1 Ábati lóunahan Hosué bián aríaahatiña Sitimügiñe aramudaguarügü, lariñaga houn:

—Heiba arihei uburugu Herikó.

Aba houdin, aba hachülürün ñein Herikó túbiñoun aban horu gíritu Raabü, aba hásügürüni guñoun ñein túbiñe. 2 Aba lawisarúniwa lurúeite Herikó, hariñaga lun:

—Ñǘbuinhaña bián Ísüraelina guñoun le aríaahei fulasu.

3 Ábati lóunahan urúei wügüriña ariñaga tun Raabü:

—Sagabaña wügüriña ha búbiñebaña, ladüga hayabiña aríaahei fulasu.

4 Ábarüga taramuduniña, tariñaga:

—Inarüni luagu ñübuin hamá biama eyeriñu núbiñe, gama lumoun ibidiñeti nun halíana hamá. 5 Aba houdin dan le aguñedeina lan, ladüga ligía lan lidaani ladourun lubenari uburugu,* ibidiñeti nun haliñoun lan houdin. Gama lumoun anhaün ñüdün hárigi furese, gayaraabei hárügüdüniña.

6 Warigüda taaña bugati tábulugun muna,* ñéinñanu aramudaguñu labadinagua güraguati sagadi le burí ichugúbei ñein lun lamabeidun.

7 Ábati houdin luwügüriñan urúei áluahaña luéigiñe üma le luágunbei duna Hordán, ítara kei háfuridun súdara, aba ladourun lubenari uburugu. 8 Lubaragiñeti harumugun aríaahatiña hagía, aba tawarirun Raabü le ñeinhin habéi, tariñaga houn:

9 —Subudi numuti luagu ru laali lan Aburemei uburugu le hun, ladüga adügaali lun laweiridun wanufude huéi. Sun ha aganóubaña ya, láfaraaña anufudei huéi. 10 Subudi wamuti luagu mábeigüdalani Bungiu barana funati lun hásügürün dan le háfuridunbei Ehiptugiñe, subudi wamuti giñe luagu gumuguagüda humaniña Sihón luma Ogu, bián harúeitegu Amoruna, ha meha loubafurugubaña duna Hordán. 11 Wéiriti anufudei le wawagubei lau wasubudiruni katei le, darí lun ua lan ni aban lun lagagibudagun huma. Lugundun Aburemei le Hubungiute, Bungiu ligía dandu sielu kei ubouagu. 12 Ligía namuriahanbei huma lun háfiñurun nun luagu Aburemei, luagu hóuserubaña lan niduheñu buidu, ítara kei nadügüni hun. Ru huméi hererun nun luagu ítara luba lan; 13 feruduna humeime giñe libagari núguchi, tuma núguchu, níbirigu, luma sun le hánibei. Sefu humawa luéi óunweni!

14 Aba hariñagun tun:

—Lauba wabagari guánarügü wóunaba luagu hibagari, mariñagunrügaadibu ligía ni kata luagu katei le. Danme ru laali Wabureme múa le woun, wóuserubadibu buidu.

15 Keiti ligibuaguñoun lan lubarieirun uburugu muna,* to ñein lubéi taganawa Raabü, aba tarariragüdüniña lau aban gúrudu lídangiñe funedera. 16 Tariñaga houn:

—Heiba áraabun madarira hamaamugaün ha áluahabalün. Haramudaguame ñein luagu ǘrüwa weyu, darime hagiribudun ha áluahabalün uburugun. Lárigiñeme, gayaraahalime hidin luagu héibugun.

17 Aba hariñagun tun:

—Wagunfulirubei áfiñuruni le wadügübei bun. 18 Gama lumoun danme le webelurun uburugun, badibiragüdeime gúrudu funati le luagu funedera le ñéingiñe lubéi barariragüdawa ábameti bóundaruniña bíbirigu búbiñe, búguchi, búguchu hama sun liduheñu búguchi. 19 Ánheinti áfurida aban hádangiñe búbiñegiñe, madurunbadiwa luagu lounwen. Gama lumoun anhein asusereda somu katei lun le búmati búbiñe, wagíaba lun warihin lau. 20 Anhein giñeti babahüdagua katei le, gayaraahalime magunfulirun wamani áfiñuruni le wadügübei bun.

21 Tariñaga houn:

—Anha, ítara luba. Ábati tayouragun houn, aba houdin. Lárigiñe, aba tagüürüni gúrudu funati luagu funedera.

22 Ábati houdin bián aríaahatiña hagía áraabun, aba haramudagun ñein luagu ǘrüwa weyu, sun añaha lan súdaragu áluahaña lidan sun fulasu, madari hamutiña, darí lun hagiribudun hárigoun uburugun Herikó. 23 Ábati hararirun aríaahatiña áraabugiñe, aba hánhiñuraguni duna, aba hagiribudun le ñeinhin lubéi Hosué, aba habahüdaguni sun le asuseredubei houn lun. 24 Hariñaga lun:

—Ru laali Wabureme sun fulasu ligía woun. Sun ha aganóubaña lidan uburugu ligía, láfaraaña anufudei wawéi.