1 —Guentoti, Ísüraelina, aganba huméi lúrudu luma gumadi le arufudaha náalibei hun, gúnfuli huméi gabagari humaamuga, yusu humeime ageiraü le lunbei líchuguni Bungiu le Habungiute wagüchagu hun. 2 Míchiga humatia lanwoun le nariñagubei hun, magida huguyame lídangiñe. Gúnfuli huméi lugumadin Bungiu le nariñagubei hun. 3 Ariha humaali le ladügübei Aburemei lidan fulasu le gíribei Baali-peoru, ariha humuti láfaraguniña ha áhuduragubaña lun Baali le lubungiute fulasu ligía, 4 gama lumoun sun huguya ha agunfulirubaña luma Aburemei le Wabungiute, ǘnhagua wínwanñu. 5 Arufudaha naali lúrudu luma gumadi le uágubei lariñaga Aburemei le Nubungiute nun lun hadügüni lidan ageiraü le lunbei hageira lan. 6 Gúnfuli huméi ani adüga humeime, lugundun ítara luba hasubudiruni gürigia luagu lichú aau luma lualin ichügü hidan, lugundun danme haganbunün ayanuha luagu burí lúrudu le, hariñaguba: "Chuti giñe hau néchani ha!" 7 Lugundun, kagia néchani wéiriti lueirin gabungiutebaña yarafati houn ítara kei liyarafan Aburemei le Wabungiute woun sagü wagúaruni? 8 Kagia néchani wéiriti galurudunbei, gagumadin ligía le úaraguati kei sun arufudahani le, le níchugubei hun uguñe? 9 Góunigi humá lubeiti lun mabulieidun humani burí katei le ariha humaalibei, madireirun ligíame haritagunrugugiñe, lubaragiñe lira, subudigüda huméi houn hisaanigu luma houn hibañan.

10 —Wéyubei le ligibugiñe wabéi Wabureme le Wabungiute luagu wübü Orebü, aba lariñagun Aburemei nun: "Óundaraguabaña lílana fulasu aganba hamaamugei nererun, furendei hamaamuga lichugún inebesei nun sagü weyu lidan habagari, arufudaha hagíame houn hasaanigu lun giñe ítara lan hadügüni." 11 Ábati hayarafadun lugudinóun wübü Sinaí le ídangiñebei láfurida watu gemeti le íñubei lelelehan, leeti lugumulelin aba lasaliragun dúerime le dereguati ani wurí ligia; 12 ábati ladimurehan Bungiu hun labadinaguagiñe watu gemeti ligía. Aganba humuti lererun, gama lumoun bóugudi luéi haganbuni lumalali, marihintün ni kata. 13 Subudigüda lumuti Aburemei lidaradun hun, diisi gumadi le labürühabei luagu bián dübü, le uágubei lariñaga hun lun hagunfuliruni. 14 Ariñagati nun lun narufudahani lúrudu luma gumadi hun, le lunbei hagunfuliruni lidan fulasu le lunbei hageirabei lan.

15 Aba lasigirun Moisesi:

—Weyu le ladimurehanbei Aburemei huma labadinaguagiñe watu gemeti luagu wübü Orebü, marihintün ni aban iyawaü. Góunigi humá lubeiti 16 lun mábürühan humá lidoun wuribani adaagua iyawaü lenege wügüri o würi, 17 ni hayawa animaalugu, ni dunuru, 18 ni animaalu aduruuharügütiña múarugu, ni úduraü. 19 Ani danme harihin sielun, lun harihini weyu, hati, waruguma luma sun le harihin ñein, mábürüha humá lidoun figóu lun háhuduragun houn, lugundun Aburemei le Wabungiute adügübaliña houn sun gürigia ha ubouagubaña. 20 Huguyati, Bungiu asagarubalün Ehiptugiñe le ítarabei meha kei aban régigi le larürüdaguagüle gürabu, aba ladügünün ítara kei hubéi guentó: Ageiraü le lánibei. 21 Lau sun lira, gáñiti buga Bungiu numa hadüga, aba láfiñurun luagu mánhiñuragun nubéi lan duna Hordán, mebelu aume lidoun lubuidun múa le lunbei líchuguni hun lun hánime. 22 Lau sun lubeiti nóunweba lan lidan ageiraü le, ani mánhiñuragun nubéi duna Hordán, huguya hánhiñuragubei, ábame hárügüdüni múa buiti ligía. 23 Gama lumoun góunigi humá luéi habulieiduni daradu le ladügübei Aburemei le Hubungiute huma. Madüga humá guáriua hubungiutegume, ni iyawaü ha uágubaña lariñaga Wabureme le Hubungiute hun lun madügün humani, 24 lugundun emeiditi Aburemei le Hubungiute, aban watu gemeti ligía le gágudaditi katei!

25 —Danme gasaaniguhadün, gabañagua, danme wéiyougaadün lidan ageiraü le, anhaün ǘnabudaguagüda hungua lau hadaagun guáriua o iyawaü lan ha mínitiña furumiñeguarügü katei, adüga wuribani ítara ligibugiñe Aburemei le Hubungiute, agañidagüdei, 26 ru numuti sielu luma múa uguñe keisi gefenti luagu madisebei lan hagumuchagun lídangiñe ageiraü le lunbei hárügüdüni loubafurugu Hordán. Mabagaridunbadün saragu dan lidan fulasu le, hagumuchaguba sunsuinagubei. 27 Lachagaragubadün Aburemei haganaguóun néchanigu, ani fiúrügübaña hídangiñe móunwegun hadan. 28 Heseriwiduba houn búngiugu ha hadüga wügüriña ñein, guáriua ha láutiña wewe, luma dübü, ha marihinbaña, maganbun, meigin, mawaragun. 29 Gama lumoun anhaün agúara luagu Aburemei le Hubungiute ñein tau sun hanigi luma tau sun huani, hadarirubei. 30 Danme hásügürün lídangiñe sun súfuri le, anhaün agararaagúa lun Aburemei, adüga humeime le lubeibei, 31 ligía, kei luéirinbei lareini, mágurun lubadün ani magünrinchagun lubadün giñe, mabulieidagun ligíame luéi daradu le ladügübei hama hagüchagu, le uágubei láfiñura luagu lagunfulirubei lan.

32 —Álügüdaha humá luagu dan le sügühalibei, dan meha le úagidün lubéi, lúmagiñe ladügüni Bungiu wügüri ubouagu; éibuga huméi sun fulasu hálügüdahame anhein susereñahaali lubéi o aganbúaali lan luagu katei wéiriti kei le. 33 Añahein funagia gürigia ha aganba hamaali lumalali Bungiu adimureha houn labadinaguagiñe watu gemeti kei huguya, ani móunweguntiña? 34 Aniheinhali funagia aban bungiu le anúadiruti aban ageiraü lídangiñe líbiri ageiraü, lau saragu óuchawaguni, seini, milaguru luma wuribu, arufudeina óunwenbu ubafu, adügeina libe burí katei hanufunati, kei burí le ladügübei Wabureme le Hubungiute higibugiñe luma huagu uburugu Ehiptu? 35 Larufudúnbei katei le hun, lun hasubudiruni luagu Aburemei lan Búngiubei le inarüniti, ani ua lan amu bóugudi luéi. 36 Adimurehati hun siélugiñe lun laranseruni hóuserun, múarugu arufuda lumuti lueirin líleme gemeti hun, ani aganba humuti ladimurehan labadinaguagiñe watu gemeti ligía. 37 Hínsiñetiña meha hagüchagu lun, aba lanúadiruniña hálawagu, aba lasagarunün Ehiptugiñe lau lueirin lubafu. 38 Bugati néchanigu gíbetimatiña ani gabafutimatiña huéi hubaragiñe, lun huguyaba lan árügüdei hageira keisi humegen ítara kei le aubei lasusereda uguñe weyu.

39 —Da huméi lubeiti haritagunrugun buidu luagu Aburemei lan Bungiu, dandu sielu kei ubouagu, ani ua lan amu kei ligía. 40 Gúnfuli huméi lilurudun luma lugumadin le níchugubei hun uguñe weyu, ábame buidu lan lidin hun luma houn hílawagu, ábame habagaridun saragu irumu lidan ageiraü le lunbei líchuguni Wabureme le Hubungiute hun.

41 Lárigiñe aba lanúadirun Moisesi ǘrüwa uburugu luéigiñe oubaü le ñéingiñe lubéi laboucha weyu libiti duna Hordán, 42 lun le lan áfaruti aban gürigia mabusenrunga, le mageindagunñahagili luma, lun gayara lan laramudagun lidan aban lídangiñe uburugu ligía lun lesefurun. 43 Anihán burí uburugu ligía: Béserü, lidan fulasu mageirawati, houn lani Rubén türibu, Ramotu, uburugu Galaadü, houn lani Gadü türibu, luma Golán, uburugu Basán, houn hamidan lani Manasési türibu.

44 Anihán arufudahani le lederegerubei Moisesi houn Ísüraelina, 45 luma burí gumadi luma lúrudu le lasubudirágüdübei houn dan le háfuridunbei Ehiptugiñe, 46 dan meha añahagua luéigiñe oubaü le ñéingiñe lubéi laboucha weyu libiti Hordán, luagu fulasu wayati le ligibugiñebei Betü-peoru, lumúanrugu Sihón, le harúeite Amoruna. Esübón meha laganawa Sihón, aba láfaruni Moisesi hama Ísüraelina dan le háfuridunbei Ehiptugiñe. 47 Aba hárügüdüni Ísüraelina lumúan Sihón luma lumúan Ogu le lurúeite Basán, bián urúeigu Amoruna ha meha aganóubaña luéigiñe oubaü le ñéingiñe lubéi laboucha weyu libiti Hordán. 48 Aroerügiñe lagumesera hamúan, laru duna Arünón chülǘ luagun wübü Sirión, lememe gíribei Erümón, 49 luéigiñe sun Arawá luéigiñe oubaü le ñéingiñe lubéi laboucha weyu libiti Hordán chülǘ luagun Barana Hilaali, ǘnabu libiti wübü Pisügá.