1 Murusun dan lubaragiñe lounwen Moisesi le luwügürin Bungiu, biní lumutiña Ísüraelina. 2 Ítara:

«Anite Wabureme luéigiñe Sinaí,

harugoungadagüdaali wau lúmagiñe Seírügiñe.

Heleleguati lúmagiñe burí luwübüri Parán,

aba lawanserun lúmagiñe Meribá-kadesi,

luéigiñe lóunwenren lúhabu barüina liñalin

watu gemeti le lánina lúrudu woun.

3 Hínsiñetiña lánigu Bungiu lun,

góunigi lumutiña ha deregeguabaña houngua lun;

rúguatiña houngua lun,

resibitiña gumadi lúmagiñe.

4 Ru lumuti Moisesi lúrudu woun

keisi halagante lánigu Hakobu,

5 ani ñeinñein urúei uburugu Hesurún

dan le hóundaragunbei lábutigu fulasu,

dan le hadunragun lani Ísüraeli türibu».

6 Lariñahare libügürü Rubén:

«Gabagarilá Rubén!» Mounwelá,

lau sun mibe hamá luwügüriñanigu!

7 Lariñahare libügürü Hudá:

«Bungiu, aganbabéi lumalali Hudá;

adügabá lun lóundaragun hama lumutuniña.

Sefubéi lau bubafu,

íderaguabei hawagu láganiñu».

8 Lariñahare libügürü Lewí:

«Bungiu, bani Tumimü luma Urimü,

bani luma wügüri le úaraguabei buma,

le bóuchagubei Masá,

le úmabei bageindagua lidunarirugu Meribá,

9 le ariñagubei houn lagübürigu:

Marihinñaha nágidün,

ariñaga ligía houn líbirigu: ibidiñetün nun,

ariñaga houn lirahüñü: Ibidiñeti nun kataün lan.

Hagía gúnfuli hamuti bererun

deregeguaaña houngua sunsuinagubei lun bidaradun.

10 Arufudaha hamuti bilurudun lun Hakobu lun Ísüraeli;

rútiña kupali luma idewesei ha animaalu

luagu bani latarü bigibugiñe.

11 Nabureme, binibei háfaagun,

resibibéi hawadigimari lau ugundani.

Gumuguagüdabaña háganiñu,

másaaradigia hamá ha iyereehabúbaña houn».

12 Lariñahare libügürü Benhamín:

«Darangiluti labagaridun le hínsiñebei lun Bungiu;

lóunigirubei Bungiu súnwandan

labagariduba lábugiñe lóunigirun!

13 Lariñahare libügürü Hosé:

Binilei Bungiu lumúan

lau lubuidun-agei serenu siélugiñe

luma lau duna le guribinibei libiti múa,

14 luma lau lubuidun-agei alubahani lidan irumu,

luma burí lubuidun-agei tin nadü lidan hati,

15 lau lubuidun-agei burí binadu wübü,

lau le burí buítimabei lidan íñuni-agei magumuchaditi;

16 lau lubuidun-agei tin nadü le ubouagubei

lun líchuguni sun le buídubei lun Bungiu

le asaliragubei búbutirugu lidan watu gemeti

lun súnwandan lan gudemehabu lan houn.

Ñǘbuinla sun abiniruni le lun lani Hosé türibu

le wéirigutimabei hádangiñe líbirigu.

17 Wéndeti kei furumiñeti liráü aban bágasu,

héreti kei aban bulu bágasu,

labukuhabaña lílana sun fulasu

chülǘ lumoun lagumuhóun larigei ubóu.

Ítara liña hibe lánigu Éfürain;

ítara haña míñunu lánigu Manasési».

18 Lariñahare libügürü Sabulón luma Isakárü:

«Gundaabá Sabulón dan le báfuridun,

buguya Isakárü, tuagu burí bikianpun.

19 Hagúaruba houn néchanigu áraabun,

ábame hadagaragüdüni le amuriahóubei hama ñein,

hefeduhabei lirisin barana

luma burí irisini aramudaguati le béyabubei».

20 Lariñahare libügürü Gadü:

«Biniwati le íchugubei luéinamun fulasu hun!

Aranseñu liña Gadü habá líliru kei liñún würi.

Chulaguati arünaü luma labu ichügü.

21 Rédeiti Gadü lau lubuidun-agei fánreinti,

lau aban múa le hadüna arüneigu.

Beluti habá habá lílana fulasu,

gúnfuli lumuti le lamuriahabei Bungiu

adüga lumuti le lunbei ladügüni lau liricha Ísüraeli».

22 Lariñahare libügürü Dan:

«Ítara liña Dan

kei aban liraüraü liñún le achubaruti Basangiñe».

23 Lariñahare libügürü Nefütalí:

«Buiti larihin Bungiu luagun Nefütalí,

gíbeti abinirúni libihin lúmagiñe,

ligía laburemebei fulasu le lúmagiñebei lagunu

darí lígirugu le luéigiñebei suru!»

24 Lariñahare libügürü Aserü:

«Biniwalá Aserü hadan lirahüñü Hakobu,

hínsiñegu ligíame hadan líbirigu

ani gíbebei garaba lidan lageira;

25 Lun areidañu luba lan burí luburugute

lau bena lauti gürabu,

ani lun sun lan ha awinwandubaña ñein darangilu hamaamuga».

26 «Ísüraelina, úati amu bungiu

kei Lubungiute Hesurún,

le awarirubei lau uéiriguni ligibuagu dúeri

le siélubei lun liabin íderaguabu.

27 Bungiu le lunti súnwandan baramudaguagülebei,

le ageindagubei waweigiñe lau lere larüna.

Wagibugiñe labugaguaña Bungiu wáganiñu

aba lóunahaniwa lun wagumuchun hau.

28 Labagariduba Ísüraeli hemenigiñu,

habagariduba ladügawagun darangilu.

Ñeinbei burí lídibu türigu luma tídibu beibei hamúanrugu,

súnwandan láhuyuba lan huya houn siélugiñe.

29 Fuleseiwatibu Ísüraeli, ka ítarabei kei buguya?

Sefu láadibu Bungiu guánarügü, góunigi lumutibu íderagualabu.

Ligía befeintebei to bagañeiragüle!

Hederegeraguba báganiñu houngua bun,

ábame badügüraguni hapantan».