1 Aba lasigirun Moisesi ariñaga houn Ísüraelina:

—Sagü sedü irumu, feruduna bubéi badueirúniwa.

2 Sun gürigia ha furedeihaña somu katei lun gürigia háledi, feruduna habéi luagu le hafuredeirubei lun. Mamuriahanhañame luma le unbei hafuredeiha lun lafayeiruniña, lugundun dan ligía, lidaanibei ferudun lidan liri Bungiu. 3 Gayaraabei baguburahani terencha luagu le bafuredeirubei lun, ánheinti bupaisanun gasu feruduna bani luagu le leresibirubei búmagiñe. 4 Lau igaburi le, úabaña gudemetiña haganagua, labinirubadibu Wabureme le Bubungiute lidan ageiraü le lunbei líchuguni bun keisi balagante 5 anhein badüga le lubeibei, gúnfulibeime sun gumadi le, le níchugubei bun uguñe. 6 Ítara luba, labinirubadibu Wabureme le Bubungiute, ani gámabadibu lun bafuredeirun houn saragu néchanigu, ánheinti buguya mamuriahanbadibu furedeiti; bagumadiruba saragu néchanigu, gama lumoun hagía magumadirún habadibu.

7 —Anhein ñein aban gudemeti hadan bupaisanun lidan aban lídangiñe luburugute ageiraü le líchugubei Wabureme le Bubungiute bun, mamaharabá bíderaguni bupaisanun le gudemebei; 8 lubaragiñe lira, arufudabéi bareini, furedeibéi le lemegeirubei lun. 9 Mariñagabá búnguarügü: "Yarafaali lisedün irumu, lidaani ferudunawa lan adúeihani", barufudameti luriban igibu lun bupaisanun le gudemebei ábame mafuredeirun ban ni kata lun; ladüga lagúaruba lun Bungiu kóntüra buguya, ani labahüdǘba katei ligía keisi figóu. 10 Lunti bíderaguni súnwandan gúndaañu, lugundun ladüga katei lira, labinirubadibu Wabureme le Bubungiute lidan sun katei le badüga. 11 Súnwandan ñeinbei lan megei fulasurugu, ligía nariñagunbei bun lun buidu ban hama bupaisanun ha áfagubaña gudemei bageira.

12 —Anhein aluguragua aban bupaisanun ebüréu lungua bun lun bidamunme, würi yebe wügüri yebe, sísirügübei irumu leseriwidun bun; lisedünme irumu ábame bígiragüdüni. 13 Ani danme bígiragüdüni, móunahan bubéi lau lúhabu málouga, 14 bíchuguba animaalugu lun hádangiñe bibiñanigu, saragu türigu tuma diwéin, bafanreinhabei sun buiti le líchugun Bungiu bun luma. 15 Mabulieidabei luagu idamuni lan meha giñe buguya Ehiptu, aba lesefurunibu Wabureme le Bubungiute. Ligía níchugunbalin lúrudu le bun guentó.

16 —Gama lumoun anhein ariñaga bidamun luagu mabusenrun lan lígirunibu ladüga bínsiñe lun hau sun biduheñu, ani buidu lan bóuseruni; 17 ábame banügün aban gürabu gágiriti, banügeime idamuni ligía lun babalachagüdüni luagun tubenari buban, ábame báfuduruni larigei, ábame bidamunhali lan lun sun dan. Ligiamémeba giñe badüga anhein würi tubéi idamuni tuguya. 18 Maribanlá larihín bun bígiragüdüni bidamun, ladüga seriwihali bun sisi irumu luagu lamidan le lunbei hamuga bafayeiruni lun aban awadigimariduti buma le luáguti weyu, bóugudin luéi lira, labinirubadibu Wabureme le Bubungiute lidan sun le badüga.

19 —Sun furumiñeti animaalu wügüri temeilihan bilügün bágasu o mudún, lunti bederegeruni lun Wabureme le Bubungiute.

—Mawadigimaridagüdabéi furumiñeti tiráü bilügün bágasu, másarunbeime furumiñeti tiráü bilügün mudún. 20 Béigibaña sagü irumu hama biduheñu ligibugiñe Bungiu lidan fulasu le lanúadirubei. 21 Gama lumoun anhein danima lubéi, o adamahati, o marihinti o furumiñeguarügü lan danimaü, madagaragüdün bubéi lun Bungiu. 22 Béigibei lidan uburugu le ñein lumuti baganawa, ani gayaraabei heigin súngubei lídangiñe, haruma hagía yebe wiye ligibugiñe Bungiu, kei dan le leigín usari. 23 Gama lumoun moun lumuti béigini lita, báwiyureime múarugun kei báwiyurun duna.