1 Aba lamudeirun Moisesi lídangiñe fulasu mageirawati le lani Moabü luagun dabíara Nebu, lábulugun wübü Pisügá le ligibugiñebei Herikó: Aba laríaguagüdüni Bungiu sun Galaadü lun ñéingiñe, darí lumoun lumúan Dan, 2 lumúan Nefütalí, Éfürain, Manasési, sun lumúan Hudá chülǘ lumoun barana Mediteraniu, 3 Négebü, lani Hordán fulasu wayati, luma fulasu mawübüriti le lani Herikó, luburugute yaraüwa-agei, darí Sóarü. 4 Aba lariñagun Bungiu lun:

—Anihán ageiraü le bugaha uágubei náfiñura lun Abüraámü, Isaakü luma Hakobu, luagu níchugubei lan houn hagüchagu. Ígira náadibu lun barihini lau bagu lau sun mebelubadibu lan ñeinhin.

5 Ábati lounwen Moisesi le lubúein Bungiu lumúanrugu Moabü, kei buga lariñaguni Bungiu lun, 6 aba lábununi Bungiu lidan aban fulasu wayati le lani wübü Moabü, ligibugiñe Betü-peoru, lidan aban fulasu le ibidiñebei ni ka un dagá lumoun dan le. 7 San-wein irumu lau dan le lóunwenbei, chülǘ lumoun dan le lóunwenbei, magadeirunti larihin, ani buíduti giñe látuadi.

8 Aba hayahuahani Ísüraelina Moisesi luagu darandi weyu lidan fulasu mageirawati le lani Moabü, ítara liña hagunfuliruni hamuiserun lárigi. 9 Ibihaaliti buga Hosué le liráü Nun lichú aau lúmagiñe Moisesi, ladüga dagagüda laali buga Moisesi lúhabu lábulugu lidan liri Bungiu; aba lubeiti hadügüni Ísüraelina le lubeibei Hosué, aba hadügüni sun katei kei lariñaguni Bungiu lun Moisesi.

10 Gama lumoun úadigiaali bugaha amu profeta Ísüraeli kei Moisesi le úmati ladimureha Bungiu gagibugu, 11 o le lan adügüti burí milaguru le ladügagüdübei Bungiu uburugu Ehiptu lun urúei Ehiptuna hau lánigu luma sun lageira, 12 o le lan ítarati kei ligía lidan ubafu luma burí luéinamun katei le ladügübei hagibugiñe sun lílana Ísüraeli.