1 Lárigiñebei lounwen Moisesi, le lubúein Bungiu, aba lagúarun Wabureme lun Hosué, le liráü Nun, le meha íderagubalin Moisesi, lariñaga lun:

2 —Kei hilá lubéi Moisesi, guentó buguya lunbei bánhiñuraguni duna Hordán hau sun Ísüraelina, lun hidin lidoun fulasu le lunbei níchuguni hun. 3 Kei buga füramase nani lun Moisesi, níchugubei lan sun fulasu le ñein lumuti híchigei hugudi hun. 4 Luéigiñe suru níchugubei múa le lúmagiñebei fulasu mageirawati hun, dagá lumoun Líwanu luéigiñe nórute, lúmagiñeti óunwenbu duna Éufüratesi luéigiñe oubaü le ñéingiñe lubéi laboucha weyu, darí lumoun sun hamúan Étüna dagá lumoun barana le Mediteraniu luéigiñe oubaü le ñeinhin lubéi lálüda weyu. 5 Úabei agagibudaguti lungua buma lidan sun bibagari, ani búmabadina ítara kei meha luma nan Moisesi, mígirun nubadibu bábugua. 6 Áfaaguaba lubeiti ani ganigi buguyame ladüga buguyaba afanreinhei múa haganagua numutuniña, ladüga ligía lan alagan le füramase nubéi houn hagüchagu. 7 Ábanrügüñein namuriahan buma, lun báfaagun ani ganigi buguyame, gúnfulibeime sun lúrudu le líchugubei Moisesi le nubúein bun. Gúnfulibei kei lubeibei, buidu láamuga lidin bun lidan sun le badüga. 8 Águyuguagüdabei le tariñagubei liliburun lilurudun Bungiu súnwandan, saminabá luagu, áriebu wéyuagu, lun badügüni le nariñagubei súnwandan. Ítara luba lasalirun sun le badügübei bun buidu. 9 Au ariñagubei bun lun báfaagun ani ganigi buguyame. Manufudedabá, meferidirunbeime buguraasun, ladüga au, le Bubungiute le Babureme, búmabadina ñein lumuti bidin.

10 Ábati lariñagun Hosué houn ábutigu fulasurugu:

11 —Heiba tidan sun kianpu hariñagame houn sun gürigia lun haranserun éigini, ladüga ǘrüwa weyu lárigiñe le, wánhiñuraguni duna Hordán lun woudin lidoun fulasu le lunbei líchuguni Wabureme le Wabungiute woun.

12 Adimurehati giñe Hosué houn lani Rubén türibu lani Gadü luma houn dimí lani Hosé türibu le gíribei Manasési, lariñaga houn:

13 —Haritagua humá luagu buga le lariñagubei Moisesi le lubúein Wabureme, luagu líchugubei lan Wabureme le Hubungiute múa le hun, lun gayaraabei lan hemeraagun ñein. 14 Ígira humaña húmarigu ya, hirahüñü hama hibiñanigu lidan fulasu le líchugubei Moisesi hun luéigiñe oubaü le ñéingiñe lubéi laboucha weyu libiti Hordán. Ánheinti sun wügüriña ha gayaraahalibei houdin awuribuha, barǘ hamóun hárumate, heiba habá habá hábirigu, lun híderaguniña, 15 darime líchugun Wabureme aban fulasu houn lun herederun huma, ítara kei líchuguni hun, darime giñe laburemehaña lan múa le lunbei líchuguni Wabureme houn. Lárigiñeme, gayaraahalime hagiribudun humúanrugun luéigiñe oubaü le ñéingiñe lubéi laboucha weyu libiti duna Hordán, lun hárügüdüni fulasu le buga líchugubei Moisesi le lubúein Wabureme hun lau sun linarün.

16 Aba hóunabun, hariñaga:

—Wadügübei sun le bariñagubei woun, wóudiba giñe le ñeinhin lumuti bóunahawa. 17 Wóudiba lau le bubeibei súnwandan, kei meha woudin lau le lubeibei Moisesi. Lérügüñein wamuriahabei buma, lun buma lan Wabureme le Bubungiute ítara kei meha luma lan Moisesi. 18 Sun le awügürihóuti bun, o midin lan lau le bubeibei, lóunweba. Ábanrügüñein katei wamuriahan buma lun báfaagun ani ganigi buguyame.