1 Aba lasigirun Moisesi ayanuha houn Ísüraelina:

—Gürigia le sáfunwati o le lan bíwaaru lóustarun, máhawabei lun lidan lidamurin Bungiu.

2 —Máhawabei lun isaani le bástadi lidan lidamurin Bungiu, ni íbini hádangiñeti hadiisin inebanfangu.

3 —Meresibirúnwabaña Amonna hama Moábüna lidan lidamurin Bungiu, ni íbini lárigiñe hadiisin inebanfangu; 4 lugundun dan le hásügürünbei hamúanrugugiñe, lárigiñe háfuridun Ehiptugiñe, míchutiña duna ni éigini hun; bóugudin luéi lira fayei hamuti Balaamü le liráü Beoru, le ñǘbuinbei Petorugiñe le lani Mesopotamia lun líñaragunün. 5 Gama lumoun maganbun lumuti Wabureme le Hubungiute Balaamü, aba lagarabaaguni líñaragun lun abinirúnime hun, ladüga hínsiñe lun. 6 Máluaha humá lubeiti darangilaü ni buiti houn lidan sun habagari.

7 —Lau sun lira, marufuda humá mínsiñehabuni houn Edomuna, lugundun hiduheñu hagía, ni houn Ehiptuna marufuda humá giñe mínsiñehabuni lugundun aganawatün hageira; 8 hámagiñe háürüwan hanebanfangu hadügawagun Edomuna hama Ehiptuna ha awinwandutiña humúanrugu gayaraahalime hádangiñe hamá lidamurin Bungiu.

9 —Danme hawuribuhaña lan hama háganiñu lun kianpu-ágeiruguñadün lan, áfaagua humá lun madügün humá ni kata le wíyeti ligibugiñe Bungiu. 10 Anhein adariragua aban hídangiñe lungua lidan iwiyei, ligibugiñe Bungiu ladüga lígiragüdün larumugunrugu, gasu láfuridun kiánpurugugiñe luagu sun weyu. 11 Rábounweyumeti ábame lachibagun lungua lau duna, danme lálüdün weyu gayaraayaalime lebelurun kianpu-ágeirugun.

12 —Ñeinbei aban fulasu bóugudi tuéi kianpu, le ñéinhinba lubéi hidin awiyeda. 13 Lidan hílagu gasu ñeinbei lan aban wewe súnwandan lun hachigin aban huyu lau lun hawiyedun lidoun, lásurun ábame hámuñachuni. 14 Ladüga éibugañaha liña Wabureme le Hubungiute haganagua kiánpurugu, lun lóunigirunün luma lun lagañeiragüdünün hawagu háganiñu; gasu lubeiti aban lan fulasu harumati hikianpun-agei, lun marihin lan Bungiu iwiyei ñein, lugundun anhein asusereda ítara, ladiseduba huéi.

15 —Anhein anuraha aban idamuni luéi labureme lamuriaha lerederun huma, mederegera huméi lun binadu labureme. 16 Ígira huméi lun lerederun aganawa huma lidan uburugu le hínsiñetimati lun, lidan fulasu le lanúadirun, moun lumuti lañawarihan ni aban lun.

17 —Ni aban hídangiñe würi o wügüri moun lumuti hahoruhan, kei ha gíbebaña habungiutegu. 18 Seinsu agañeiruti lau ahoruhani manügǘnwabei litenpulunrúgun Wabureme le Hubungiute, lun lafayeirúniwa füramasei le ladüga somu gürigia lun Wabureme, lugundun iyereeguti igaburi lira lun Bungiu.

19 —Mafosu hubéi aban hupaisanun lun lafayeihan ligibuagun le hafuredeirun lun, seinsu yebe, éigini yebe o furumiñeguarügü katei le gafuredeihóuati lau fáyeiti ligibuagun. 20 Gayaraabei haguburahan ligibuagun le hafuredeihan lun terencha, gama lumoun moun lumuti hadügüni lun aban hupaisanun ítara luba labinirunün Wabureme le Hubungiute lidan sun le hadüga lidan ageiraü le lunbei hibihini.

21 —Danme hadügün aban füramasei lun Wabureme le Hubungiute, madarasaralá hagunfuliruni, ladüga chouru huméi luagu lafayeiragüdübadün lan Wabureme le Hubungiute luagu, ani gafigoubadün. 22 Anhaün madügün ni aban füramasei, madügüntün figóu; 23 gama lumoun anhaün adüga aban füramasei lau hugundan lun Wabureme le Hubungiute, lunti hagunfuliruni.

24 —Danme hebelurun lidoun lubeibein-agei aban gürigia híledi, gayaraabei héiginu sun beibei to habusenrun, gama lumoun siñabei hanügün ni aban lidan hufaniñen. 25 Anhaün ásügüra lídangiñe litürigun-agei aban Ísüraelina, gayaraabei héiginu sun türigu to hátügürün lau húhabu, gama lumoun mama lun híbaahanu türigu lau aban alubaagülei.