1 Aba lariñaguni Moisesi hama sun gumadimatiña Ísüraelina lúrudu burí le houn lílana fulasu:

—Gúnfuli huméi sun le nariñagubei hun uguñe: 2 Lárigiñeme hánhiñuraguni duna Hordán, belú huguyame lidoun fulasu le lunbei líchuguni Wabureme le Hubungiute hun, hiñuraguame fiu dübü wéinamuti hefeindiheime lau kali, 3 lun habürühani sun arufudahani le níchugubei hun uguñe luagu. Hadügeime ítara danme le beluhadün lidoun fulasu le rísibei ani buidu ligía lun bunaguaü, le lunbei líchuguni Wabureme le Hubungiute hun, ítara kei bugaha füramaselani houn hagüchagu. 4 Danme lubeiti hiñugua humaali duna Hordán, lunti hiñuraguni dübü le uágubei nariñaga hun luagu wübü Ebali, hefeindiheime lau kali. 5,6 Lunti giñe hadügün aban latarü lauti dübü ñein lun Wabureme le Hubungiute. Lunti lauti lan dübü le dayarüti, le mátarahounti. Ñein luagu latarü híchuguba adagaragüdüni gudawarügüti lun Wabureme le Hubungiute, 7 luma burí adagaragüdüni le lánina arandaruni, ábame heigin efeduha huguyame ñein ligibugiñe Wabureme le Hubungiute. 8 Lunti habürühani sun arufudahan le níchugubei hun lau sun lufurangun luagu dübü.

9 Lárigiñe aba lariñagun Moisesi hama fádirigu Lewitagu houn Ísüraelina:

—Maní humá Ísüraelina, aganba humá. Ñǘbuinhadün uguñe lun lumutuniñabadün lan Wabureme le Hubungiute. 10 Lunti lubeiti hadügüni le lubeibei, gúnfuli humeime lugumadin luma lilurudun le uágubei nariñaga hun uguñe.

11 Weyuméme ligía, aba lariñagun Moisesi houn gürigia:

12 —Danme hiñugua humaali duna Hordán, lunti hararamun lani Simeón, Lewí, Hudá, Isakárü, Hosé luma lani Benhamín türibu luagu wübü Gerisímü lun abinirúni, 13 hararamame lani Rubén, Gadü, Aserü, Sabulón, Dan luma lani Nefütalí türibu luagu wübü Ebali lun íñarawaguni. 14 Hariñagame Lewitagu houn sun Ísüraelina lau umalali héreti:

15 "Íñarawagua hamá sun ha adügütiña aban guáriua lautu wewe, dübü gürabu, o lauti furumiñeguarügü katei lun háhuduragun houn aramudaguarügü, ladüga mínsiñeti katei ligía lun Bungiu." Hóunabame súngubei ariñaga: "Ítarala."

16 "Íñarawagua hamá ha íchugutiña mabahüdǘni lun háguchi odi tun háguchu." Hóunabame sun gürigia: "Ítarala."

17 "Íñarawagua hamá ha asansiruti láfadaragun lufulasun habesinan lun híweruhani lumúan." Hóunabame sun gürigia ariñaga: "Ítarala."

18 "Íñarawagua hamá ha ayuridaguagüdütiña aban marihinti." Hóunabame sun gürigia ariñaga: "Ítarala."

19 "Íñarawagua hamá ha adügütiña marichaü lun aban terencha, tun aban würi hilaali túmari o lun aban méteñuhali." Hóunabame sun lílana fulasu ariñaga: "Ítarala."

20 "Íñarawagua hamá ha arounrutiña tuma lúmari háguchi, ladüga ǘnabuguagüda hamuti lau lira." Hóunabame sun lílana fulasu ariñaga: "Ítarala."

21 "Íñarawagua hamá ha agamaridutiña animaalu." Hóunabame sun lílana fulasu ariñaga: "Ítarala."

22 "Íñarawagua hamá ha agamaridutiña hatu, luéigiñe yebe lóubadina háguchi o tuéigiñe lan yebe háguchu." Hóunabame sun gürigia ariñaga: "Ítarala."

23 "Íñarawagua hamá ha agamaridutiña hámedi." Hóunabame sun gürigia ariñaga: "Ítarala."

24 "Íñarawagua hamá ha áfarutiña gürigia háledi hilagubei lidan magurabahan hamani." Hóunabame sun gürigia ariñaga: "Ítarala."

25 "Íñarawagua hamá ha eresibirutiña seinsu lun háfarun aban gürigia madurunti." Hóunabame sun gürigia ariñaga: "Ítarala."

26 "Íñarawagua hamá ha minebenti arufudahani burí le houn, ani madügün haméi le ariñawagúbei lidan." Hóunabame sun gürigia ariñaga: "Ítarala."