1 Ábati lagúarun Hosué houn lani Rubén türibu, lani Gadü, hama lamidan lani Manasési türibu, 2 lariñaga houn:

—Gúnfuli humaali sun le uágubei lariñaga Moisesi le lubúein Wabureme hun, ani ñǘdünhadün giñe lau le nubeibei. 3 Chülǘ lumoun weyu le uguñe, ani luagu saragu dan, mígirun humagiña híbirigu, ani gúnfuli humaali lugumadin Wabureme le Hubungiute lau úaraguni. 4 Guentoti lau gúnfuli laali lan Wabureme lani füramasei ani darangilutiña híbirigu, giribu humá tidoun hikianpun, lidoun fulasu le líchugubei Moisesi le lubúein Wabureme hun luéigiñe oubaü le ñéingiñe lubéi laboucha weyu libiti Hordán. 5 Lérügüñein namuriahabei huma, lun hagunfuliruni gumadi luma burí lúrudu le líchugubei Moisesi le lubúein Wabureme hun lau úaraguni, lun hínsiñe lan Wabureme le Hubungiute hun, lun héibugun lidan lémeri súnwandan aganba humeime lugumadin, falá humeime, seriwi huguyame lun tau sun hanigi luma tau sun huani.

6 Lárigiñe, aba labiniruniña Hosué, aba lóunahaniña, aba houdin tidoun hakianpun.

7 Rúhali buga Moisesi múa houn lamidan lani Manasési türibu lóubawagu Basán. Lun le aban hamidan, aba líchugun Hosué múa houn hadan Ísüraelina luéigiñe oubaü le ñeinhin lubéi lálüda weyu libiti Hordán, ha furumiñebaña, aba labiniruniña, aba lóunahaniña hárigoun. 8 Lariñaga houn:

—Giribu humá guentó humúanrugun lau saragu irisini, animaalugu, golu, pülata, buronse, gürabu tuma saragu daüguaü. Fánreingua huméi katei le, le burí hagidarubei hawéi háganiñu hadan híbirigu.

9 Ítara liña hafanreinragun lani Rubén luma Gadü türibu hama lamidan lani Manasési türibu hawéi híbiri Ísüraelina Siló, lóubawagu Kanán, lun hagiribudun hamúanrugun lóubawagun Galaadü, le ñein lubéi hafulasun kei buga lariñaguni Wabureme liyumulugugiñe Moisesi.

10 Dan le hachülürünbei lani Rubén luma Dan türibu hama lamidan lani Manasési türibu laru duna Hordán hamúanrugu Kananna, aba hadügün aban óunwenbu latarü lubadu duna. 11 Aba haganbun híbiri Ísüraelina luagu hadügün lani Rubén luma Gadü türibu hama lamidan lani Manasési türibu aban latarü luagu láfadaragun Kanán, lubadu Hordán lidan hamúan Ísüraelina; 12 keiti haganbuni, aba hóundaragun Siló lun houdin ageindagua hama. 13 Aba hóunahani Finesi le liráü fádiri Eleasárü furumiñe lun lidin Galaadü, le ñein habéi lani Rubén luma Gadü türibu hama lamidan lani Manasési türibu. 14 Ñǘdüntiña diisi ábutigu Ísüraelina luma, kada aban hádangiñe lidan hiri liduheñu hama hani türibu. 15 Sun hagía aba houdin Galaadü, le ñein habéi lani Rubén, Gadü hama lamidan lani Manasési türibu, aba hariñagun houn:

16 —Lidan hiri lumutuniña Wabureme wadimureha. Káteigia agarabaaguni le, le hadügübei woun? Ka uagu hígirei Wabureme, aba hadügün aban latarü lau maganbadi lun Wabureme? 17 Lóuguati funagia lifigoun Peoru le aubei dáseiñugidiwa lan, le giñe uéigiñebei hóunwegua saragu hádangiñe lumutuniña Wabureme? 18 Memeniti san lira hun, hadisedunbei giñe luéi Wabureme? Anhaün agarabaagua uguñe luagun Wabureme, haruga lagañiduba houn sun Ísüraelina. 19 Anhein haritagua hubéi luagu wiye lan múa le, le ichugúbei hun, higougu lidoun lumúan Wabureme le ñein tubéi lani Sanduariu. Ragǘ humá aban fulasu waganagua. Gama lumoun magarabaagua humá luagun Wabureme ni wawagun lau hadügün amu latarü luéi le lani Wabureme le Wabungiute. 20 Haritagua humá luagu afigouha lan Akán (le liráü Sera) lau lanügüni katei le rúaalibei lun lagünrinchawagun, ani luagu lidurun Akán, aba lagañidun Wabureme houn sun lánigu Ísüraeli. Ani mámarügüñein Akán ounwe luéigiñe lifigoun!

21 Ábati hariñagun lánigu Rubén, Gadü luma Manasési houn hábutigu Ísüraelina:

22 —Subudi lumuti Wabureme le Habungiute sun búngiugu luagu mama lan lau maganbadi wadügei latarü le o lun lan wadisedun luéi. Subudi lumuti, ani subudigüda lumuti hun sun huguya; anhein ligía lubéi burí katei le, lébunabei wadügüni latarü, áfaragualawa! 23 Anhein lun lubéi wadisedun luéi Bungiu wadügei latarü le o lun lan wadagaragüdün adagaragüdüni gudawarügüti, idewesei le tauti türigu o adagaragüdüni lánina arandaruni, Wabureme guánarügüla aguseragüdawa. 24 Wadügünbalin katei le, ladüga mabusenrúntiwa lun lachülürün aban dan lun hariñagun hisaanigu houn wasaanigu: "An san huguya, ka hánibei luma Wabureme le Lubungiute Ísüraeli? 25 Líchugunbalin Wabureme duna Hordán, lun lafanreinraguniwa huéi, huguya le lani Rubén luma Gadü türibu. Mánitün ni kata luma Wabureme le Lubungiute Ísüraeli". Ítara, hadügüba hisaanigu lun heferidiruni wasaanigu lineben Wabureme houn. 26 Ligía wadügünbei aban latarü, mama lun wadagaragüdün adagaragüdüni gudawarügüti lun Wabureme ni amu adagaragüdüni, 27 wadügünbalin katei le lun wasubudiruni subudi humeime, subudi hamaamugei giñe hadügawagun luagu gayara lan weseriwidun lun Wabureme, gayara wayabin ligibugiñe lau wadagaragüdün le gudawarügüti, lau wadagaragüdün luagu figóu, luma le lánina arandaruni. Ítara luba siñá lan hariñagun hadügawagun houn wadügawagun: "Mánitün ni kata luma Bungiu". 28 Haritaguatiwa luagu anhein lan ariñawagúa woun o houn lan wadügawagun ítara, gayaraabei wariñagun: "Ariha humá! Hadügünbalin binadu wagübürigu latarü le, mama lun hadagaragüdün le gudawarügüti ni amu adagaragüdüni luagu, hadügünbalin, lun leseriwidun kei gefenti waganagua". 29 Mígirala Bungiu lun wagarabaagun luagun o wígiruni lan lau wadügün amu latarü lun wadagaragüdün le gudawarügüti o idewesei le türigu o lun lan amu adagaragüdüni, bóugudin luéi lani Wabungiute latarü le tigibugiñebei sanduariu.

30 Dan laganbunbalin fádiri Finesi, hama hábutigu Ísüraelina ha ñǘdünbaña luma le hariñagubei lánigu Rubén, Gadü hama lamidan lani Manasési türibu, buiti larihín houn. 31 Ábati lariñagun Finesi le liráü fádiri Eleasárü houn:

—Guentó, chouru wamaali luagu anihein lan Wabureme wama, lugundun móuchuntün lun hagarabaagun luagun, ani lau lira sefu humaadiwa luéi labeichuniwa Wabureme.

32 Lárigiñe, aba layouragun Finesi hama ha ñǘdünbaña luma houn, aba hagiribudun lóubawagugiñe Galaadü lun lóubawagun Kanán, le ñein habéi Ísüraelina. Dan le habahüdagunbalin le hariñagubei ha lánigu líbiri türibu houn ha Kananbaña, 33 buiti harihin lun hóunabagüle, aba halawahani Bungiu. Lúmagiñe dan ligía, madimurehanhaña luagu ageindaguni hama lani Rubén luma Gadü türibu ni luagu hagünrinchaguni hageira. 34 Aba híchuguni ladügawagun Rubén hama ladügawagun Gadü liri latarü ligía, «Arufudahani», hariñaga: «Latarü le, ábanbei arufudahani wadan luagu Wabureme lan Búngiubei».