1 Larugan, binaafingiua, aba láfuridun Hosué hau sun Ísüraelina Sitimügiñe, chülütiña dagá lumoun duna Hordán; aba hemeraagun ñein lubaragiñe hánhiñuraguni. 2 Ǘrüwa weyu lárigiñe, aba houdin ábutigu tidan sun kianpu-agei 3 aba hariñagun houn Ísüraelina:

—Danme harihin hásügürün fádirigu Lewitagu barüina hamóun lubagüsin Wabureme, furí humá le ñéingiñe humuti ábame hidin hárigi. 4 Ítara luba hasubudiruni üma, lugundun úagili ni aban hídangiñe ásügürüti luéigiñe üma ligía. Gama lumoun mayarafada humá tun bágüsi, tanagangiñe humá súnwandan, kei burí aban kilometuru dise tuéi.

5 Lariñaga Hosué houn:

—Harumadaguagüda humá hungua ligibugiñe Wabureme, lugundun harihuba ladaagun milaguru haruga.

6 Lariñaga houn fádirigu: "Barǘ humóun lubagüsina daradu, hiñugua huméi duna habá gürigia".

Aba hanügünu fádirigu lubagüsina daradu aba hásügürün habá gürigia. 7 Ábati lariñagun Bungiu lun Hosué:

—Lúmagiñe uguñe, nadügüba lun inebetima ban houn Ísüraelina. Ítara luba harihini luagu anahein lan buma, kei meha luma Moisesi. 8 Ariñagabá houn fádirigu ha táubaña lubagüsina daradu, lun danme lan hachülürün laru duna Hordán, hararamaguame ñein dúnarugu.

9 Ábati lariñagun Hosué houn Ísüraelina:

—Yarafa humá aganbei le lariñagubei Wabureme le Hubungiute. 10 Anihánba katei le óuchawaguni luagu anihein lan Bungiu le wínwanbei haganagua, ani ítara kei awansereina humá agumuchaguagüdeina lubaña lan Kananna, Étüna, Eweuna, Féresüna, Hérühesina, Amoruna hama Hebusuna higibugiñe. 11 Ariha humóun lubagüsina lidaradun Labureme sun ubóu, tánhiñuraguaali lidunari Hordán higibugiñe. 12 Ligía anúadaha humá lubéi duusu wügüriña, aban lídangiñe kada türibu Ísüraelina. 13 Danme hadagaragüdüni fádirigu ha anügübarun lubagüsin Bungiu le Labureme sun ubóu hagudi dúnarugu, ábame lafanreinragun duna lidan biama; ábame lararamun léibaagun duna le ñǘbuinbei íñugiñe, ábame lararamun lun labuinchagun lidan aban.

14-16 Aba háfuridun Ísüraelina tídangiñe hakianpun lun hánhiñuraguni duna, fádirigu ha táubaña lubagüsina daradu habá habá. Danti le hebelurunbei fádirigu dúnarugun, aba ladüdürün hagudi lau duna le lárurugubei, aba lerederun léibaagun duna le ñǘbuinbei íñugiñe aba lararamagun lun labuinchagun lidan aban, dise luéi Adamü, uburugu le lubadubei Saretán. Dúnati léñaha ararirubei lidoun barana hilaali, aba lasigirun éibaagua darí lagumuchun. Ítara liña lafanreinragun duna, aba hánhiñuraguni Ísüraelina ligibugiñe uburugu Herikó. 17 Hiñugua hamuti sun Ísüraelina Hordán mábeiñu, sun añaha lan fádirigu ha táubaña lubagüsina lidaradun Bungiu rara lamidan Hordán lidan fulasu mábeiti.