1 —Fádirigu Lewitagu, hameme hádangiñebaña lani Lewí türibu, mafanranbaña malagante hagíame kei ha híbiri Ísüraelina. Lídangiñeba le adagarawagüdübei lun Bungiu luma le yuubei lun Bungiu hawinwanda. 2 Meresibirunbaña alagan kei hapaisanun, lugundun Bungiu halagantebei, ítara kei lariñaguni.

3 —Anihán le burí yuubei houn fádirigu hádangiñe bágasu wügüriña hama harahüñü mudún ha hadagaragüdübaña gürigia: Yuubei ǘgürügü le lanaganébu houn, láribugu luma lagei leigin, 4 luma giñe burí furumiñeti lin türigu, diwéin luma garaba, luma furumiñeti hayu mudún lidan hasahóuniwa; 5 ladüga anúadira laaña Wabureme le Hubungiute hádangiñe híbiri türibu lun hagíaba lan etenira lun kultu lun Bungiu.

6 —Anhein asandiragua aban lewita lungua le lídangiñeti aban fulasu le hageira luagu lunti lan lidin lidan fulasu le lanúadirubei Bungiu, 7 gayaraabei ladügün kultu ñein lidan liri Bungiu kéigubeirügü sun líbirigu Lewitagu ha ñéinbaña eseriwida lun Bungiu, 8 leresibiruba éigini kei le heresibirubei, bóugudin luéi le lunbei libihini lídangiñe lalagante lúguchi.

9 —Danme beluhadün lidoun ageiraü le lunbei líchuguni Wabureme le Hubungiute hun, máyeiha huméi lagübüri hagaburi néchanigu hagía. 10 Ualá ni aban hídangiñe adagaragüdüti liráü ni ásügüragüdei lídangiñe watu gemeti, maríaagüdün huguyame, málugun huguyame hariñaguni katei le lunbei lasuseredun, mabiñarahan huguyame, 11 marumaagüdün huguyame hewe, málügüdahan huguyame hama garíaahatiña, ni hama búyeigu, ni hama hilaaña. 12 Lugundun mínsiñetiña ha adügübaña katei líbeina le lun Bungiu. Ánheinti chagá lubaliña Wabureme le Hubungiute néchanigu ha hubaragiñebaña, gagaburirügühañalin lagübüri usa burí le. 13 Huguya, lunti úaragua humá lidan ligaburi hóuserun ligibugiñe Bungiu.

14 Aba lasigirun Moisesi ariñaga houn gürigia:

—Néchanigu ha laburiña múa le lunbei líchuguni Bungiu hun, adügatiña gasu hau ha ariñagubaña luagu subudi hamani le lunbei lasuseredun hama ha garíaahadibaña, ánheinti huguya, máhati Wabureme le Hubungiute lun hadügüni katei burí le.

15 —Ladügüba Wabureme le Hubungiute lun ñeinbei lan aban profeta kei au hídangiñeti, lunti hadügüni le lubeibei. 16 Ligía meha katei le hamuriahabei luma Wabureme le Hubungiute luagu wübü Orebü, weyu le hóundaragunbei ñein sun huguya aba hariñagun: Mabusenruntiwa waganbuniya lumalali Aburemei le Wabungiute, ni lun warihiniya óunwenbu watu gemeti le, luéi wóunwegun. 17 Ábati lariñagun Bungiu nun: "Buiti le hariñagubei. 18 Nasagaruba aban profeta hádangiñe kei buguya, aban le hupaisanun lun lariñaguni nererun houn. 19 Sun le madügünti gasu lau le lariñagubei profeta ligía lidan niri, naguseragüdübei luagu. 20 Gama lumoun profeta le ariñaguti luagu lidan lan niri ladimureha, ani lariñagame katei le mama nariñagun lun, o ladimurehan lan lidan hiri amu búngiugu, lasiadirúba lun lounwen." 21 Anhaün ariñaga húnguarügü: "Ida lubati wasubudiruni anhein mama lubéi lererun Bungiu le ariñawagúbei?" 22 Anhein magunfulirun katei le lariñagubei profeta lidan liri Bungiu, mámarügü liña lererun Bungiu, lariñagagüdün lupantan profeta ligía lun; manufudeda humá lubeiti luéi.