1 Anihein buga aban baríeiru lauti dübü geyegu lau Herikó ani siñati láfuridun ni aban Herikógiñe, ni lebelurun, ladüga darúagua buga lubenari baríeiru lun lesefurun hawéi Ísüraelina. 2 Gama lumoun aba lariñagun Wabureme lun Hosué:

—Derege naali Herikó bun lau sun lurúeite hama lisudaranigu. 3 Huguya súdara Ísüraelina, adüga humá aban geyeguaü lau uburugu sagü weyu luagu sisi weyu. 4 Ábame houdin sedü fádirigu tubá tubá lubagüsina daradu tau aban fidu lautu liganchun mudún luma kada aban, lémeti lisedün weyu, ábame hadügün sedü geyeguaü lau uburugu, añahame fádirigu íñaahoun hafidun. 5 Danme le haganbun tínwinrun fidu aban ínwinruni le migifeti; ábame hagúaragun lau sun here, ábame lábürühan baríeiru lauti dübü le geyegubei lau uburugu. Ábameti lawanserun kada aban hídangiñe lun uburugun.

6 Aba lagúarun Hosué houn fádirigu, aba lariñagun houn:

—Barǘ humóun lubagüsina lidaradun Wabureme, ábame houdin sedü hídangiñe tubá tubá bágüsi tau fidu to lautu liganchun mudún.

7 Lariñagati houn híbiri gürigia:

—Heiba, ábame hegeyedagun lau uburugu. Wügüriña ha lánina wuribu, heiba tigibugiñe lubagüsin Wabureme.

8 Aba hadügüni súngubei sun le lariñagubei Hosué houn. Aba houdin sedü fádirigu tubá tubá lubagüsina lidaradun Wabureme, íñaaheina hamóun sedü hafidun, lubagüsinti Wabureme hárigi hárigi. 9 Wügüriña ha lánina wuribu, habá habaañanu fádirigu, hati árigibaña tárigi tárigiñanu bágüsi, añahati fádirigu meredeti híñaahanu hafidun. 10 Gama lumoun ariñagati Hosué houn gürigia lun héibugun maniñu darime lachülürün dan lun lariñagun houn lun hagúaragun lau sun here.

11 Aba ladügün Hosué lun tadügün lubagüsin Wabureme aban geyeguaü lau uburugu. Lárigiñe aba hagiribudun kianpu-ágeirugun, aba hásügürüni áriebu ñein. 12 Larugan, aba lásaarun Hosué binaafingiua, aba hanügünu fádirigu lubagüsin Wabureme. 13 Ha sedü fádirigu, tubá tubaañanu lubagüsin Wabureme, mararamagunga, merede ligía híñaahanu hafidun. Wügüriña ha lánina wuribu, habá habaañanu, ha híbiri tárigi tárigi bágüsi. Meredeti tíñaahan fidu. 14 Le libiaman weyu, ábaya hadügün aban geyeguaü lau uburugu, ábaya hagiribudun kianpu-ágeirugun. Sísiñein weyu hau adügei ítara.

15 Le lisedün weyu, aba hásaarun binaafingiua, aba héibugun geyegua lau uburugu, kei buga hadügüni lubaramegiua, gama lumoun weyu ligía, sédüñein geyeguaü hadüga lau. 16 Dan le hínwinrunbarun fádirigu fidu luagu lisedün wéiyaasu, aba lariñagun Hosué houn gürigia:

—Wagua humá! Derege laali Wabureme uburugu hun. 17 Lagünrinchawaguba uburugu sunsuinagubei lau sun le lídanbei, ladüga ítara liña lariñaguni Wabureme. Raabürügüba to horu hau sun ha aramudagubaña túbiñe igirúa lau ibagari, lugundun aramuda tumutiña meha aríaahatiña ha wóunahabaña. 18 Huguyati góunigi humá luéi hanügün o haguurun luagu ni kata le ñeinti lidan uburugu le ru laalibei Wabureme lun lagünrinchawagun, luéi híchugunu likianpun-agei Ísüraeli lábugiñoun íñarawaguni, ábame hanügüni lamiselu. 19 Gama lumoun golu luma pülata, luma sun katei le lauti buronse luma le lauti gürabu, lederegerúaba lun Wabureme, ábame lichugún lidoun lirisin.

20 Aba hagúaragun gürigia, aba tínwinrun fidu. Dan haganbunbalin Ísüraelina tamuri fidu, aba hagumeserun agúaraha lau sun here, aba lábürühan lubarieirun uburugu. Ábati hawanserun uburugun, aba hárügüdüni. 21 Lárigiñe, aba háfaraguniña wügüriña, würiña, nibureingiña, wéiyaaña tau eféin, ani íbini bágasu, mudún hama burigü áfaragua hamutiña. Günringua hamuti súngubei sunsuinagubei.

22 Aba lariñagun Hosué houn bián aríaahatiña ha buga ñǘdünbaña aríaahei fulasu:

—Heiba túbiñe horu, ábame hasagarunu ñéingiñe lau sun tumegen hama tánigu, ítara kei buga hariñaguni tun.

23 Aba hebelurun, aba hasagarunu Raabü lau sun túguchi, túguchu, tíbirigu hama sun tiduheñu, aba hanügüniña lidoun aban fulasu chóuruti, bóugudi tuéi hakianpun-agei Ísüraelina. 24 Lárigiñe, aba háguduni Ísüraelina uburugu lau sun le lídanbei. Pülatarügüñein le ñeinbei hasagara, golu luma burí katei le lauti buronse luma le lauti gürabu, aba hadireiruni lun Waburemerügüba lan ayusurei. 25 Gama lumoun ígira lumutu Hosué Raabü hau sun tiduheñu lau ibagari, ladüga taramuduniña aríaahatiña ha buga ounahóubaña Herikó. Lúmagiñeti dan ligía, hadan Ísüraelina haganawa tadügawagun Raabü.

26 Lárigiñe aba ladügüni Hosué fiñún le:

—Le áluguti lararamagüdüniya uburugu Herikó, íñarawaguñu luba ligibugiñe Wabureme. Danme le líchuguni furumiñeti dübü, hilala furumiñeti liráü, danme le líchuguni lagumuhóun dübü hilala liráü le amuleñein.

27 Íderagua lumuti Wabureme Hosué, aba laganbahoun luagu Hosué lidan sun fulasu.