1 Anihán burí lufulasun Kanán le heresibirubei Ísüraelina kei hani, ítara kei hederegeruni fádiri Eleasárü, Hosué hama hábutigu haduheñu hani Ísüraelina türibu houn. 2 Lau ubunuruni lafanreinhóua fulasu hadan nefu türibu dimí, kei meha lariñaguni Wabureme lun Moisesi lun ladügüni 3 lubaramegiua, rúhali buga Moisesi fulasu houn lani Rubén luma Gadü türibu luma houn lamidan lani Hosé türibu le gíribei Manasési loubafurugugiñe Hordán, ánheinti houn Lewitagu, míchuti fulasu. 4 Biámañanu meha türibu hadan ladügawagun Hosé, le lani Manasési türibu luma le lani Éfürain, ánhañati Lewitagu mibihintiña ni murusun múa, luéidigia uburugu lun hawinwandun ñein luma burí fulasu lun hagüriahóun ibiñani. 5 Ítara kei lariñaguni Wabureme lun Moisesi, ítara liña hafanreinhani Ísüraelina múa.

6 Aba houdin ladügawagun Hudá Gilügáli adimureha luma Hosué, ábati lariñagun Kalebü le Keneséu, le liráü Hefuné lun Hosué:

—Haritaguabá luagu le meha lariñagubei Wabureme lun Moisesi Kadesi-Barünéa nibügürü luma bibügürü. 7 Bián-wein meha irumu nau dan le lóunahanbalina Moisesi Kadesi-barünéagiñe aríaahei fulasu, dan le nagiribudunbei, aba nadimurehan lun furangu. 8 Ha ñǘdünbaña numa, maguraasungüda hamutiña gürigia, ánheinti au rédeitina afiñeñu luagu Nubungiute le Nabureme. 9 Ábati láfiñurun Moisesi nun, lariñaga: "Múa le uágubei bíchigei bugudi, bánibei súnwandan hau badügawagun, ladüga rédeitibu deregüdagu ligibugiñe Nubungiute le Nabureme". 10 Sügühali bián-wein-seingü irumu lúmagiñe lariñaguni Wabureme katei le lun Moisesi, lidan meha dan le añaheingua lubéi Ísüraelina éibuga lidan fulasu mageirawati, ani keiti líchuguni lererun, anahagua wínwanñu. Guentó gádürü-wein-seingü irumu nau, 11 gama lumoun héregidina kei dan meha le lóunahanbalina Moisesi aríaahei fulasu, ani gayaraagili nánhingichun, gayara nageindagun kei meha dan lügüra. 12 Ligía namuriahanbei buma guentó, lun bíchuguni fulasu gáraabuteti le füramase lubéi Wabureme nun. Subudi bumuti lúmagiñe dan ligía luagu ñein lan haganawa ladügawagun hígandei Anakü, luagu wéinamu burí lan haburugute ani derebugu. Gama lumoun agurabatina lúaradun Wabureme numa íderaguana asagaraña ñéingiñe, kei buga lariñaguni.

13 Ábati labiniruni Hosué Kalebü, aba líchuguni Ebürón lun, lun lánime hau ladügawagun. 14 Ítara liña liabin lun lánibei lan Kalebü hau ladügawagun Ebürón chülǘ lumoun dan le, ladüga deregüdaguati buga Kalebü ligibugiñe Wabureme le Lubungiute Ísüraeli. 15 Kiriatü-arüwá ligía meha binadubei liri Ebürón, lugundun Arübá; aban meha lílawa Anakü le hígandei. Aganbahóuati meha luagu, lárigiñe le ñeinñein darangilaü fulasurugu.