1 Dan le wéiyaali Hosué, aba lariñagun Wabureme lun:

—Buguya wéiyaadibu, ani aniheingua saragu múa lun lagañeirun. 2 Aniheingua sun hamúan Filistéana hama Gesuruna, 3 lúmagiñe duna Sioru, luéigiñe oubaü le ñéingiñe lubéi laboucha weyu libiti Ehiptu darí ligibugiñe Ekürón luéigiñe nórute, le anügǘbei kei lumúan Kanán; añahein seingü ábutigu Filistéana ñein: Lábuti Gasa, Asüdódu, Asükalón, Gadü luma Ekürón. Aniheingua giñe hamúan Aweuna, 4 luéigiñe suru, luma sun hamúan Kananna, lúmagiñe burí haburugute Sidonna, darí Afekü fadagu luma hamúan Amoruna. 5 Aniheingua giñe hamúan Gebalüna luma sun Líwanu luagun oubaü le ñéingiñe lubéi laboucha weyu, lúmagiñe Baali-gadü; ǘnabu libiti wübü Erümón darí lebelaagüle Amatü. 6 Nabugagubaña Sidonna hama sun ha aganóubaña áraabu lúmagiñe Líwanu darí Misürefótu. Bafanreinheime múa houn Ísüraelina kei buga nariñaguni bun. 7 Bafanreinheime hadan nefu türibu hama lamidan lani Hosé türibu le gíribei Manasési.

8 Lani Rubén luma Gadü türibu hama lamidan lani Hosé türibu le gíribei Manasési, ibiha hamaali meha hafanran dan le líchugunbei Moisesi múa houn luéigiñe oubaü le ñéingiñe lubéi laboucha weyu libiti Hordán. 9 Ibiha hamuti lúmagiñe Aroerü, laru duna Arünón, luma uburugu le lamidanguabei fulasu wayati, luma sun Medebá, darí Dibón, 10 lau sun burí luburugute Sihón le urúei Amoruna, Esübón, darí fadaguaü hama Amonna. 11 Ibiha hamuti giñe Galaadü luma hamúan Gesuruna, hamúan Maakana, luma wübü Erümón luma sun lumúan Basán darí Salüká, 12 Sun le ñein lubéi meha lagumadiha Ogu le lurúeite Basán, le meha agumadihabei Asütarótu luma Edüréi, le meha giñe lagumuhóun hádangiñe Refaímüna ha labugubaña Moisesi lídangiñe fulasu. 13 Ha lílana Gesuru luma Maaká, mabugawaguntiña ñéingiñe, rédeitiña aganawa hadan Ísüraelina chülǘ lumoun dan le.

14 Míchuti Moisesi fulasu houn lani Lewí türibu, ladüga idewesei le águdahoubei lun Wabureme le Lubungiute Ísüraeli, ligía hafanranbei, ítara kei meha lariñaguni Wabureme.

15 Afanreinhati giñe múa houn lani Rubén türibu según hibe liduheñu, 16 ítara liña lubeiti, lagumesera hamúan lúmagiñe Aroerü, laru duna Arünón, luma uburugu le lamidanguabei fulasu wayati darí Medebá, 17 darí Esübón luma sun burí uburugu le lídanbei fulasu mawübüriti: Dibón, Bamotü-baali, Betü-baali-meón; 18 Haasü, Kademótu, Mefatü, 19 Kiriataimü, Sibümá, Séretü-saarü, le luágubei luwübüri wayati, 20 Betü-peoru, Betü-hesimótu luma burí louba wübü Pisügá, 21 ligiaméme burí uburugu le lídanbei fulasu mawübüriti luma sun le ñein lubéi meha larúeiha Sihón, le urúei Amoruna le arúeihabei Esübón. Áfaragua laaña meha Moisesi Sihón hau sun lirahüñü urúei Madianna ha eseriwidubaña lun: Ewí, Rékemü, Suru, Uru, luma Reba. 22 Áfara hamuti giñe Ísüraelina Balaamü le garíaahadibei le liráü Beoru. 23 Sun burí uburugu luma lirahüñü fulasu le líbiri hamúan lani Rubén türibu, le afanreinhóubei houn según hibe haduheñu, chülǘ duna Hordán.

24 Afanreinhati giñe Moisesi múa houn lani Gadü türibu según hibe haduheñu. 25 Ibiha hamuti Haserü luma sun burí luburugute Galaadü, lamidan hamúan Amonna, darí uburugu Aroerü le ligibugiñebei Rabá, 26 luma fulasu le labadinaguabei Esübón, Ramatü-misüpé luma Betonímü, luma labadinagua Manaímü luma láfadaragun Debirü. 27 Lidan fulasu wayati, ibiha hamuti Betü-aramü, Betü-nimürá, Sukotu luma Safón le erederubei lídangiñe fulasu burí le meha lábugiñebei larúeihan Sihón, urúei Esübónna. Lueirin lubeiti hamúan lúmagiñe oubaü le ñéingiñe lubéi laboucha weyu libiti Hordán, darí lumoun suru libiti duna Kineretü. 28 Ligía burí uburugu luma lirahüñü fulasu le habihibei lani Gadü türibu, según hibe haduheñu.

29 Afanreinhati giñe Moisesi múa houn lamidan lani Hosé türibu le gíribei Manasési según hibe haduheñu. 30 Ibiha hamuti sun le meha lánibei Ogu le lurúeite Basán, sun Basán lúmagiñe Manaímü, lau ǘrüwa-wein fulasu le lani Hairü, 31 lamidan Galaadü luma burí uburugu le Asütarótu luma Edüréi. Sun le, houn hamidan ladügawagun Makirü le liráü Manasési lichugúa según hibe liduheñu.

32 Ligía burí fulasu le líchugubei Moisesi houn lidan fulasu mawübüriti Moabü, luéigiñe oubaü le ñeinhin lubéi lálüda weyu libiti Hordán, ligibugiñe Herikó. 33 Ánheinti houn lani Lewí türibu, míchuti fulasu, ariñagarügüti houn: «Wabureme le Lubungiute Ísüraeli halagantebei».