1 Lariñagameme Moisesi houn gürigia:

—Hínsiñela Wabureme le Hubungiute hun, gúnfuli huméi sun lugumadin luma lilurudun. 2 Anha humá lun leweridihan Wabureme le Hubungiute guentó, le ibidiñebei houn hirahüñü ani marihin hamagili giñe luéirigun luma lueirin lubafu, 3 luma burí seini, luma luéinamun burí katei le ladügübei uburugu Ehiptu lun urúei Ehiptuna luma lun sun lageira, 4 le ladügübei houn lisudaranigu Ehiptu, hau hagabayun luma tau burí hakarün to lánina wuribu, luagu lañaradaguagüdüniña lidan Barana Funati dan le héibaahanbalün. Aba lagünrinchaguniña Bungiu lun sun dan. 5 Haritagua humá giñe luagun sun le ladügübei lidan fulasu mageirawati huagu; 6 luma luagu le ladügübei lun Datán luma Abirámü ha lirahüñü Eliabü, ha ladügawagun Rubén, luagu ladaaragun múa aba láhuluchuniña hau sun haduheñu, haban luma sun hamegen, aríagu sun Ísüraelina lun. 7 Huguya guánarügü gefentün luagu sun luéinamun burí katei le ladügübei Bungiu.

8 —Gúnfuli huméi sun gumadi le níchugubei hun uguñe here humaamuga ragǘ humaamugei ageiraü le lunbei hásiuruni, 9 lun giñe habagariduba lan saragu dan lidan fulasu le, le buga füramase lubéi Bungiu houn hagüchagu luagu líchugubei lan houn luma houn hadügawagun; fulasu le buídubei ani risi ligía. 10 Fulasu le lunbei hásiuruni mítaranti kei Ehiptu, le ñéingiñe lubéi háfurida; ñein bunagua humuti ilaü lárigiñe mosu meha hawadigimaridun saragu lun háturaguni kei ladügǘn lidan fuluri-agei, 11 ánheinti fulasu le lunbei hánibei lan, anihein burí wübü luma fulasu wayati ñein, tugua lumuti huya le áhuyubei siélugiñe. 12 Bungiu guánarügü óunigirubalin múa ligía, sun irumu larihiña luagun.

13 —Anhein hagunfulira sun gumadi le níchugubei hun uguñe, hínsiñe ligíame Wabureme le Hubungiute hun, hudugua huguyame lun tau sun huani luma tau sun hanigi, 14 ladügüba lun liabin huya lidan lidaani, lun halubahani hinadüri türigu luma lun ñein tan diwéin luma garaba huma. 15 Ladügüba giñe lun ñein lan sagadi houn hibiñanigu, luma lun ñein lan saragu éigini huma. 16 Gama lumoun mígiraguagüda humá hungua lun heyeedun, madireira humá luéi Bungiu lun heseriwidun houn amu búngiugu, máhuduragun huguyame houn, 17 lugundun lagañiduba Bungiu huma, ábame móunahanhaali lan huya hun; ábameti magindunhali lan nadü, ábame hóunwegun furese furese lidan múa buiti le lunbei líchuguni Bungiu hun.

18 —Haritagua humá luagun dimurei burí le ani areida humeime tidan hanigi; gürá huméi luagu húhabu luma hereberugu keisi seini. 19 Harufudaha houn hisaanigu adimureheina luagu dandu húbiñe kei luagu héibuguniwagu, dan le harounrun luma dan le hásaarun. 20 Abürüha huméi luagu tuágaburi luma luagu tubenari huban, 21 lun migife lan hibagari luma habagari hisaanigu ítara kei anihein lan sielu lóugiñe múa lidan fulasu le uágubei lariñaga Bungiu houn hagüchagu luagu líchugubei lan houn.

22 —Anhein hagunfulira gumadi burí le, le níchugubei hun uguñe lidan lubudubu, anhein hínsiñe Wabureme le Hubungiute hun falá humeime lidan lubudubu lidan sun lémeri; 23 lachagarubaña Bungiu sun néchanigu ha higibugiñegiñe, ani hagañeiruba gürigia ha gíbetimatiña ani héretima huéi. 24 Leme múa ñein lumuti híchigei hugudi, hánibei. Lachawaraguba láfadaragun humúan lúmagiñe luéigiñe fulasu mageirawati chülǘ luagun Líwanu, luma lúmagiñe duna Éufüratesi chülǘ lumoun barana Mediteraniu. 25 Úabaña araramutiña higibugiñe. Ládaruba Wabureme le Hubungiute anufudei lidoun sun fulasu le ñéingiñe lumuti hásügüra, ítara kei lariñaguni hun.

26 —Níchuguñadün uguñe weyu lun hanúadahan aban lídangiñe bián katei le: Abiniruni luma íñarawaguni. 27 Abinirúni, anhein hagunfulira lugumadin Wabureme le Hubungiute, le uágubei nadimureha hun uguñe. 28 Íñarawaguni, anhein hadüraagua lugumadin Wabureme le Hubungiute, lun hafalarun amu búngiugu ha ibidiñewatiña, luma anhein hígira üma le narufudubei hun uguñe.

29 —Danme belugüda laadün Wabureme le Hubungiute lidoun ageiraü le lunbei hagañeiruni, hariñaguba abinirúni luagu wübü Gerisímü, hariñagame íñarawaguni luagu wübü Ebali. 30 Loubafuruguñein Hordán wübü burí le luagun üma le luéigiñebei oubaü le ñeinhin lubéi lálüda weyu, hamúanrugu Kananna ha aganóubaña lidan fulasu mawübüriti, ligibugiñe Gilügáli, turugabu burí tídibu wewe sagüráutu to lani Moré. 31 Guentoti hánhiñuraguaali duna Hordán lun hagañeiruni ageiraü le lunbei líchuguni Wabureme le Hubungiute hun. Danme ñéinhali haganawa, 32 hadügeime sun lúrudu luma gumadi le nederegerubei hun uguñe.