1 —Ánheindügü hamuga asaliragua aban profeta haganagua o aban lan le ariñaguti lila uénedü, ladimureha hamuga luagu lasusereduba lan aban milaguru o aban lan katei hanufunati, 2 ánheindügü hamuga agunfulira le lariñagubei, ani lariñagame hun: "Falá wamá amu búngiugu ha ibidiñetiña hun; keimoun wáhuduragua houn!" 3 Madüga humatia gasu lau lugundun busenti Wabureme le Hubungiute lóuchagunün lun larihin anhein hínsiñe lubéi hun tau sun hanigi, luma tau sun huani. 4 Falá huméi Bungiu le Hubungiute, lúnrügüla híchiga inebesei, aganba huméi lilurudun, hudugua humá lun, badüleñu huma luagu. 5 Profetati ligía o garíaahati ligía, lasiadirúba lun lounwen ladüga lálugun ládahanün lun hadüraaguni le lubeibei Wabureme le Hubungiute le esefurubalün lídangiñe amudirawaguni meha Ehiptu luma ladüga láfaagun lun ladireiragüdünün luéi üma le lariñagubei Wabureme le Hubungiute hun lun hafalaruni. Ítara luba hagumuchuni wuribati le haganaguati.

6 —Ánhabu línchaha bíbiri guánarügü o biráü o búmari o le meni bumada lun badügün kultu houn amu búngiugu ha ibidiñetiña bun ni houn bagübürigu, 7 kei habéi habungiutegu gürigia ha geyegubaña hau lúmagiñe aban lígirugu múa lumoun le aban, 8 mánharaba lun, madügabá gasu lau; magudemedalá bun, madouragun buguyame lau; 9 lubaragiñe lira, áfarabei hilagubei. Buguyaba furumiñe iñurei búhabu luagun, bárigiñeme ábame hadügüni sun lílana fulasu. 10 Chamuguabá dübü luagun darí lounwen, luéigiñe lálugun ladireirunibu luéi Wabureme le Bubungiute, le asagarubalibu Ehiptugiñe le meha ñein lubéi idamuni ban. 11 Ítara luba lasubudiruni sun Ísüraeli ábame hanufudedun lunya hadügün aban wuribani kei le.

12 —Danme haganóunña lan lidan luburugute ageiraü le lunbei líchuguni Wabureme le Hubungiute hun, lun hamugadügü haganbun hawagu 13 wügüriña ha adüraaguti le lubeibei Bungiu, chararagüda hamaña lílana uburugu ligía, ádahaña lun háhuduragun houn búngiugu ibidiñewatiña, 14 lunti hachíahan buidu libügürü katei ligía. Ánheinti inarüni lubéi adügǘwa lan aban figóu wéiriti ítara haganagua Ísüraelina, 15 ábame háfaraguniña lílana uburugu ligía tau eféin hau sun habiñanigu, günringua humeime sun le lídanbei. 16 Hóundaragubei sun lirisin lamidan párüke, ábame háguduni uburugu lau sun le hagidarubei luéi ágani lun lagudúniwa súngubei keisi idewesei gudawarügüti lun Wabureme le Hubungiute. Lerederuba uburugu ligía ítara lun sun dan, mararamundigiaalime.

17 —Meredera humá lau ni kata lídangiñe le rúaalibei lun lagünrinchawagun, ítara luba magañidun lan Bungiu huma; lubaragiñe lira, gudemehabubei hun ani lagibedaguagüdübadün keisi meha lariñaguni houn hagüchagu, 18 adügarügü humaali ligía lugundan Wabureme le Hubungiute, gúnfuli humeime sun gumadi le níchugubei hun uguñe, ani adüga humeime le úaraguabei ligibugiñe larihin Bungiu.