1 Aba lariñagun Wabureme lun Hosué: Barübaña sun bisudaranigu, beiba ageindagua hama lílana uburugu Ai. «Manufudedabá, meferidirunbeime buguraasun. Nagañeiragüdübei wuribu bun kóntüra lurúeite Ai hau sun lumutuniña. Hánibei haburugute luma hamúan, 2 badügüba lun Ai lau sun lurúeite kei badüga lun Herikó lau sun lurúeite, gama lumoun guentó gayaraabei hanügüni hamegen ha háfaragubaña, hama habiñanigu. Aransebá lun bábürühan hawagun ibidiñoun houn lanagangiñe uburugu».

3 Aba laranserun Hosué hau sun lumutuniña lun houdin ageindagua hama lílana Ai. Aba lanúadahan darandi-milu wügüriña wuriburuguna, aba lóunahaniña áriebu 4 lariñaga houn:

—Aganba humá buidu: Heiba lanagangiñe uburugu, haramudaguame yarafa lun aranseñu lun hábürühan luagun. 5 Ha híbiri gürigia, hayarafaduba numa lubadun uburugu, dánmeti le háfuridun lílana uburugu lun hábürühan wawagun, ábame wanurahan hawéi kei furumiñeti wéiyaasu. 6 Héibaahabadiwa danme le wanurahan uburugugiñe, ladüga haritaguba luagu éibaaguagüdaya hamaadiwa lan. 7 Huguyati, ábame háfuridun lídangiñe haramudaguagüle, ábame hebelurun uburugun, ladüga líchugubei Wabureme le Wabungiute hun. 8 Danme le beluhadün, ábame háguduni uburugu, ítara kei lariñaguni Wabureme.

9 Ábati líchugun Hosué dimurei houn lun houdin, aba houdin, aba haramudagun labadinagua Beteli luma Ai, luéigiñe oubaü le ñeinhin lubéi lálüda weyu libiti Ai, ánheinti Hosué, aba lásügürüni áriebu kianpu-ágeirugu. 10 Larugan, aba saragia lan Hosué, aba labahüdüniña lumutuniña. Lárigiñe aba lidin habá habá úara hama ábutigu Ísüraelina lun hábürühan luagun uburugu Ai. 11 Aba hayarafadun sun luwügüriñanigu lun uburugu ligibugiñe, aba herederun luéigiñe nórute libiti, lerederati wayati hamidangua gürigia luma uburugu. 12 Aba laramudun Hosué seingü-milu wügüriña labadinagua Beteli luma Ai, luéigiñe oubaü le ñeinhin lubéi lálüda weyu libiti uburugu, 13 biánguañein lubeiti sétanu hau Ísüraelina, aban sétanu aramudaguñu luéigiñe oubaü le ñeinhin lubéi lálüda weyu libiti uburugu, le aban kianpu-ágeirugu luéigiñe nórute. Aba lawanserun Hosué áriebu ligía chülǘ lamidan wayati.

14 Dan le larihinbalin lurúeite Ai katei le, aba lóufudahan áfurida hau sun lánigu lun hageindagun hama Ísüraelina lidan fulasu wayati le lani Hordán, ibidiñounga lun luagu ñéinñanu lan amu Ísüraelina aramudagu lanagangiñe uburugu. 15 Aba hafamurun Hosué hama lánigu kamá hanurahaña aba héibaagun hawéi lílana Ai luéigiñe lémeri fulasu mageirawati. 16 Ábati habihin sun lánigu Ai dimurei lun héibaahaniña, lauti héibaahani Hosué, aba hadisedun luéi uburugu. 17 Úati ni ábanrügü wügüri lílana Ai luma Beteli erederuti mídinga éibaahaña Ísüraelina; gama lumoun lidan héibaahaniña, aba hígiruni lubenari uburugu daragu úouga kaba lan óunigirei. 18 Ábati lariñagun Wabureme lun Hosué:

—Rubei seini lun hábürühan luagun uburugu Ai, nederegeraali bun.

Aba líchuguni Hosué seini lun hábürühan luagun uburugu. 19 Ha bugati aramudagubaña, aba háfuridun furese lídangiñe haramudaguagüle, aba hábürühan luagun uburugu, aba hárügüdüni, aba háguduni.

20 Dan le hadigiragunbei lílana Ai hárigoun, aba harihin lamudeirun lugumulelin haburugute sielun. Siñaati hesefurun lídangiñe ni aban oubaü, ladüga Ísüraelina buga ha anurahabaña lidoun fulasu mageirawati, aba hagararaagun ageindagua hama. 21 Dan larihinbei Hosué hama híbiri Ísüraelina luagu beluha lan Ísüraelina ha buga aramudagubaña uburugun ani gudá hamá lan, aba hagararaagun ageindagua hama lílana Ai. 22 Ha bugati ebelurubaña uburugun, aba háfuridun ñéingiñe, ábati hadariragun lílana Ai houngua labadinagua bián here Ísüraelina ha ábürühabaña hawagun lílana Ai darí háfaraguniña súngubei. 23 Lurúeiterügüñein Ai máfarun hamá, aba hárügüdüni, aba hanügüni lun Hosué.

24 Lárigiñe háfaraguniña lílana Ai ha buga ñǘdünbaña éibaahaña tau eféin, aba hagiribudun Ísüraelina uburugun Ai, aba háfaraguniña ha ñéinbaña. 25 Weyu ligía, hilaguatiña dúusugubei milu gürigia ha lílana Ai, wügüriña würiña, 26 lugundun gúnfuli lumuti Hosué dimurei lun lagünrinchaguniña lílana Ai sunsuinagubei. 27 Aba herederun Ísüraelina hau animaalu luma burí katei le uburugubei, kei buga lariñaguni Bungiu lun Hosué, 28 aba láguduni Hosué uburugu Ai, aba lígiruni lidan günringuaü lun sun dan, ítara keimeme larihín guentó. 29 Aba ladibiragüdüni Hosué lurúeite Ai luagu aban tídibu wewe darí rábounweyu, danti le lálüdünbei weyu, aba lariñagun lun harariragüdüni lúgubu urúei lun háguruni lubenarin uburugu, luma lun híchaagun dübü ligibuagu. Aniheingua buga dübü ligía ñein chülǘ lumoun dan le.

30 Ábati ladügün Hosué aban latarü lun Wabureme le Lubungiute Ísüraeli luagu luwübüri Ebali, 31 kei buga lariñaguni Moisesi houn Ísüraelina, kei giñe le bürüwañubei tidan liliburuna lilurudun Moisesi: «Aban latarü le lauti dübü le máchuahounti. Ábati híchugun Ísüraelina adagaragüdüni le gudawarügüti luagu latarü arufuda haméi hadagaragüdün le lánina arandaruni». 32 Lárigiñe, hañúarü Ísüraelina, aba labürüdüni Hosué lúrudu le buga líchugubei Moisesi lun, luagu dübü le aubei ladügei latarü. 33 Sunti gürigia, dandu hadügawagun Ísüraelina kei terencha, wéiyaaña mutu, ábutigu hama aguseragüdütiña, aba hararamun tóubagiñe lubagüsina lidaradun Wabureme, hagibugiñe fádirigu Lewitagu ha anügübarun hégewagu. Lubá habinirún Ísüraelina, aba herederun hamidan luéigiñe oubaü le ñein lubéi wübü Gerisímü, hamidan luéigiñe oubaü le ñein lubéi wübü Ebali, kei buga lariñaguni Moisesi lúmagiñe furumiñeti dan.

34 Lárigiñe, aba laliihani Hosué sun dimurei le tídanbei liliburuna lúrudu, dandu abinirúni kei íñarawaguni. 35 Meredeti ni aban dimurei lídangiñe le uágubei buga lariñaga Moisesi maliihangalei Hosué hagibugiñe sun Ísüraelina, hau sun würiña, irahüñü hama giñe terencha ha aganóubaña hadan.