1,2 Aba lanufudedun Adonisedekü le lurúeite Herusalén* saragu dan le laganbunbei luagu ragüla lan Hosué uburugu Ai, aba lan lagünrinchaguni, adüga ligía lun uburugu luma lun lurúeite kei buga ladüga lun Herikó lau sun lurúeite, luma luagu adügaaña lan Gabaónna daradu hama Ísüraelina ani haganóunña lan haganagua guentó. Anihántima katei le íchugubei saragu anufudei houn, lugundun aban buga uburugu wéiriguti, wéiriti sügǘ lau Ai, ani wügüriña ganigitiña Gabaónna. 3 Ligía lébubei lóunahan Adonisedekü ariñaga lun Ohamü le lurúeite Ebürón, lun Piramü lurúeite Harümútu, lun Hafia lurúeite Lákisi luma lun Debirü lurúeite Egülón:

4 —Higougu íderagua humaamugana ageindagua hama Gabaónna, ladüga adügaaña daradu luma Hosué luma hama Ísüraelina.

5 Aba lubeiti hóundarun seingü urúeigu Amoruna ha: Lurúeite Herusalén, Ebürón, Harümútu, Lákisi luma Egülón, aba houdin hau hamutuniña lun herederagun ligibugiñe Gabaón lun hageindagun hama lílana.

6 Ábati hóunahan ha aganóubaña Gabaón ariñaga lun Hosué kianpu-ágeirugu Gilügáli:

—Mamaharabá bíderaguniwa. Ñǘbuinba furese íderaguawa, lugundun óundaraguaaña sun urúeigu ha áraabubaña lun hageindagun wama.

7 Ábati láfuridun Hosué Gilügáligiñe hau sun lumutuniña ha ganigibaña, 8 aba lariñagun Wabureme lun:

—Manufudedabá hawéi, lugundun nederegerubaña bun, ani úabei ni aban hádangiñe araramuti bigibugiñe.

9 Aba láfuridun Hosué Gilügáligiñe, aba lawanserun áriebu aba lábürühan hawagun Amoruna ibidiñounga houn. 10 Aba ladügün Wabureme lun halouchun saragu hagibugiñe Ísüraelina, ábati láfaragun Hosué saragu hádangiñe uburugu Gabaón. Lárigiñe aba léibaahaniña luagu lémeri Betü-orón, aba lasigirun áfaraguaña Amoruna darí Aseká luma Makedá. 11 Dan le haragachunbei Amoruna luéigiñe luwübüri Betü-orón lidan hanurahan hawéi Ísüraelina, aba láhuyagüdün Wabureme óunwenbu burí dübü hawagun,* aba láfaragun saragu Amoruna sügǘ hau ha táfaragubaña hefeinte Ísüraelina.

12 Dan le lederegerunbaliña Wabureme Amoruna háhaburugun Ísüraelina, aba ladimurehan Hosué lun Wabureme hagibugiñe gürigia, lariñaga:

«Weyu, ráramaba uburugu Gabaón;

hati, ráramaba luagu liwayatin Ayalón».

13 Aba lararamun weyu luma hati

darí lásurun háfaraguniña Ísüraelina háganiñu.

Anihán le tariñagubei liliburun Haserü. Aba lararamagun weyu lamidangua sielu, yarafa lun aban weyu dayarüti, málüdünti. 14 Ni lubaragiñe, ni lárigiñe, úagili ni aban weyu libe weyu ligía le ídanbei laganbei Wabureme lumalali aban wügüri, lugundun lageindaguña buga Wabureme luéigiñe lufulesein Ísüraeli.

15 Lárigiñe aba lagiribudun Hosué hama Ísüraelina kianpu-ágeirugun Gilügáli, 16 Séingüti buga urúeigu hagía, aba hanurahan, aba haramudagun lidan aban aramudaguagülei Makedá. 17 Gama lumoun málüti lúmagiñe, aba hadarirún lidan aramudaguagülei ligía, aba lariñawagún lun Hosué. 18 Ábati lariñagun Hosué:

—Balabada huméi dübü chülǘ luagun lubenari aramudaguagülei, ábame hadouruni, híchigame súdaragu bénabu libiti lun hóunigiruni. 19 Merederagua humá ya. Heiba habügürü áganiñu, hábürühame hawagun hanagangiñe. Mígira humaña lun hagiribudun haburuguterugun lugundun derege laaña Wabureme le Hubungiute húhaburugun.

20 Lárigiñe lagumuchun Hosué hama Ísüraelina hau Amoruna lau háfaragun saragu hádangiñe, aba haramudagun Amoruna ha móunwegunbaña haburuguterugu. 21 Ánhañati Ísüraelina aba hagiribudun magadiñeñu kianpu-ágeirugun Makedá, le ñein lubéi Hosué. Úatiñati ganigitiña lun hadimurehan wuriba hawagu Ísüraelina.

22 Ábati lariñagun Hosué:

—Dará huméi lubenari aramudaguagülei, sagá humaña seingü urúeigu ha ñéinbaña.

23 Ábati hasagaruniña Ísüraelina lurúeite Herusalén, Ebürón, Harümútu, Lákisi luma lurúeite Egülón lídangiñe aramudaguagülei. 24 Dan le hanügünbaliña ligibugiñoun Hosué, aba lagúarun houn sun wügüriña Ísüraelina, aba lariñagun houn hábutigu milidaru ha lúmabaña:

—Higougu, ru huméi hugudi luagu hagiina urúeigu ha.

Aba hadügüni ítara, 25 ábati lariñagun Hosué houn:

—Manufudeda humá meferidirun humeime huguraasun, lubaragiñe lira, hérerügü humá ganigi huguyame, lugundun ítarameme luba ladüga Wabureme houn sun háganiñu.

26 Lárigiñe aba láfaraguniña Hosué urúeigu hagía, aba lóunahan adibiragüdaña luagu aban tídibu wewe, aba hígiruniña ñein darí larabachun weyu. 27 Dan le lálüda lubéi weyu, aba lóunahan Hosué arariragüdaña luéigiñe tídibu wewe, aba hachagaruniña lidoun aramudaguagülei le buga ñein lubéi haramudagua. Lárigiñe aba hadouruni lubenari aramudaguagülei lau óunwenbu burí dübü le aniheinmémeguabei ñein dagá lumoun dan le.

28 Weyuméme ligía, aba lárügüdüni Hosué uburugu Makedá, aba lagünrinchaguni sunsuinagubei, aba láfaraguniña sun ha aganóubaña ñein tau eféin, mígirunti ni aban wínwanñu. Kei ladüga lun lurúeite Herikó, ítara liña ladüga lun lurúeite Makedá.

29 Ñéingiñe, aba lidin Hosué hau Ísüraelina uburugun Libüná, aba hábürühan luagun. 30 Derege lumuti giñe Wabureme uburugu ligía houn lau sun lurúeite. Meredeti ni aban wínwanñu, kei ladüga lun lurúeite Herikó, ítara liña ladüga lun lurúeite Libüná.

31 Lárigiñe, aba houdin Libünágiñe lun uburugun Lákisi, aba herederagun ligibugiñe uburugu, aba hábürühan luagun. 32 Luagu libiaman weyu, aba lederegeruni Wabureme Lákisi houn, aba háfaraguniña Ísüraelina sun gürigia hama sun animaalugu ha ñéinbaña tau eféin kei hadüga uburugu Libüná. 33 Aba láfuridun Oramü le lurúeite Géserü hau lisudaranigu lun lageindagun luéigiñe Lákisi, gama lumoun aba láfarahani Hosué, mígirunti ni aban wínwanñu.

34 Lákisigiñe, aba lidin Hosué hau Ísüraelina uburugu Egülón, aba herederagun ligibugiñe aba hábürühan luagun. 35 Weyuméme ligía, aba hárügüdüni, aba háfaraguniña sun ha aganóubaña ñein tau eféin, aba hagünrinchaguni sunsuinagubei kei hadüga lun Lákisi.

36 Egülóngiñe, aba houdin uburugun Ebürón, aba hábürühan luagun. 37 Dan le hebelurunbei uburugun Ebürón, aba hagünrinchaguni sunsuinagubei, aba háfaruni urúei tau eféin, hau sun gürigia hama animaalugu ha aganóubaña ñein luma lidan burí fulasu le yarafabei ñein, kei hadüga uburugu Egülón.

38 Ñéingiñe, aba lidin Hosué hau Ísüraelina uburugun Debirü aba hábürühan luagun, 39 aba háfaruni lurúeite tau eféin hau sun lílana fulasu burí le yarafabei lun. Meredeti ni aban lílana Debirü wínwanñu, áfarawaguatiña súngubei kei hadüga lun Ebürón luma Libüná hau sun lurúeitegu.

40 Aba lubeiti lagañeiruni Hosué sun fulasu. Gañei lumutiña sun urúeigu ha áraabubaña, Négebü, ha lídanbaña fulasu mawübüriti hama ha luágubaña wübü. Günringua lumuti súngubei, áfaragualaña súngubei, mígirunti ni aban wínwanñu, kei buga lariñaguni Wabureme le Lubungiute Ísüraeli lun. 41,42 Áfaragua lumutiña urúeigu, gáñeilei sun hamúan labadinagua Kadesi-barünéa luma Gasa, luma sun lumúan Gosén darí uburugu Gabaón, lugundun lageindaguña Wabureme luagu hafulesein Ísüraelina. 43 Lárigiñe aba lagiribudun Hosué hau Ísüraelina kianpu-ágeirugun Gilügáli.