiña guáriua ha láutiña wewe, dübü, pülata luma golu, hama iyawaü ha únbaña háhuduragua gürigia lílana burí ageiraü ligía. 18 Ualá lubeiti ni aban hídangiñe ni wügüri, ni würi ni iduheñu ni türibu, ígiruti Bungiu lun láhuduragun houn habungiutegu néchani hagía. Lun mítaran lan ni aban hídangiñe kei nadü le gífiti lílagüle ani péisini ligía.

19 —Lárigiñe haganbuni le lariñagubei áfiñuruni le, anhein ñein aban hídangiñe aritaguti luougua luagu weiri lan lubuidun, lariñagameti lúnguarügü: "Buídubei lasalirun sun katei nun íbini lun nadügüni le nabusenrun, wügüriba ligía lébuna hagünrinchawaguniwa sun huguya." 20 Úabei ferudunalani Bungiu, óunaharügü lubéi ligañi luagun wügüri ligía, ábame lábürühan sun íñarawaguni le uágubei tadimureha garudia to luagun, ábame lagumuchaguagüdüniña Bungiu sun ladügawagun ubouagugiñe. 21 Ladiñurubei Bungiu wügüri ligía hádangiñe sun lani Ísüraeli türibugu, ábame lábürügüdüni lidoun lamiselu, kei lariñaguni íñarawaguni burí le lídanbei daradu le bürüwañubei tidan garudia to lánina lúrudu. 22 Inebanfangu ha lúnbaña hayabin ubouagun, hadügawagun burí, hama terencha ha ñǘbuintiña lídangiñe ageiraü burí díseti, harihubaña sun igei luma burí sandi le lunbei lóunahani Bungiu luagun múa le; 23 marihinbadün lidan ageiraü le luéidigia súfuru, salu luma múa gudaali. Siñabei labunún ni kata lidan múa ligía, siñabei giñe láhüchün ni kata ñein, ni íbini sagadi, ítara kei meha lasuseredun lidan lagünrinchawagun Sodoma, Gomora, Adümá luma Seboimü, le burí lagünrinchagubei Bungiu lidan ligañi.

24 —Ábameti hálügüdahan sun gürigia ariñaga: "Ka san uagu ladügei Bungiu katei le lun ageiraü le? Ka uagu luéirinbei lagañidun ítara?" 25 Anihánba óunabagülei: "Ladüga hígiruni daradu le meha ladügübei Aburemei le Habungiute hama hagüchagu dan le lasagarunbaliña Ehiptugiñe, 26 aba hadügün kultu houn amu búngiugu ha meha ibidiñetiña houn michu hagía ni kata houn. 27 Ligía lagañidunbei Bungiu hama lílana múa le, aba lábürügüdüni íñarawaguni le bürüwañubei tidan garudia to hawagun lílana; 28 aba lachagaruniña hageiragiñe lau ligañi, lidoun amu burí ageiraü, keisi harihini uguñe weyu."

29 —Anihein burí katei ibidiñeti woun ani lun Wabureme le Wabungiute yu lan; anhein burí katei le subudigüdawati wounti luma houn wasaanigu lun wagunfuliruni súnwandan. Ladügünbalin sun le lun gayaraabei lan wagunfuliruni sun lilurudun.