1 Lariñaga Moisesi houn Ísüraelina:

—Anhaün adarira aban hilaali áraabu lidan ageiraü le lunbei líchuguni Wabureme le Hubungiute hun hánime, ani ibidiñewati ka lan áfarubalin, 2 lun hadandiahani ábutigu hama aguseragüdütiña lidise fulasu le ñein lubéi hilaali luma uburugu burí le yarafatimabei. 3 Ábameti hanügün ábutigu ha lílana uburugu le yarafatimabei aban bágasu ñǘraügiru to michugúngili yugu tuagu, 4 ábame hanügünu lidoun aban fulasu le wayati le ñein lumuti aban duna malulinti ani madaaradi ligía ani fulasu wayati ligía lunti giñe mawadigimaridunwagili lan ni aban wéiyaasu, ábame háhalachuni tigiina ñein.

5 —Lárigiñeme ábame hayabin fádirigu Lewitagu, ladüga hagía lanúadirubaña Bungiu lun hagía lan gamanihari lau kultu luma lun habinihan lidan liri Bungiu. Lidan sun kesi le lánina lágieru hagíaba ariñagei lagumuhóun dimurei. 6 Lárigiñeme ábame hachibuni ábutigu ha uburugubaña háhabu tigibuagu bágasu ñǘraügiru to hilaaruboun, 7 ábame hariñagun: "Mama wáfarun gürigia le, marihin wamuti giñe ida liña lan háfaruni. 8 Bungiu Baba, ferudunabaña Ísüraelina ha bumutuniña, ha besefurubaña, míchigabei duru luáguti lafarún aban madurunti hawagun." Ítara luba maguserawagüdün hamá luagu lounwen gürigia ligía, 9 huguyati hadügüñeinme le úaraguabei ligibugiñe larihin Bungiu, ábame hagidaruni duru luagu óunweni ligía haganaguagiñe.

10 —Danme hageindagun hama háganiñu, lun lederegeruniña Wabureme le Hubungiute húhaburugun, 11 anhein ariha aban hídangiñe aban würi magadiñetu hadan aba tínsiñedun lun aba lamarieidun tuma, 12 gasu lanügünu lúbiñoun, ábame lásaragüdüni tídiburi, íbaaha túbara 13 ragá daüguaü to tuáguboun dan le tábürühanbei húhaburugun, ábame terederun aganawa lúbiñe ayahuahaña tagübürigu luagu aban hati dayarüti. Lárigiñeme lira, gayaraahalime lerederun Ísüraelina ligía tuma, ábame haganóun hámagua. 14 Ánhounti aminsiñeda lun lárigiñe, gayaraabei lígirunu tungua; gama lumoun siñabei lalugurunu, siñá ligíame lóuserunu kei idamuni, lugundun fósurügü lumutu lun terederun luma.

15 —Anhein biámañanu lubéi lúmarigu aban wügüri ani hínsiñetu aban lun, anhoun to aban mínsiñetu lun, gama lumoun garahüñütiña biángubei hagía lau, ani tiráü to mínsiñeboun lun íbugañaünbei, 16 lídanme lachülürün dan lun lafanreinhani gürigia ligía alagan hadan lirahüñü, siñabei lóuseruni tiráü to hínsiñeguboun keisi ígiramaü, lugundun ladügüba wuribati lun tiráü to mínsiñeguboun, ladüga ligía íbugañaünbei. 17 Gasu lánharun luagu ligía lan liraübei le ígiramaü ani gasu líchugun dóbuli lun lídangiñe le yuubei lun ladüga ligía lan furumiñeti lin lere, ani anihein sun irichaü le lani ígiramaü luagu.

18 —Anhein garáü lubéi aban gürigia aban irahü maganbaditi ani mabuchahati, le madügünti gasu lau le hariñagun lagübürigu lun, ni íbini dan le habeichuni meberesenti hau, 19 lunti hanügüni lagübürigu hagibugiñoun ábutigu lílana uburugu, 20 hariñagame houn: "Dereti laganbun wasaani ani mabuchahati; mabahüdün lumutiwa, salufuriti, gátaati." 21 Ábameti hachamuragun sun wügüriña ha lílana uburugu dübü luagun darí lounwen. Ítara luba hagumuchun lau wuribani le haganaguabei, dánmeti hasubudiruni Ísüraelina ábame hanufudedun.

22 —Anhein asiadirúa aban gürigia lun látigiruniwa luagu aban tídibu wewe lun lounwen luéigiñe ladügün aban duru hǘrüti, 23 moun lumuti ligirún lúgubu dibiñu ñein sun áriebu, gasu labunún weyuméme ligía, lugundun íñaragua lumuti Bungiu sun le óunweti dibiñu luagu aban tídibu wewe, ani huguya, moun lumuti hawiyeduni múa le lunbei líchuguni Wabureme le Hubungiute hun hánime.