1 Aba hóundaragun sun Ísüraelina Siló, lun tadagarun kianpu lánina óundaruni luma Bungiu ñein. Dan ligía gañei hamaali burí fulasu, 2 gama lumoun añaheingua buga sedü hádangiñe hani Ísüraelina türibu mibihin hamagili hafulasun.

3 Ábati lariñagun Hosué houn Ísüraelina:

—Ka hagurabubei lun hárügüdüni humúan le ru laalibei Wabureme le Habungiute hagüchagu hun? 4 Anúadaha humá ǘrüwa wügüriña lídangiñe kada türibu, óunaha náamugaña éibugei sun fulasu, ariñaga hamaamugei nun ida luba lan ligaburi gayara lan lafanreinhóun. 5 Hadügüba wügüriña hagía sedü murusun lau fulasu, hígireime lumúan Hudá lun luagun suru, hamúan ladügawagun Hosé luagun nórute. 6 Lárigiñeme fánreingua hamaali fulasu lidan sedü murusun, ábame habürüdüni ida liña lan, ábame hanügüni nun, ábame nafanreinhani lau ubunuruni ya ligibugiñe Wabureme le Wabungiute. 7 Michugúnwabei fulasu houn Lewitagu, hafadirihan lun Wabureme, ligía halagantebei. Lani Gadü luma Rubén türibu, hama lamidan lani Hosé türibu le gíribei Manasési, ibiha hamaali hafulasun luéigiñe oubaü le ñéingiñe lubéi laboucha weyu libiti Hordán, le líchugubei Moisesi houn.

8 Aba haranserun wügüriña hagía lun houdin, lariñaga Hosué houn:

—Heiba lidan sun fulasu ligía, ábame hafanreinraguni, danme hásurun, ábame hagiribudun numoun, afanreinha náamugei lau ubunuruni ya Siló ligibugiñe Wabureme.

9 Aba houdin wügüriña hagía, aba héibuguni sun fulasu ligía, aba hafanreinraguni burí uburugu lidan sedü murusun, aba habürühani sun katei le hadügübei. Lárigiñe aba hagiribudun kianpu-ágeirugun Siló le ñein lubéi Hosué. 10 Ábati lafanreinhani Hosué fulasu hadan Ísüraelina lau ubunuruni ligibugiñe Wabureme.

11 Lárigiñe ladügün ubunuruni, aba latokarun houn liduheñu lani Benhamín türibu labadinagua hamúan lani Hudá luma Hosé türibu. 12 Lagumesera láfadaragun fulasu ligía lúmagiñe duna Hordán luéigiñe nórute, luagun nórute libiti Herikó, lasigira luéigiñe dabíara luagun oubaü le ñeinhin lubéi lálüda weyu, liabin áfurida luagun fulasu mageirawati Betü-awén. 13 Lasigira luagun Lusu (lememe Beteli) luéigiñe suru, laragacha darí Atarótu-adarü luagu wübü le luágunbei suru libiti Betü-orón le ǘnabubei; 14 lagararaagua fadaguaü luagun barana Mediteraniu luéigiñe suru libiti wübü le ligibugiñebei Betü-orón, darí Kiriatü-baali lememe Kiriatü-hearimü, le hani lani Hudá türibu. Ligía fadaguaübei luéigiñe oubaü le ñeinhin lubéi lálüda weyu.

15 Láfurida fadaguaü suru luéigiñe Kiriatü-hearimü, luagun oubaü le ñeinhin lubéi lálüda weyu darí luagun lísensen duna Nefütóa, 16 laragacha darí luagun lébeha wübü le ligibugiñebei fulasu wayati le gíribei Ben-inomu, luéigiñe nórute libiti fulasu wayati le gíribei Refaímü. Ñéingiñe laragacha luagun fulasu wayati le gíribei Inomu, lásügüra luéigiñe suru libiti lamudeirun Hebusu, lasigira darí lumoun lísensen duna En-roheli. 17 Lagararaagua luagun nórute, láfurida luagun Eni-semesi, lasigira darí Gelilótu, le ligibugiñebei lamudeirun Adumímü, laragacha darí lidübüri Boán le liráü Rubén; 18 lásügüra luéigiñe nórute libiti wübü, ligibugiñe fulasu wayati le gíribei Hordán, laragacha darí duna Hordán 19 lásügüra luéigiñe nórute libiti Betü-ogulá, lagumucha laru beya nórute libiti Barana Hilaali le ñein lubéi liyumoun duna Hordán. Anihán fadaguaübei luéigiñe suru.

20 Duna Hordán fadaguaübei luéigiñe oubaü le ñéingiñe lubéi laboucha weyu. Ligía burí láfadaragunbei fulasu le afanreinhóubei hadan haduheñu lani Benhamín türibu.

21 Anihán burí uburugu atokarubei houn lánigu Benhamín, luéigiñe aban oubaü: Herikó, Betü-ogulá, Émekü-kesisi, 22 Betü-arawá, Semaraímü, Beteli, 23 Awimü, Pará, Ofürá, 24 Kefarü-amoní, Ofuní luma Geba duusu uburugu lau burí lirahüñü aüdü le geyegubei lau. 25 Luma giñe Gabaón, Ramá, Beerotu, 26 Misüpá, Kefirá, Mosá, 27 Rékemü, Irüpéeli, Taralá, 28 Selá, Élefü, Hebusu (lememe Herusalén) Gibeá luma Kiriatü, katorusu uburugu lau burí lirahüñü aüdü le geyegubei lau. Ligía múa le atokarubei houn haduheñu lani Benhamín türibu.