1 Aba lasigirun Moisesi ariñaga houn:

—Ísüraelina, aganba humá: Chülüha oura lun hánhiñuraguni Hordán, lun hidin ásiuragua néchanigu ha gíbetimatiña ani gabafutima huéi, luma burí uburugu wéinamuti le gabarieirunti le íñuburiti; 2 wéinamutiña lílana ani gágububuritiña kei ladügawagun hígandei Anakü, subudi humaali le ariñawagúbei: "Kaba gayara lageindagun hama ladügawagun hígandei Anakü?"

3 —Guentó lubeiti, lunti hasubudiruni luagu Bungiu lan le Hubungiute awanserubei hubá hubá, ani ítara liña lan kei aban watu gemeti le águdubalin sun le ladarirun lubarua, le lunbei lagünrinchaguniña ani ǘnabuguagüda láñame néchanigu hagía higibugiñe. Hasagarubaña günringua humañame lidan murusun oura, ítara kei füramase lani Bungiu hun.

4 —Danme chagá laaña Wabureme le Hubungiute hiñúarürugugiñe, mariñaga humaametia: "Rula Bungiu ageiraü le woun, ladüga garicha wamá lun." Mama liña, lasagarubaña lubéi Bungiu, ladüga hariban. 5 Mama ladüga richagua humá, mama giñe ladüga hareini hárügüdübei lubéi ageiraü; lachagarubaña Bungiu higibugiñe ladüga hariban luma lun lagunfuliruni füramasei le ladügübei lun Abüraámü, Isaakü luma Hakobu ha hagüchagu. 6 Lunti hasubudiruni luagu mámaba lan ladüga hubuidun líchigei Wabureme le Hubungiute múa buiti le hun, lugundun huguya dereti haganbun.

7 —Moun lumuti habulieiduni luagu gáñigüda humani Wabureme le Hubungiute lidan fulasu mageirawati. Lúmagiñe háfuridun Ehiptugiñe darí lumoun hachülürün lidoun fulasu le, súnwandan maganbadi humá lun. 8 Gáñigüda humuti meha Bungiu luagu wübü Orebü, ani wéiriti bugaha lagañidun darí yebe lun lagünrinchagunün. 9 Múdeitina luagun wübü lun nanügüni dübü fadati le ñein lubéi bürüwañu lan daradu le ladügübei Bungiu huma, aba nerederun ñein bián-wein weyu luma bián-wein áriebu meigin matun. 10 Ábati líchuguni Bungiu bián dübü ligía nun, labürühan lau lúhabu le gawagubalin sun dimurei le buga lariñagubei hun luagu wübü labadinaguagiñe watu gemeti, weyu le wóundaragunbei sun wagía. 11 Lárigiñe bián-wein weyu luma bián-wein áriebu ligía, aba líchuguni Bungiu bián dübü ligía le lánina daradu nun, 12 aba lariñagun nun: "Moisesi, rariba yáagiñe furese, lugundun gürigia ha basagarubaña Ehiptugiñe, chararaa. Ígira hamá hagunfuliruni le nariñagubei houn, adügaaña aban guáriua lauti gürabu rǘrüguati lun háhuduragun lun."

13 —Ariñagati giñe Bungiu nun: "Ariha naali luagu deré lan haganbun gürigia ha. 14 Mouchabátia bebegirun nun hawagu, ladüga nagünrinchaguaaña ani maritawagúnwaalime luagu winwan hamá meha ligibuagu múa, gama lumoun nadügüba aban néchani héretimati ani gíbetima hawéi bídangiñe."

15 —Dan le nararirunbei luéigiñe wübü le durungubei barüina niñalin dübü fadati le ñein lubéi bürüwañu lan daradu núhaburugu. 16 Gama lumoun dan narihinbei luagu afigouhaadün lan ligibugiñe Bungiu, ani adügaadün lan aban liyawa aban bágasu ñǘraügili lauti gürabu rǘrüguati, ígirei üma le lariñagubei Bungiu hun lun hafalaruni, 17 aba náhuchuruni biángubei dübü fadati le nanügübei núhaburugu aba nabouchaguni higibugiñe. 18 Lárigiñe aba náhuduragun ligibugiñe Bungiu, aba nerederun kei buga nadügüni furumiñe, bián-wein weyu luma bián-wein áriebu nau méiginga mátunga ni kata, ladüga figóu le hadügübei, le aubei hanabaguei Bungiu aba hagañidagüdüni. 19 Hanufudeguaadinameti buga ladüga igañi le larufudubei Bungiu huagun, darí hamuga lun labusenrun lagünrinchagunün, gama lumoun ábaya laganbuni Bungiu nayumuragun. 20 Gáñiti giñe Bungiu saragu lun Aarón, busenti yebe lagünrinchaguni, gama lumoun aba nadimurehan luagu lufulesein; 21 lárigiñe aba nárügüdüni liyawa bágasu ñǘraügili le hadügübei, le aubei hafigouha, aba náguruni lidoun watu gemeti, lárigiñe aba namuligiduni darí lerederun lun kalikime, ñéingiñe aba nachagaruni lidoun liraüraü duna le ararirubei luéigiñe wübü.

22 —Gáñigüda humuti giñe Bungiu Taberá Masá luma Kibürótu-atawá. 23 Danti le lariñagunbei Bungiu hun lun hígiragüdün Kadesi-barünéagiñe lun hidin árügüdei ageiraü le lunbei líchuguni hun, maganbaditün giñe lun lugumadin, mafiñetün luagu, maha huguya hadügüni le lubeibei. 24 Lúmagiñe nasubudirunün mabuchahagubeiñadün lun Bungiu! 25 Keiti buga ariñaga laali lan Bungiu lagünrinchagubadün lan, aba nerederun bián-wein weyu luma bián wein áriebu hudugu ligibugiñe Bungiu, 26 aba nayumuragun, nariñaga lun: "Bungiu Baba, magünrinchaguabaña gürigia ha bánigu, ha besefurubaña lau buéirigun, ha basagarubaña Ehiptugiñe lau óunwenbu bubafu. 27 Haritaguabá luagun bubuein Abüraámü, luagun Isaakü luma luagun Hakobu. Meberesenbá lau hamaganbadin gürigia ha ni lau hariban ni lau hafigoun. 28 Mariñawagún láamuga lidan ageiraü le ñéingiñe lubéi basagarawa: Siñá lumutiña Bungiu ebelaagüda lidoun ageiraü le uágubei lariñaga houn, keiti heyereegunbei lun, aba lasagaruniña yáagiñe lun hóunwegun lidan fulasu mageirawati. 29 Gama lumoun hagía bánigubaña, bageira le banúadirubei; hagía basagarubaña Ehiptugiñe lau lueirin bubafu."