1 —Sun urúeigu Amoruna ha luéigiñebaña oubaü le ñeinhin lubéi lálüda weyu libiti Hordán, hama urúeigu Kananna ha lubadubaña barana Mediteraniu, aba hasubudiruni luagu mábeigüdalani Wabureme duna Hordán lun hánhiñuraguni Ísüraelina, aba hanufudedun saragu, aba mageindagun hamá hama Ísüraelina.

2 Ábati lariñagun Wabureme lun Hosué:

—Adügabá fiu gusiñu lautu dübü, ábayame bíchugun seini tuagu hóustarun Ísüraelina.

3 Aba ladügünu Hosué gusiñu, aba líchugun seini tuagu hóustarun wügüriña Ísüraelina luagu wübü Aralótu. 4-6 Rúaali buga seini tuagu hóustarun sun wügüriña Ísüraelina lubaragiñe háfuridun Ehiptugiñe; gama lumoun michugúnti biti tuagu hóustarun wügüriña ha águrahoubaña laganagua bián-wein irumu le hásügürübei lidan fulasu mageirawati. Bóugudin luéi lira, hilaguaaña buga sun meha ha gayaraahalibei hageindagun danbei le háfuridun Ehiptugiñe. Garabaguaaña buga lun Bungiu ani aba láfiñurun houn luagu marihindügü habéi lan múa rísiti le buga füramase lubéi houn hagüchagu. 7 Ligía líchugunbei Hosué seini tuagu hóustarun hasaanigu wügüriña hagía, ha líchugubaña Wabureme heweñegua, ha buga michugúngilibei seini tuagu hóustarun ladüga ǘmadañanu lan. 8 Dan le rúaali seini tuagu hóustarun súngubei, aba herederun emeraagua kianpu-ágeirugu darí hareidagun. 9 Ábati lariñagun Wabureme lun Hosué:

—Lau seini luagu úgubu le, gidá naali habusigari Ehiptuna hawéi.

Ligía lébubei Gilügálimemegili lubéi líribei fulasu ligía.

10 Aba hemeraagun Ísüraelina Gilügáli, weyu katorusu, aba hefeduhani Luéyuri Esefuruni rábounweyu lidan fulasu mawübüriti Herikó. 11 Larugan aba heigin éigini le líchugun múa, fein maganatu lébini luma türigu ásarahouaali. 12 Lúmagiñe dan ligía aba úaali lan maná, aba lubeiti hawinwandun Ísüraelina lau le líchugubei lumúan Kanán lidan irumu ligía.

13 Luagu aban weyu, dan le lubaduñein lan Herikó Hosué, aba larihin aban wügüri ligibugiñe tau aban eféin lúhaburugu, aba layarafadun Hosué lun, aba lálügüdüni:

—Hádangiñetibu san wánigu, o hádangiñe wáganiñu?

14 —Mama au hánigu, mama giñe au hágani —liña lóunabun wügüri ligia—. Niábiña kei hábuti lisudaranigu Wabureme.

Ábati lélemuchun Hosué darí ladagarun lerebe múarugu, aba lálügüdüni:

—Kagia lariñagubei Wabureme nun?

15 Aba lóunabuni hábuti lisudaran Wabureme:

—Ragaboun bigeidin, ladüga sagüráuti fulasu le ñein bubéi.

Aba ladügüni Hosué le lariñagubei lun.