1 Saragu dan lárigiñe líchugun Wabureme darangilaü houn Ísüraelina hama háganiñu, ani dan le wéiyaali lubéi Hosué, 2 aba lóunahan Hosué hawagu sun Ísüraelina hau sun eweridihatiña, ábutigu, aguseragüdütiña hama hábutigu súdara, lariñaga houn:

—Au wéiyaadina hǘrühali nirumudiri nun. 3 Ariha humaali sun le ladügübei Wabureme houn sun lílana burí fulasu ha awügürihóubaña hun, ligía ageindagubei huéigiñe. 4 Afanreinha numuti sun múa le hadan türibugu lau ubunuruni. Mámarügüñein múa le gáñeiwaali nafanreinha, afanreinha numuti giñe le magañeirúnwagilibei lúmagiñe duna Hordán luéigiñe oubaü le ñéingiñe lubéi laboucha weyu, darí barana Mediteraniu luéigiñe oubaü le ñeinhin lubéi lálüda weyu. 5 Labugagubaña Wabureme ha aganóubaña lidan fulasu burí ligía, ábame lerederun hun kei füramase lani Wabureme le Hubungiute.

6 —Áfaagua humá lun hagunfuliruni sun le lariñagubei lilurudun Moisesi, gúnfuli huméi kei lubudubu. 7 Mádaragua humá hungua hamoun gürigia ha añaheinguabaña aganawa ya haganagua. Máhuduragua huma houn habungiutegu, midin huguyame lau le habeibei; míridagubei huméi hiri búngiugu hagía, máfiñurun huguyame hawagu. 8 Falá huméi Wabureme le Hubungiute súnwandan, kei hadügüni chülǘ lumoun dan le. 9 Bugaali Wabureme türibu wéinamuburitiña ani héretiña hiñúarürugugiñe, chülǘ lumoun dan le úati ni aban araramuti higibugiñe. 10 Ábanrügü hídangiñe, gayaraati lanuraagüdün milu, lugundun lageindaguña Wabureme le Wabungiute luagu hufulesein ítara kei füramase lani. 11 Ligía lubeiti hínsiñela Wabureme le Wabungiute hun. 12,13 Gama lumoun anhaün adireira luéi Bungiu lun hóundarun hamoun gürigia ha erederubaña haganagua, amarieidagua huguyame hama, gayaraati hachoururuni, mabugun lubaña lan Wabureme haganaguagiñe, lubaragiñe lira, layusurubaña keisi gúrudu tuma sádara lun hábürühan ñeinhin luma kei abeihagülei lun hanagan, luma kei hiiyu hágurugu, ani ítara luba darime lun merede lan ni aban hídangiñe lidan lubuidun múa le líchugubei Wabureme le Hubungiute hun.

14 —Au madiseeli nounwen, gama lumoun lubaragiñe nounwen, busentina lun hasubudiruni tau sun hanigi luma tau sun huani luagu gúnfulihali lan sun katei buiti le buga füramase lubéi Wabureme hun. Meredeti ni ábanrügü lídangiñe le füramase lubéi magunfulirunga. 15 Gama lumoun ítara kei lagunfulirun sun buiti le füramase lubéi Wabureme hun, ítara luba giñe lanügün sun luwuyeri wuribani huagun, darime lun merede lan ni aban hídangiñe ligibuagu múa buiti le líchugubei hun, 16 anhein magunfulirun humá daradu le ladügübei Wabureme huma. Anhaün áhuduragua houn amu búngiugu, bulugua huguyame hagibugiñe, lagañiduba Wabureme huma, ábame hagumuchagun furese ligibuagugiñe múa buiti le líchugubei hun.