1 —Anhein lariha aban hídangiñe lilügün lupaisanun bágasu o mudún féridiñu, lunti lanügüni lun lupaisanun. 2 Ánheinti mama lubéi lubesinan le labureme animaalu ligía ani mama giñe lasubudiragun, ábame lanügüni animaalu ligía lúbiñoun darí lachülürün labureme anügei; ábameti láguyugüdüni lun. 3 Ligiaméme giñe lunbei hadügüni dan le hadariruni lilügün furumiñeguarügü gürigia burigü, lumandan o furumiñeguarügü lumegen.

4 —Anhein lariha aban hídangiñe lilügün lupaisanun burigü o bágasu héiguañu ǘmadarugu, lunti líderaguni iñuraguei.

5 —Moun lumuti tayusurun würi ladaüragun wügüri, ni wügüri tadaüragun würi, lugundun iyereehabúti Bungiu houn sun ha adügüti burí katei le.

6 —Le adariruti aban tumasa dunuru luagu aban tídibu wewe o múarugu lan, hau harahüñü dunuru o hau lan tigañén, anuha háguchu famuñu hawagu, moun lumuti lanügüniña dunuru hau sun tirahüñü, 7 tirahüñürügübaña lanüga ígira háguchu lun tidin. Ítara luba buidu lan dan lun, ani migifebei libagari.

8 —Danme lábunagun aban hídangiñe aban muna iseri, lunti líchugun baríeiru geyegua lau tábulugu; ítara, ha éiguadutiña ñéingiñe aba hounwen, madurunbaña liduheñu lidan.

9 —Mábunaguabei bibeibein-agei lau sun luwuyeri ilaü, féridibiñalin súngubei, dandu ilaü le bábunubei kéigubeirügü lin beibei.

10 —Mawouha huméi hichari lau aban feru animaalu ha ámuñegueinatiña kei burí aban bágasu luma aban burigü.

11 —Madaüra humá daüguaü tautu gamisa to tautu lana tuma to tautu linu.

12 —Ru humá árurugu wéndeti luagu gádürü tarigei manda to auboun hadouragua haugua.

13 —Anhein anüga aban wügüri aban würi lun lúmarime, lárigiñe lerederun tuma aba taminsiñedun lun, 14 ñéingiñe aba lagumeserun íchiga luriban iri tuagu lau lariñagun: "Aba namarieidun tuma würi to, gama lumoun danbei le narounrun tuma aba nasubudiruni luagu féridi taali lan tiñǘn." 15 Lidan kesi le, lunti houdin tagübürigu nibureinharu tugía ayanuha hama gumadimatiña lidan fulasu le ñein lubéi haguseragüda ábameti harufudunu tagübürigu sidi to auboun tarumuga haráü lárigiñebei tamarieidun, sidi tugía gawagubalin tita haráü, lauba harufudei luagu láugiru lan buga tiñǘn tamarieidunbei 16 lariñagame túguchi houn ábutigu: "Ru numutu niráü lun wügüri le, gama lumoun mínsiñeharu lun guentó, 17 líchigati luriban iri tuagu guentó, lariñaga luagu mámaaru lan buga lau tiñǘn lubá. Gama lumoun anihán seini tuagu sidi to luagu liyeeni lan." Ábame látulerunu sidi hagibugiñe ábutigu. 18 Ábameti hárügüdüni ábutigu wügüri ligía ábame habeichuni, 19 ábame hafayeiragüdüni san murusun pülata lun túguchi nibureingiru tuguya leweñegua líchugun luriban iri tuagu aban nibureingiru Ísüraelina. Ani lúmarimemeboun, siñabei lígiragun tuma lidan sun libagari.

20 —Gama lumoun anhein inarüni lubéi luagu mañünharu lan buga nibureingiru tuguya, 21 ábame hasagarunu gumadimatiña tubenarin luban túguchi, ábame hachamuragun wügüriña ha lílana uburugu ligía dübü tuagun lun tounwen, ladüga tadügün aban óunwenbu wuribani libe lira Ísüraeli, luma ladüga tǘnabudagüdüniña tílana luban túguchi lau tóuserun. Ítara luba hagumuchun lau wuribani le haganaguabei.

22 —Anhein adarirawagúa aban wügüri tuma aban würi maríeitu, háfarawaguba biángubei hagía. Ítara luba hagumuchun lau wuribani le haganaguabei.

23 —Anhein gadaradun tubéi aban nibureinharu to máfuridungiru luma aban wügüri, aba ladarirunu amu wügüri uburugu aba larounrun tuma, 24 hanügǘba biángubei hagía ligibugiñoun lúrudu uburugu, ñeinba lubéi hasiadirúa lun lachamurawagún dübü hawagun lun hóunwegun: Nibureinharu tugía ladüga magúaragun tan amuriaha ídemuei, wügüri ladüga ladügüni lira tun aban nibureinharu to gadaradunhaaru luma amu. Ítara luba hagumuchun lau wuribani le haganaguabei.

25 —Gama lumoun anhoun ladarira aban wügüri ladari amu wügüri áraabu, aba lafosurunu lun tarounrun luma, wügürirügübei ligía afarúa. 26 Tuguya madügǘnwabei ni kata tau, lugundun madügüntu duru le lunti tafarún luéigiñe; ítara liña kesi lira kei wügüri le ageindagubei luma ábanya wügüri aba láfaruni hilagubei; 27 lugundun tábugua ladariroun würi irahü tuguya áraabu, íbini hamuga tagúaragun úabei yebe íderagutu.

28 —Anhein adunragua aban wügüri tuma aban nibureinharu to madaradungiru lun tamarieidun, aba lafosurunu lun tarounrun luma, aba hadarirawagún, 29 lunti líchugun wügüri ligía dimí-san seinsu pülata lun túguchi nibureinharu tuguya; keiti dürǘ laali lan tiñǘn, gasu lanügünu lúmarime, ani siñabei lígiragun tuma lidan sun libagari.

30 —Moun lumuti larounrun ni aban tuma lúmari lúguchi, ladüga ǘnabugugüda lumuti lúguchi ítara.