1 Lariñaga Moisesi houn Ísüraelina:

—Danme beluhadün lidoun fulasu le lunbei líchuguni Wabureme le Hubungiute hun, aganawa huguyame ñein, 2 lunti hanügüni furumiñeti alubahani le líchugun múa hun, ábame hanügüni lidan aban faniñe lidoun fulasu le lanúadirun Wabureme le Hubungiute keisi luban liri. 3 Ábame bidin lumoun fádiri ñein, bariñagame lun: "Ariñagatina uguñe ligibugiñe Bungiu le Nubungiute luagu beluhadina lan lidoun ageiraü le uágubei meha lariñaga Bungiu houn wagüchagu luagu líchugubei lan woun." 4 Ábame lanügüni fádiri faniñe le bederegerubei lun, ábame líchuguni ligibugiñe lani Bungiu latarü; 5 bariñagameti ligibugiñe Wabureme le Bubungiute:

«Fiúrügüñanu meha gürigia Aramüna nagüchagu, gürigia éibudügütiña ebelurutiña Ehiptun, aba herederun aganawa ñein, aba hayabin lun hagibedagun, gabafu hagía. 6 Gama lumoun aba hóuseruniwa Ehiptuna wuriba, aba hasufuriragüdüniwa barǘ hamawa hadamunme. 7 Ábati wamuriahan luma Aburemei le Habungiute wagübürigu lun líderaguniwa, aba laganbuni wayumuragun, arihaléi lueirin gudemei, luma lidere wadagimanu luma amudirawaguni le gádanbaliwa; 8 aba larufuduni lueirin lubafu aba lasagaruniwa Ehiptugiñe 9 aba lanügüniwa lidoun fulasu le, aba líchuguni múa le woun le ñein lubéi saragu ibagari. 10 Ligía nanügünbalin furumiñeti tin nadü lídangiñeti múa le líchugubei Bungiu nun guentó».

—Lárigiñeme ábame badagaragüdüni faniñe ligibugiñe Wabureme le Bubungiute, ábame báhuduragun liñúarü. 11 Lárigiñeme ábame befeduhan luagu sun le ru laalibei Wabureme le Bubungiute bun luma houn biduheñu. Hefeduhaba giñe Lewitagu hama terencha ha aganóubaña haganagua buma.

12 —Ságüme ǘrüwa irumu ligíaba híchuguni lidiisin lídangiñe san lídangiñe halubahan le lánina irumu ligía, óundara humeime hafaran terencha ha aganóubaña bageira, luma hafanran méteñuhaña luma giñe hafanran würiña ha hilaaña hámarigu, lun gayara lan hadariruni sun éigini le hemegeirubei. 13 Lárigiñeme ábame bariñagun ligibugiñe Wabureme le Bubungiute:

«Direi naali núbiñegiñe le lunbei lanuadirúniwa lun Bungiu lídangiñe le nalubahabei, afanreinha naali hadan Lewitagu hama terencha ha aganóubaña fulasurugu, luma hadan méteñuhaña hama würiña ha hilaaña hámarigu, agunfulirei sun le bariñagubei nun madüraagunganei bubalinti mabulieidunganei ni aban lídangiñe gumadi le bíchugubei. 14 Méigingidina ni kata lídangiñe diisi lídangiñe san sun dan le naubei amuisera o lidan nadariragun nungua wíyeñu ligibugiñe Bungiu, madagaragüdünnei houn hilaaña. Nabureme, gúnfuli naali bugumadin ani adüganéi le uágubei bariñaga nun. 15 Arihabá wawagun siélugiñe binibawa wagía le Ísüraelina ha bumutuniña binibéime múa le ru baalibei woun, le ñein lubéi saragu ibagari. Ítara kei bugaha füramasebani houn wagüchagu».

16 —Lariñahare Wabureme le Bubungiute bun uguñe lun badügüni le lariñagubei lúrudu luma burí gumadi le; gúnfulibei tau sun banigi luma tau sun buani. 17 Ariñagaadibu uguñe luagu Bubungiute lan Bungiu, ani füramasehadibu bafalaruni lémeri luma bagunfuliruni lilurudun luma bagunfuliruni lugumadin luma lun badügüni le lubeibei súnwandan. 18 Ariñagaali giñe Bungiu uguñe luagu huguya lan Ísüraelina lumutuniñabaña, ítara kei meha füramaselani, lun hagunfulirubei lan sun lugumadin. 19 Ladügüba aban néchani wéiriti bídangiñe, le íñugutimati lidan uéiriguni, le aganbahóuati luagu, luma le buíduti liri hawéi híbiri néchanigu ha ladügübaña, ítara huba kei lariñaguni, gürigia anuadirúatiña lun Wabureme le Hubungiute.