1 Aba lariñagun Moisesi houn Ísüraelina:

—Anhein anüga aban wügüri aban würi, aba lamarieidun tuma, gama lumoun lárigiñe aba taminsiñedun lun ladüga ladarirun katei le magundanti lau tuagu, ábame líchugun gárada lánina ígiraguni tun ábame lóunahanu lúbiñegiñe. 2 Tuguya, lárigiñeme furiharu lan lúbiñegiñe, gayaraabei tamarieidun luma amu; 3 gama lumoun anhoun giñe lígira libiaman túmari; líchigame gárada lánina ígiraguni tun, o lounwen lan, 4 siñabei lamarieidun le buga furumiñeti túmari tuma lugundun wíyetu ligibugiñe Bungiu, magundanbei hamuga Bungiu lau aban katei líbeina lira, ani huguya moun lumuti híchuguni ageiraü le líchugubei Wabureme le Hubungiute hun lidoun ǘnabuguni.

5 —Anhein málügili lubéi lúmagiñe lamarieidun aban wügüri, moun lumuti lidin wuriburugu, mafosurúnbei giñe lun ladügün ni amu luwuyeri eseriwiduni luagu aban irumu; ítara luba gayara lan lúbiñe lan sun dan ligía tugundanme lúmari.

6 —Lídanme bafuredeirun aban katei lun somu gürigia meresibirabei limulinun lun lerederun buma lubarügü lafayeiruni le bafuredeirubei lun, lugundun ítara liña lira kéisigubeirügü bamuriahani libagari guánarügü luma.

7 —Anhein adarirawagúa aban Ísüraelina íweruha aban lupaisanun lun lidamunme o lun lan laluguruni, lasiadirúba lun lounwen, lun lagumuchun lau wuribani le haganaguabei.

8 —Libügürüti lépüra, gúnfuli huméi sun le harufudahan fádirigu Lewitagu hun lidan lúaragun. Lunti hadügüni ítara kei nariñaguni houn. 9 Haritagua huméi le ladügübei Wabureme le Hubungiute tun María luagu üma lárigiñebei háfuridun Ehiptugiñe.

10 —Anhaün afuredeiha aban katei lun gürigia híledi, ani aban füramase lanu lidáü hun keisi achoururuni luagu lafayeirubadün lan, mebelura humá lúbiñoun anügoun lidáü luéi. 11 Redei humá bóugudi aguraba lasagarunu hun. 12 Anhein aban lubéi gürigia gudemeti, moun lumuti herederun tau lidáü darí lumoun laguñeedun; 13 lunti háguyugüdünu lun dan le lálüdün weyu, lun gayaraabei lan ladouragun laugua tau lidáü danme lidin arumuga. Ítara labinirubadün, adüga huguyame aban katei buiti ligibugiñe Wabureme le Hubungiute.

14 —Mamudiragua huméi le wéiribei ugudemen, madarasarun ligíame hafayeiruni, gayaraati aban lan hupaisanun o aban lan terencha le aganóuti lidan aban lídangiñe huburugute. 15 Fayei huméi lebegi luadigimari lun weyuméme ligía, lubaragiñe lálüdün weyu, lugundun gudemeti, ani megei lumuti seinsu ligía lun lawinwandun. Anhein madügün humá ítara, layumuraguba huagu lun Bungiu, ani gafigoubadün.

16 —Siñabei hasiadirún agübürigu lun hóunwegun luagu láfarahan haráü, ni giñe isaanigu luagu háfarahan agübürigu kádaba aban ounwe luagu láfarahan.

17 —Madüga humá marichaü houn terencha ni houn méteñuhaña. Meresibira humoun hadaüragun würiña ha hilaguaaña úmarigu keisi achoururuni luagu lafayeirúniwa somu katei le hafuredeihan houn. 18 Mabulieida huméi luagu idamuni humá meha Ehiptu, aba lasagarunün Wabureme le Hubungiute ñéingiñe, ligía nariñagunbei hun lun hagunfuliruni sun le.

19 —Dan le halubahan hicharirugu, anhaün abulieida aban güraguati türigu, magiribuda humá áluahei; ígira huméi lun labuduni somu terencha hádangiñe ha aganóubaña haganagua, o aban lan méteñuhali; o aban lan würi hilaali túmari, biní láamugaün Wabureme le Hubungiute lidan sun le hadüga.

20 —Danme hátühanu lin tídibu oliwu, máluaha huméi kada lilimun le erederubei, ígira huméi habá terencha, méteñuhaña hama würiña hilaguaaña úmari.

21 —Danme hátühan beibei, máguyuguagüda huméi kada lídibu, le erederuti, ígira huméi habá terencha, méteñuhaña hama würiña hilaguaaña úmari. 22 Haritagua humá luagu idamuni humá meha giñe Ehiptu; ligía nariñagunbei hun lun hagunfuliruni sun le.