1 Lariñaga Moisesi houn gürigia:

—Huguya lirahüñübei Wabureme le Hubungiute. Madüga humá biti huougua, mélechun humeime hichügü higibugiñe dan le lounwen somu gürigia. 2 Lugundun gürigia anuadirúatiña lun Wabureme le Hubungiute huguya, anúadira laadün hádangiñe sun gürigia ha ubouagubaña lun huguyaba lan lumegen.

3 —Meiga humá ni kata le wíyeti.

4 —Añahán burí animaalugu ha gayaraabei héiginiña: Bágasu, harahüñü mudún, harahüñü gábara, 5 usari, gamosu, gábara áraabuna hama sun hawuyeri usari.* 6 Sun lubeiti animaalugu ha fánreinguati hábara lidan biama águyuguagüda haméi hachaguhani heigin gayaraati heiginiwa. 7 Gama lumoun añahán ha lúnbaña meigin humaniña íbini anhein águyuguagüda habalin hachaguhani heigin o fánreingua lan lúbara hagudi:

—Kameyu, másaraga luma mapachi; lunti hanügüniña keisi animaalugu wíyetiña, águyuguagüda hamuti hachaguhani heigin gama lumoun mafanreinragunti lúbara hagudi.

8 —Buíruhu, lugundun fánreingua lan lúbara hagudi gama lumoun máguyuguagüdün hamuti hachaguhani heigin. Lunti hanügüniña keisi animaalugu wíyetiña. Meiga humaña burí animaalugu hagía, maguruhan humeime hágubu dan le hilaaña.

9 —Hádangiñe animaalugu ha dúnarugubaña gayaraabei héiginiña ha garünabaña, ani garura hagía, 10 gama lumoun meiga humá hádangiñe animaalugu baranahana ha marünatiña, ani marura hagía, lunti hanügüniña keisi animaalugu wíyetiña.

11 —Gayaraati heigin sun hawuyeri dunuru harumatiña, 12 gama lumoun añahein ha moun lubéi héiginiña, kei burí: Ágila, dunuru gáhalahati abun, ágila baranahana, 13 milanu hama sun hawuyeri guriguri, 14 sun hawuyeri sanadi, 15 awesüturusu, duguyu, sáwarawara, sun hawuyeri kin, 16 garún, íwisi, sísüne 17 yalifu, wadubi, korumorán, 18 yábura, abubíya luma búriri.

19 —Sun hawuyerigu íñenaü ha garünatiña lunti hanügüniña keisi animaalugu wíyetiña moun lubéi héiginiña. 20 Ánhañati dunuru ha anügǘbaña keisi harumatiña, gayaraabei héiginiña.

21 —Meiga humá ni aban animaalu le óunweti lungua, lugundun lumutuniña Wabureme le Hubungiute huguya, gama lumoun gayaraabei híchuguni lun terencha le aganóuti huburuguterugu, ligía, gayaraabei léigini. Gayaraati giñe haluguruni lun terencha le chülüguarügüti húmagiñe.

—Mábougua humá gábara ñǘraügili lidan timiligin lúguchu.

22 —Sagü irumu, gasu hadireirun diisi lídangiñe san lídangiñe sun ilaü le halubahan. 23 Lídangiñe diisi lídangiñe san ligía le tídangiñeti türigu, diwéin, garaba, luma hádangiñe furumiñetiña harahüñü hilügüniña bágasu hama mudún, héigibei ligibugiñe Bungiu lidan fulasu le lanúadirun lúbanme liri, lun hafurendeirun lichugúniwa inebesei súnwandan lun Wabureme. 24 Ánhaünti labinira Bungiu, gama lumoun mosu hadügün aban wéiyaasu migifeti lun hanügüni diisi lídangiñe san, ladüga lidise fulasu le lanúadirubei Bungiu lúbanme liri le ñéingiñe lubéi haganawa, 25 ábame haluguruni, ábame hanügüni lebegi lidoun fulasu le lanúadirubei Bungiu. 26 Lau seinsu ligía, ábame hagañeihani le uágubei haritagua luagu lunti lan lagañeihóun: Bágasu wügüriña, mudún, diwéin o furumiñeguarügü uniñein le achouhaali, le habusenrun; ábame héigini ñein ligibugiñe Wabureme le Hubungiute, ábame hefeduhan hau sun hiduheñu.

27 —Mígira humeitia hetenirun houn Lewitagu ha aganóutiña le ñein humuti, kei le michugún lubéi múa houn kei hun.

28 —Sagü ǘrüwa irumu, lunti hadireiruni lidiisin lídangiñe san le halubahan lidan irumu, ábame hareiduni huburuguterugu, 29 lun danme lan hayabin Lewitagu ha mamúanbaña, o terencha lan ha haganaguabaña, o méteñuhaña lan hama würiña hilaguaaña úmari, gayara láamuga heigin darí hakimuledun. Ítara luba labinirunün Wabureme le Hubungiute lidan sun le hadüga.