1 —Míchiga humá bágasu ni mudún danimatiña keisi adagaragüdüni lun Wabureme le Hubungiute, ni amu katei le wuribati, ladüga magundanti Bungiu lau katei ítara buriti.

2 —Anhein adarirúa wügüri o würi lidan aban lídangiñe huburugute le líchugubei Wabureme le Hubungiute hun adüga katei le magundanti Bungiu lau, ani dürügualéi lidaradun, 3 lau láhuduragun hagibugiñe amu búngiugu, weyu yebe, hati yebe, waruguma yebe, katei le uágubei mariñagun lan Bungiu lun ladügǘn, 4 anhein hasubudira, hálügüdahame libügürü, ánheinti inarüni lubéi, 5 ábame hanügüni le adügübalin katei wuribati le ligibugiñoun lúrudu, ábame lasiadirún lun lachamurawagún dübü luagun darí lounwen.

6 —Lun lasiadirún gürigia lun lounwen, gasu ñéinbaña lan biama o ǘrüwa gefentiña luagu le ladügübei, anhein láurügü lererun aban gefenti siñabei lasiadirún ni aban lun lounwen. 7 Ha gefenbaña luagu le ladügübei hagíaba furumiñe achamuragua dübü luagu le asiadirúbei lun lounwen, lárigiñe ábame hachamuragun híbiri lílana fulasu dübü luagun. Ítara luba hagumuchun lau wuribani le haganaguabei.

8 —Anhein lunti lubéi haguseragüdün luagu aban katei le wéiriti lénrengun, kei burí hamuga luáguti óunweni, biti luagu úgubu o furumiñeguarügü lan amu katei asusereduti huburuguterugu, hídinme lidan fulasu le lanúadirubei Wabureme le Hubungiute, 9 ábame hadimurehan hama fádirigu Lewitagu, luma aguseragüdüti le lídanbei dan ligía, hagíaañameti ariñagei asiadirúni lun kesi ligía, 10 ábameti híchuguni asiadirúni ligía kei lariñawagúniwa hun. 11 Adüga huméi sun katei, ítara kei hariñaguni hun, masansiragunga huméi siadi. 12 Gama lumoun le adügüti katei lau anaaguni unguaü, lun ladüraaguni le lariñagubei fádiri le ñeinbei eseriwida lun Bungiu o le lan lubeibei aguseragüdüti, lasiadirúba lun lounwen. Ítara luba hagumuchun lau wuribani, Ísüraeli, 13 dánmeti hasubudiruni lílana fulasu ábame hanufudedagun ábame hígiruni hadügüni katei lau anaaguni unguaü.

14 —Danme beluhadün lidoun ageiraü le lunbei líchuguni Wabureme le Hubungiute hun, danme aganawaadün ñein, anhaün ariñaga: "Busentiwa aban warúeite lun labuguruniwa kei garúeite hamá híbiri gürigia ha wabesinanigu"; 15 gasu híchuguni hupaisanun le lanúadirun Wabureme le Hubungiute urúeime. Míchubadün aban terencha urúeime, aban le mama hupaisanun. 16 Urúei le lunbei híchuguni, moun lumuti lun gíbebaña lan lilügüniña gabayu, móunahan ligíame gürigia Ehiptu lun hagañeihan gabayu lun, ladüga ariñagaali Bungiu hun: "Magiribudadigia humá luéigiñe üma le." 17 Moun lumuti giñe gibe hamá lúmarigu luéi lacharagadun; úame saragu golu ni pülata luma.

18 —Danme lárügüdüni urúei lubara lun larúeihan, labürüdagüdüba aban gárada lau lúrudu le tídangiñe to furumiñetu to hámaboun fádirigu Lewitagu. 19 Lunti lúmaboun lan gárada tuguya súnwandan, lunti laliihanu sagü weyu lidan libagari, lun lafurendeirun inebewa lan Bungiu luma sun le bürüwañubei lidan arufudahani le, gúnfulileime, 20 lun manaagun lan lungua wéirigu hawéi lupaisanun, madireirun ligíame luéi gumadi burí le ni ka uagu. Ítara, dandu ligía kei ladügawagun, migifebei harúeihan.